ବାରିପଦା ଅଫିସ,୧୯।୮- ଆୟତନ ଓ ଜନସଂଖ୍ୟା ହିସାବରେ ମୟୂରଭଞ୍ଜ ରାଜ୍ୟର ସର୍ବ ବୃହତ। ଏହି ଜିଲାରେ ୨୬ ଟି ବ୍ଲକ ଥିବା ବେଳେ ଦୁଇଟି ପୌରାଞ୍ଚଳ (ବାରିପଦା ଓ ରାଇରଙ୍ଗପୁର) ଏବଂ ଦୁଇଟି ବିଜ୍ଞାପିତ ଅଞ୍ଚଳ (ଉଦଳା ଓ କରଞ୍ଜିଆ) ରହିଛି। ତେବେ ସମସ୍ତ ଭିତ୍ତିଭୂମି ଥିବା ସତ୍ତ୍ୱେ ବେତନଟୀ ଅଞ୍ଚଳର ଆଖିଦୃଶିଆ ବିକାଶ ହେଉ ନ ଥିବା ବିଭିନ୍ନ ସମୟରେ ଅଭିଯୋଗ ହୋଇଥାଏ। ଏଣୁ ଏହାକୁ ବିଜ୍ଞାପିତ ଅଞ୍ଚଳ ପରିଷଦ (ଏନଏସି) ଘୋଷଣା କରିବାକୁ ବହୁ ସଂଗଠନ ଓ ରାଜନୈତିକ ଦଳ ଦାବି କରିଆସୁଛନ୍ତି। ଏଥିପାଇଁ ବହୁ ଆନ୍ଦୋଳନ, ଗଣଧାରଣା ଓ ବିକ୍ଷୋଭ ମଧ୍ୟ ଅନୁଷ୍ଠିତ ହୋଇଛି। ଏଥିପାଇଁ ରାଜ୍ୟ ସରକାରଙ୍କୁ ବେତନଟୀବାସୀ ଦାୟୀ କରୁଥିବା ବେଳେ କିନ୍ତୁ ଜିଲା ପ୍ରଶାସନର ଖାମଖିଆଲି ମନୋଭାବ ଯୋଗୁଁ ଏହା ବିଜ୍ଞାପିତ ଅଞ୍ଚଳ ଭାବେ ଘୋଷଣା ହୋଇପାରିନାହିଁ। ଏନେଇ ଗତ ୨୮ ଜୁଲାଇରେ ‘ଧରିତ୍ରୀ’ରେ ‘ବେତନଟୀକୁ ବିଜ୍ଞାପିତ ଅଞ୍ଚଳ ଘୋଷଣା ନେଇ ଅନିଶ୍ଚିତତା, ୮ ବର୍ଷ ହେଲା ସରକାରଙ୍କୁ ତଥ୍ୟ ଦେଉନି ପ୍ରଶାସନ’ ଶୀର୍ଷକରେ ଏକ ତଥ୍ୟ ଭିତ୍ତିକ ସ୍ବତନ୍ତ୍ର ରିପୋର୍ଟ ପ୍ରକାଶ ପାଇଥିଲା। ତେବେ ଏହି ଘଟଣାରେ ବର୍ତ୍ତମାନ ଡିଷ୍ଟ୍ରିକ ଅର୍ବାନ ଡେଭଲପମେଣ୍ଟ ଏଜେନ୍ସି (ଡୁଡା) ଏନେଇ ତପତ୍ରତା ଦେଖାଇଛି। ଏହି ଏଜେନ୍ସିର ଚେୟାରମ୍ୟାନ ତଥା ଜିଲାପାଳ ବିନିତ ଭରଦ୍ୱାଜ ଚିଠି ନଂ.୫୯୧୩ (୬ା୮ା୨୦୧୯)ରେ ବେତନଟୀରେ ବିଜ୍ଞାପିତ ଅଞ୍ଚଳର ଗଠନ ହେବା ନେଇ ବାରିପଦା ଉପଜିଲାପାଳଙ୍କୁ ବିଭିନ୍ନ ସଦ୍ୟ ସଂଗୃହିତ ତଥ୍ୟ ଦେବାକୁ ନିର୍ଦ୍ଦେଶ ଦେଇଛନ୍ତି। ବେତନଟୀ ଅଞ୍ଚଳରୁ ବିଭିନ୍ନ କ୍ଷେତ୍ରରୁ ଆଦାୟ ହେଉଥିବା ରାଜସ୍ବ ସହିତ ବିଭିନ୍ନ ତଥ୍ୟ ମଗାଇଛନ୍ତି। ରାଜ୍ୟ ନଗର ଉନ୍ନୟନ ବିଭାଗର ଚିଠି ନଂ.୧୭୯୮୮ (୮ା୯ା୨୦୧୪) ଓ ଚିଠି ନଂ.୩୨୫୫୫ (୧୯ା୧୨ା୨୦୧୫) ଚିଠି ଆଧାରରେ ବିଭିନ୍ନ ତଥ୍ୟ ମାଗିଛନ୍ତି। ଏହା ସହିତ ଚିଠି ନଂ.