ଲଣ୍ଡନ, ୨୦ା୪: କ୍ରିଷ୍ଟିଆନ ରୋନାଲ୍ଡୋ ଓ ଲିଓନେଲ ମେସିଙ୍କ ମଧ୍ୟରୁ କିଏ ଶ୍ରେଷ୍ଠ ଫୁଟ୍ବଲ ଖେଳାଳି। ଏହାକୁ ନେଇ ସର୍ବଦା ବିତର୍କ ଲାଗି ରହିଛି। ଏବେ ଏଥିରେ ଯୋଡ଼ି ହୋଇଛନ୍ତି ଇଂଲଣ୍ଡ ଫୁଟବଲ ଲିଜେଣ୍ଡ ଡେଭିଡ ବେକ୍ହାମ୍। ଶେଷ ବାଲନ ଡି’ଅର ପୁରସ୍କାର ମଧ୍ୟରୁ ମେସି ଓ ରୋନାଲ୍ଡୋ ୧୧ଟି ଜିତି ସାରିଛନ୍ତି। ତେବେ ରୋନାଲ୍ଡୋଙ୍କ ଅପେକ୍ଷା ବେକ୍ହାମ୍ ଫେଭରାଇଟ ଖେଳାଳିଭାବେ ମେସିଙ୍କୁ ବାଛିଛନ୍ତି । ରୋନାଲ୍ଡୋ ଓ ମେସି ସର୍ବଦା ବିରୋଧୀ କ୍ଲବରୁ ଖେଳି ଆସିଛନ୍ତି। ଏବେ ରୋନାଲ୍ଡୋ ଜୁଭେଣ୍ଟସ ଏବଂ ମେସି ବାର୍ସିଲୋନା ପକ୍ଷରୁ ପ୍ରତିନିଧିତ୍ୱ କରୁଛନ୍ତି। ୟୁରୋପିଆନ ଫୁଟବଲରେ ଦୁହେଁ ପ୍ରଭାବୀ ଖେଳାଳିଭାବେ ବେଶ୍ ପରିଚିତ । ଗତ ଡିସେମ୍ବରରେ ମେସି ରେକର୍ଡ ୬ଷ୍ଠ ଥରପାଇଁ ଗୋଲ୍ଡେନ ବଲ୍ ପୁରସ୍କାର ହାସଲ କରିଥିଲେ। ପୂର୍ବତନ ମାଞ୍ଚେଷ୍ଟର ୟୁନାଇଟେଡ୍ ଖେଳାଳି ବେକ୍ହାମ୍ଙ୍କ ମତରେ ବ୍ୟକ୍ତିଗତଭାବେ ଦେଖିଲେ ମେସି ଜଣେ ଚମତ୍କାର ଖେଳାଳି। ତାଙ୍କ ସହ ଆଉ କାହାକୁ ତୁଳନା କରିବା ସମ୍ଭବ ନୁହେଁ। କ୍ରିଷ୍ଟିଆନୋ ଜଣେ ଭଲ ଖେଳାଳି। ମାତ୍ର ମେସିଙ୍କ ସହ ତୁଳନୀୟ ନୁହନ୍ତି ।
୨୦୧୩ରେ ପ୍ୟାରିସ ସେଣ୍ଟ ଜର୍ମନ କ୍ଲବ ପକ୍ଷରୁ ପ୍ରତିନିଧିତ୍ୱ କରୁଥିବାବେଳେ ଚାମ୍ପିୟନ୍ସ ଲିଗ୍ରେ ମେସିଙ୍କୁ ସମ୍ମୁଖୀନ ହୋଇଥିବା କଥାକୁ ମନେ ପକାଇଛନ୍ତି ବେକ୍ହାମ୍। ”ମେସି ପଡ଼ିଆକୁ ପ୍ରବେଶ କରିବା ପୂର୍ବରୁ ଆମେ ଅଗ୍ରଣୀଲାଭ କରିଥିଲୁ। ମାତ୍ର ମେସି ପ୍ରବେଶ କରିବାପରେ ବାର୍ସିଲୋନା ସ୍କୋର କରିବାରେ ଲାଗିଥିଲା। ସେ ସମୟରେ ମୁଁ ଫୁଟ୍ବଲକୁ ବହୁତ ଉପଭୋଗ କରିଥିଲି। ହାର ମାନିବାକୁ କେବେ ଚାହିଁ ନ ଥିଲି। ଆମ ଟିମ୍ ବହୁତ ଭଲ ଖେଳିଥିଲା। ଉଭୟ ମ୍ୟାଚରେ ଗର୍ବିତ ହେବାପରି ଆମେ ପ୍ରଦର୍ଶନ କରିଥିଲୁ। ବାର୍ସିଲୋନା ବିପକ୍ଷରେ ଆମେ ପରାଜିତ ହୋଇ ନ ଥିଲୁ। ଏହା ମୋତେ ବହୁତ ଉତ୍ସାହିତ କରିଥିଲା। ଉଭୟ ମ୍ୟାଚ ଡ୍ର ରହିଥିଲା। ପାର୍କ ଡେସ୍ ପ୍ରିନ୍ସେସଠାରେ ମ୍ୟାଚ ୨-୨ ଓ କାମ୍ପ ନୋଉଠାରେ ୧-୧ ଗୋଲରେ ଶେଷ ହୋଇଥିଲା। ତେବେ ବାହାର ପରିବେଶରେ ଅଧିକ ଗୋଲ ଦେଇଥିବାରୁ ବାର୍ସିଲୋନା କ୍ବାର୍ଟର ଫାଇନାଲକୁ ଉନ୍ନୀତ ହୋଇଥିଲା“ ବୋଲି ବେକ୍ହାମ୍ କହିଛନ୍ତି ।