ରୂପ୍ସା,୭।୧(ଡି.ଏନ.ଏ.)- ବାଲେଶ୍ୱର ଜିଲା ସଦର ବ୍ଲକ ସମେତ ବସ୍ତା, ବାଲିଆପାଳ ଓ ଭୋଗରାଇ ଆଦି ଅଞ୍ଚଳରେ ଅବାଧରେ ବେଆଇନ ଭାବେ କରତକଳ ଚାଲୁଥିବା ଅଭିଯୋଗ ହେଉଛି। ସ୍ଥାନୀୟ ଜଙ୍ଗଲରୁ ଗଛକଟା ଯାଇ କରତକଳରେ ଚିରାଯିବାପରେ ଅନ୍ୟତ୍ର ଚାଲାଣ କରାଯାଉଛି। ଏଭଳି ସ୍ଥିତିରେ ପ୍ରଶାସନ ଓ ବନବିଭାଗ ନୀରବଦ୍ରଷ୍ଟା ସାଜି ବସିଥିବା ଅଭିଯୋଗରେ ଦର୍ଶାଯାଇଛି। ଉଲ୍ଲେଖନୀୟ ଯେ, ଗତ ସେପ୍ଟେମ୍ବର ଓ ଅକ୍ଟୋବରରେ ବନବିