ଜଳେଶ୍ୱର, ୯।୧(ସ୍ବ.ପ୍ର.)-ବିଭିନ୍ନ ସମୟରେ ଜଳେଶ୍ୱର ତହସିଲ ଅଞ୍ଚଳରେ ବେଆଇନ ବୋଝେଇ ଟ୍ରକ୍ ଚଳାଚଳ କରୁଥିବା ବେଳେ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ହେଉ ନ ଥିବାରୁ ଅସନ୍ତୋଷ ପ୍ରକାଶ ପାଇଥିଲା। ବିଶେଷ କରି ଗ୍ରାମାଞ୍ଚଳ ରାସ୍ତାଗୁଡିକରେ ଭାରିଯାନଗୁଡିକ ଯାତାୟାତ କରୁଥିବାରୁ ରାସ୍ତାଗୁଡିକ ନଷ୍ଟ ହୋଇଯାଉଛି। ଏହାର ପ୍ରତିବାଦରେ ଗତ ସୋମବାର ରାତିରେ ରାଇବଣିଆ ଅଞ୍ଚଳର ହାତୀଗଡ-ଓଲମରା ରାସ୍ତାରେ ଗ୍ରାମବାସୀ ପଥର ବୋଝେଇ ୮ଟି ଡମ୍ପର(ନଂ.ଓଡି୦୧-କେ୧୮୬୬, ଓଡି୦୧-ଏଚ୍-୧୯୯୪, ଓଡି୦୧-କେ-୨୧୧୯, ଓଡି୦୧-ଏଥ-୧୮୬୬, ଓଡି୨୨ସି-୩୫୨୫, ଓଡି୦୧କେ-୫୦୬୬, ଓଡି୦୧ଏଲ୍-୧୮୬୬, ଓଡି୦୧ଏକ୍ସ-୬୨୯୨) ଅଟକ ରଖି ଓଲମରା ଆର୍ଆଇଙ୍କୁ ଖବର ଦେଇଥିଲେ। ଆରଆଇ ପହଞ୍ଚି କାଗଜପତ୍ର ଯାଞ୍ଚ କରିଥିଲେ। ପରେ ସେଗୁଡିକୁ ରାଇବଣିଆ ଥାନାରେ ଅଟକ ରଖାଯାଇଥିଲା। ମଙ୍ଗଳବାର ଜଳେଶ୍ୱର ତହସିଲଦାର କ୍ଷୀରୋଦ କୁମାର ପଣ୍ଡା ଏହାକୁ ଜବତ କରିଥିଲେ। ସେସବୁ ଡମ୍ପର ସୁବର୍ଣ୍ଣରେଖା ନଦୀର ମାକିଡିଆଠାରେ ନିର୍ମାଣାଧୀନ ସ୍ପର ଓ ପଥର ପ୍ୟାକିଂ କାର୍ଯ୍ୟ ପାଇଁ ଯାଉଥିବାରୁ ସେମାନଙ୍କୁ ସତର୍କ କରାଯାଇ ଏପରି ବେଆଇନ ଓଭରଲୋଡିଂ ନ କରିବା ପାଇଁ ତହସିଲଦାର ପଣ୍ଡା ପରାମର୍ଶ ଦେବା ସଙ୍ଗେ ସଙ୍ଗେ ଜରିମାନ ବାବଦକୁ ପ୍ରତି ଡମ୍ପର ପିଛା ୧୮ହଜାର ହିସାବରେ ୧ଲକ୍ଷ ୪୪ ହଜାର ଟଙ୍କା ଆଦାୟ କରିଥିଲେ। ସୂଚନାଯୋଗ୍ୟ ସେହିସବୁ ଭାରିଯାନଗୁଡିକ ବିଦ୍ୟାଳୟ ଶିକ୍ଷାଦାନ ସମୟରେ ପରିବହନ ନ କରିବାକୁ ସମ୍ପୃକ୍ତ ମାଲିକମାନଙ୍କୁ ପ୍ରଶାସନ ପକ୍ଷରୁ ଚେତାବନୀ ଦିଆଯାଇଛି ା