ନୂଆଦିଲ୍ଲୀ, ୧୨ା୮: ଭାରତର ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ରବିବାର ଚାଇନା ଗସ୍ତ କରିବା ସହ ବେଜିଂରେ ପହଞ୍ଚିଛନ୍ତି। ସେଠାରେ ସେ ଚାଇନା ପ୍ରତିପକ୍ଷ ଓ୍ବାଙ୍ଗ୍ ୟି ଓ ଅନ୍ୟ ବରିଷ୍ଠ ଅଧିକାରୀଙ୍କ ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିବାର କାର୍ଯ୍ୟକ୍ରମ ରହିଛି। ଭାରତ ସମ୍ବିଧାନର ଧାରା ୩୭୦ ଉଚ୍ଛେଦ ସହ ଜମ୍ମୁ-କଶ୍ମୀରକୁ ଦୁଇ ଭାଗ କରି ଦୁଇଟି କେନ୍ଦ୍ରଶାସିତ ଅଞ୍ଚଳରେ ପରିଣତ କରିବା ଘଟଣାକୁ ପାକିସ୍ତାନ ବିରୋଧ କରି ଚାଇନାର ଶରଣ ପଶିଥିଲାବେଳେ ଜୟଶଙ୍କରଙ୍କ ଚାଇନା ଗସ୍ତ ମହତ୍ୱପୂର୍ଣ୍ଣ ମନେହୁଏ। ଲଦାଖକୁ କେନ୍ଦ୍ରଶାସିତ ଅଞ୍ଚଳ ଭାବେ ଭାରତ ମାନ୍ୟତା ଦେଇଥିବାବେଳେ ଚାଇନା ଏହାକୁ ବିରୋଧ କରିଛି। ସୋମବାର ଜୟଶଙ୍କର ଚାଇନା ପ୍ରତିପକ୍ଷ ଓ୍ବାଙ୍ଗ୍ଙ୍କ ସହ ଏନେଇ ଆଲୋଚନା କରିପାରନ୍ତି ବୋଲି କୁହାଯାଉଛି। ଏଥିସହ ଅକ୍ଟୋବରରେ ଚାଇନା ରାଷ୍ଟ୍ରତି ଜିନ୍ପିଙ୍ଗଙ୍କ ଭାରତ ଗସ୍ତ ନେଇ ମଧ୍ୟ ଆଲୋଚନା କରାଯିବ। ଏହି ଦୁଇଦିନିଆ ଗସ୍ତ ଅବସରରେ ଜୟଶଙ୍କର-ଓ୍ବାଙ୍ଗ୍ଙ୍କ ମଧ୍ୟରେ ୪ଟି ରାଜିନାମା ସ୍ବାକ୍ଷରିତ ହେବ। ଦ୍ୱିପାକ୍ଷିକ ସମ୍ପର୍କ ବୃଦ୍ଧି, ସାଂସ୍କୃତିକ ଭାବ ବିନିମୟ, ବାଣିଜ୍ୟ ଓ ଅନ୍ୟ ଅନ୍ତର୍ଜାତୀୟ ପ୍ରସଙ୍ଗ ନେଇ ଆଲୋଚନା କରାଯିବ ବୋଲି ଜଣାପଡ଼ିଛି।
