ଆସିକା,୧୬ା୧୨ (ଡି.ଏନ୍.ଏ.)-ଆସିକା ଏନ୍ଏସି ସୁନାମ୍ବ ସାହି ଋଷିକୂଲ୍ୟା ନଦୀ ବାଲିଘାଟରୁ ବେଆଇନଭାବେ ବାଲି ଚୋରା ଚାଲାଣ କରୁଥିବା ଅଭିଯୋଗରେ ଶନିବାର ରାତିରେ ପୋଲିସ ୭ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ଆସିକା ପାକଲାପଲ୍ଲୀର କୈଳାସ ପ୍ରଧାନ, ବରଗାଁର ଜୟ କୁମାର ଦାସ, ବୁଗୁଡା ଅନ୍ତରପଡାର ରଙ୍କନିଧି ଗୌଡ, ବୁଢାମ୍ବ ଗ୍ରାମର ଧ୍ରୁବ ମହାରଣା, ଆସିକା ଗଣ୍ଡପଲ୍ଲୀର ସୟ ଦାସ, ଭୋଗଡା ଖଦାଳ ସାହିର ଧ୍ରୁବ ନାଇକ ଓ ନନ୍ଦିଘର ଗ୍ରାମର ଜନାର୍ଦ୍ଦନ ପ୍ରଧାନ। ଅଭିଯୁକ୍ତଙ୍କ ନିକଟରୁ ପୋଲିସ ୨ଟି ହାଇୱା, ୨ଟି ଟ୍ରାକ୍ଟର, ଗୋଟିଏ ମିନିଟ୍ରକ୍, ଗୋଟିଏ ଜେସିବି ଏଭଳି ମୋଟି ୬ଟି ଗାଡି ସହ ସରକାରଙ୍କ ଦ୍ୱାରା ଯୋଗାଇ ଦିଆଯାଇଥିବା ୩ଟି ଟ୍ରାଞ୍ଜିଟ୍ ପାସ୍ ବହି, ୩ଟି ଡ୍ରାଇଭିଂ ଲାଇସେନ୍ସ ଓ ଦୁଇଟି ମ୍ୟାଜିକ୍ ପେନ୍ ଜବତ କରିଛି। ରବିବାର ମଧ୍ୟାହ୍ନରେ ଆସିକା ଥାନାରେ ଆୟୋଜିତ ଏକ ଖବରଦାତା ସମ୍ମିଳନୀରେ ଆସିକା ଏସ୍ଡିପିଓ ସୂର୍ଯ୍ୟମଣି ପ୍ରଧାନ ଏହି ସୂଚନା ଦେଇଛନ୍ତି। ତେବେ ଏହି ବାଲି ଘାଟର ପ୍ରକୃତ ଗୁତାଦାର ଫେରାର ଥିବାରୁ ତାଙ୍କୁ ଗିରଫ ଲାଗି ପୋଲିସ ଉଦ୍ୟମ ଚଳାଇଥିବା ଥାନା ଅଧିକାରୀ ପ୍ରଶାନ୍ତ କୁମାର ସାହୁ ସୂଚନା ଦେଇଛନ୍ତି। ସରକାରଙ୍କ ଦ୍ୱାରା ବାଲିଘାଟ ଗୁତାଦାରଙ୍କୁ ଯୋଗାଇ ଦିଆଯାଇଥିବା ୱାଇ ଫର୍ମକୁ ଅଭିଯୁକ୍ତମାନେ ମ୍ୟାଜିକ୍ ପେନ ଦ୍ୱାରା ଲେଖୁଥିଲେ ଏବଂ ଏହି ପେନର ଲେଖା ସବୁ ସାମାନ୍ୟ ଗରମରେ ଲିଭିଯାଇଥିବାରୁ ସେହି ପୁରୁଣା ରସିଦରେ ପୁଣି ନୂତନ ତାରିଖରେ ନୂତନ ନାମ ଦେଇ ଜାଲିଆତି କରି ରସିଦ ବ୍ୟବହାର କରାଯାଉଥିବା ପୋଲିସ ତଦନ୍ତରୁ ଜାଣିପାରିଛି। ଏହାଛଡା ନଦୀର ଏକ ନିର୍ଦ୍ଧାରିତ ସ୍ଥାନରୁ ବାଲି ଉଠାଣ ଲାଗି ରାଜସ୍ବ ବିଭାଗ ପକ୍ଷରୁ ଅନୁମତି ଦିଆଯାଇଥିବାବେଳେ ଗୁତାଦାର ଅଧିକ ଜାଗାର ବାଲି ଉଠାଇ ଚାଲାଣ କରୁଥିବା ତଦନ୍ତବେଳେ ପୋଲିସ ଜାଣିପାରିଛି। ଏ ସମ୍ପର୍କରେ ସ୍ଥାନୀୟ ତହସିଲଦାରଙ୍କ ସହ ଯୋଗାଯୋଗ କରି ପରବର୍ତ୍ତି ପଦକ୍ଷେପ ନିଆଯିବ ବୋଲି ଥାନା ଅଧିକାରୀ ସାହୁ ସୂଚନା ଦେଇଛନ୍ତି। ଏନେଇ ଆସିକା ଥାନାରେ ନଂ.୪୮୦/୧୯ରେ ଏକ ମାମଲା ରୁଜୁ କରାଯାଇ ଗିରଫ ଅଭିଯୁକ୍ତଙ୍କୁ ରବିବାର ଅପରାହ୍ନରେ କୋର୍ଟ ଚାଲାଣ କରାଯାଇଛି।