୫୯୧୪ (୬ା୮ା୨୦୧୯)ରେ ବେତନଟୀ ବିଡିଓ ଓ ତହସିଲଦାରଙ୍କୁ ମଧ୍ୟ ନେଇ ସୂଚନା ପ୍ରଦାନ କରାଯାଇଛି। ଏହି ଖବର ଜଣାପଡିବା ପରେ ବେତନଟୀ ବିଜ୍ଞାପିତ ଅଞ୍ଚଳ ଗଠନ ହେବା ନେଇ ଆଶା ସଞ୍ଚାର ହୋଇଛି। ଉଲ୍ଲେଖ ଯୋଗ୍ୟ ଯେ, ବେତନଟୀ ଓ ସଠିଲୋ ପଞ୍ଚାୟତର କିଛିି ଗ୍ରାମକୁ ନେଇ ବିଜ୍ଞାପିତ ଅଞ୍ଚଳ ଘୋଷଣା କରିବାକୁ ସ୍ଥାନୀୟ ନିର୍ବାଚିତ ପ୍ରତିନିଧିମାନେ ପ୍ରସ୍ତାବ ଦେଇ ଦାବି କରିଥିଲେ। ପରେ ରାଜ୍ୟ ସରକାର ମୟୂରଭଞ୍ଜ ଜିଲାପାଳଙ୍କୁ ଏ ସମ୍ପର୍କରେ ତଥ୍ୟ ମାଗିଥିଲେ। ଏହାପରେ ଜିଲାପାଳଙ୍କ ନିର୍ଦ୍ଦେଶ ମୁତାବକ ବେତନଟୀ ତହସିଲଦାର ୨୦୧୧ ଫେବୃୟାରୀ ୨୨ ତାରିଖରେ ଚିଠି ନଂ.୨୪୪୪ରେ ବିସ୍ତୃତ ଭାବେ ତଥ୍ୟ ଦେଇଥିଲେ। ଇତି ମଧ୍ୟରେ ୮ ବର୍ଷ ହୋଇଯାଇଥିଲେ ମଧ୍ୟ ରିପୋର୍ଟ ରାଜ୍ୟ ସରକାରଙ୍କ ନିକଟକୁ ପଠାଯାଇ ନାହିଁ।
ଅନ୍ୟପକ୍ଷରେ ଗତ ୨୩ ତାରିଖରେ ବଡସାହି ବିଧାୟକ ସନାତନ ବିଜୁଳି ବିଧାନସଭାରେ ଏ ନେଇ ପ୍ରଶ୍ନ ପଚାରିଥିଲେ। ଏହାର ଉତ୍ତର ଦେଇ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ମନ୍ତ୍ରୀ ପ୍ରତାପ ଜେନା କହିଥିଲେ ଯେ, ଓଡ଼ିଶା ପୌର ଅଧିନିୟମ ୧୯୫୦ର ଧାରା ୪ ରେ ଥିବା ସର୍ତ୍ତ ଏବଂ ଆନୁସଙ୍ଗିକ ବିଷୟକୁ ବିଚାରକୁ ନେଇ ସରକାର ବିଜ୍ଞାପିତ ଅଞ୍ଚଳ ଘୋଷଣା କରିଥାନ୍ତି। ଉକ୍ତ ନିୟମ ଅନୁଯାୟୀ ବେତନଟୀକୁ ବିଜ୍ଞାପିତ ଅଞ୍ଚଳ ଗଠନ ସମ୍ବନ୍ଧୀୟ ବିଭିନ୍ନ ତଥ୍ୟ ମୟୂରଭଞ୍ଜ ଜିଲାପାଳଙ୍କୁ ମଗାଯାଇଥିବା ବେଳେ ଏହା ଏପର୍ଯ୍ୟନ୍ତ ସରକାରଙ୍କ ହସ୍ତଗତ ହୋଇନାହିଁ ବୋଲି କହିଥିଲେ। ଜିଲା ପ୍ରଶାସନର ଅବହେଳା କାରଣରୁ ବେତନଟୀ ବିଜ୍ଞାପିତ ଅଞ୍ଚଳ ହେବାରେ ବିଳମ୍ବିତ ହେଉଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି। ଏଣୁ ତୁରନ୍ତ ସମସ୍ତ ଆବଶ୍ୟକୀୟ ତଥ୍ୟ ରାଜ୍ୟ ସରକାରଙ୍କୁ ପ୍ରଦାନ କରିବାକୁ ଦାବି ହୋଇଛି।