ନୂଆଦିଲ୍ଲୀ,୨୦।୫(ପି.ଟି.): ବେଙ୍ଗାଲୁରୁ ସ୍ଥିତ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ସେଣ୍ଟରରେ ଜଣେ କରୋନା ଭାଇରସ୍ ପଜିଟିଭ ସମ୍ପନ୍ନ କର୍ମଚାରୀ ତଥା ରୋଷେୟା ମୃତ୍ୟୁବରଣ କରିଛନ୍ତି। ତେବେ ଏହା ସତ୍ତ୍ୱେ ଅଲିମ୍ପିକ୍ସ ପାଇଁ ପ୍ରସ୍ତତି ଚଲାଇଥିବା ଭାରତୀୟ ପୁରୁଷ ଓ ମହିଳା ଦଳର ଖେଳାଳିମାନଙ୍କୁ ସ୍ଥାନାନ୍ତର କରାଯିବ ନାହିଁ ବୋଲି ହକି ଇଣ୍ଡିଆ ତରଫରୁ ସ୍ପଷ୍ଟ କରାଯାଇଛି। କରୋନା ପଜିଟିଭ୍ ଥିବା ସମ୍ପୃକ୍ତ ରୋଷେୟାଙ୍କ ସହ ଖେଳାଳିମାନଙ୍କ ମଧ୍ୟ କୌଣସି ସମ୍ପର୍କ ନାହିଁ ଓ ସେମାନେ କୌଣସି ପ୍ରକାର ଏହି ବ୍ୟକ୍ତିଙ୍କ ସହ ସମ୍ପର୍କରେ ଆସିନାହାନ୍ତି ବୋଲି ହକି ଇଣ୍ଡିଆ କହିଛି।
ରୋଷେୟା ଜଣକ ହୃଦ୍ଘାତ୍ରେ ପ୍ରାଣ ହରାଇଛନ୍ତି। ତେବେ ସେ କରୋନା ପଜିଟିଭ୍ ଥିବା ପରେ ଜଣାପଡିଥିଲା ବୋଲି ସାଇର ଜଣେ ବରିଷ୍ଠ ଅଧିକାରୀ କହିଛନ୍ତି। କିନ୍ତୁ ଏଥିରେ ଭୟଭୀତ ହେବାର କିଛ କାରଣ ନାହିଁ। କାରଣ ଖେଳାଳି ରହୁଥିବା ସ୍ଥାନରେ ସମ୍ପୃକ୍ତ ବ୍ୟକ୍ତିଙ୍କ ଯିବା ଆସିବା ନ ଥିଲା ବୋଲି ସେ କହିଛନ୍ତି। ତେଣ ଏଠାରୁ ଖେଳାଳି ସ୍ଥାନାନ୍ତର ହେବାର ପ୍ରଶ୍ନ ଉଠୁନାହିଁ। ଭିତ୍ତିଭୂମି ଓ ସୁବିଧା ସୁଯୋଗ ଦୃଷ୍ଟିକୋଣରୁ ଦେଶରେ ବେଙ୍ଗାଲୁରୁ ସବୁଠାରୁ ଶ୍ରେଷ୍ଠ ସ୍ଥାନ ବୋଲି ହକି ଇଣ୍ଡିଆ ମୁଖ୍ୟ କାର୍ଯ୍ୟନିର୍ବାହୀ ଏଲିନା ନର୍ମାନ କହିଛନ୍ତି। ଅନ୍ୟପଟେ ସାରା ଦେଶରେ ଲକ୍ଡାଉନ ଜାରି ରହିଥିବାରୁ ଖେଳାଳିଙ୍କୁ ଅନ୍ୟ ସ୍ଥାନକୁ ସ୍ଥାନାନ୍ତର କରିବା ବ୍ୟହହାରିକ ଭାବେ ଅସମ୍ଭବ ବୋଲି ସେ ସ୍ପଷ୍ଟ କରିଛନ୍ତି।
ମାର୍ଚ୍ଚ ୧୦ ତାରିଖର ପରଠାରୁ ରୋଷେୟା ଜଣକୁ ଗେଟ ଏରିଆକୁ କେବେବି ଯାଇ ନାହାନ୍ତି। ବୟସାଧିକ ହେତୁ ତାଙ୍କୁ ମାର୍ଚ୍ଚ ୧୦ ତାରିଖଠାରୁ ଘରେ ରହିବାକୁ ନିର୍ଦ୍ଦେଶ ଦିଆଯାଇଥିଲା। ତେବେ ସେ ହୃଦ୍ଘାତ୍ରେ ପ୍ରାଣ ହରାଇଥିଲେ ବୋଲି ସାଇର ଅଧିକାରୀ ଜଣକ କହିଛନ୍ତି। ରୋଷେୟା ଜଣକ ତାଙ୍କର ଜଣେ ସମ୍ପର୍କୀୟଙ୍କ ପିଲା ଜନ୍ମ ହେବାର ସମ୍ଭାବନା ଥିବା ଯୋଗୁ ହସ୍ପିଟାଲ ଯାଇଥିଲେ ଓ ହୃଦ୍ଘାତ୍ କାରଣରୁ ପ୍ରାଣ ହରାଇଥିଲେ। ନିୟମ ଅନୁସାରେ ତାଙ୍କର କୋଭିଡ-୧୯ ପରୀକ୍ଷା ହୋଇଥିଲା ଓ ସେ ପଜିଟିଭ୍ ବୋଲି ଜଣାପଡିଥିଲା।
ସାଇ କ୍ୟାମ୍ପସ୍ ଗେଟ ଏରିଆ, ସେକ୍ଟର-ଏ ଓ ସେକ୍ଟର ବି’ରେ ବିଭକ୍ତ। ଖେଳାଳିମାନେ ସେକ୍ଟର ବି’ରେ ରହିଥାନ୍ତି। ଖେଳାଳିମାନେ ଗତ ଦୁଇମାସ ହେବ କ୍ୱାରାଣ୍ଟାଇନ୍ରେ ରହୁଛନ୍ତି ବୋଲି ସେ କହିଛନ୍ତି। ରୋଷେୟାଜଣକ ୬୫ ଦିନ ହେବ କ୍ୟାମ୍ପସ ବାହାରେ ରହୁଛନ୍ତି। ମାର୍ଚ୍ଚ ୧୫ରେ ସେ କ୍ୟାମ୍ପସ ଆସିଥିଲେ। ତେବେ ସେ ଗେଟ ଏରିଆରେ ରହିଥିଲେ। ଏହା ସତ୍ତ୍ୱେ ସମ୍ପୃକ୍ତ ରୋଷେୟାଙ୍କ ସହ ସମ୍ପର୍କରେ ଆସିଥିବା ସମ୍ପାବନାକୁ ଦୃଷ୍ଟିରେ ରଖି ୪-୫ ଜଣ ଲୋକଙ୍କୁ କ୍ୱାରେଣ୍ଟାଇନ୍ରେ ରଖାଯାଇଛି ବୋଲି ଅଧିକାରୀ ଜଣକ କହିଛନ୍ତି।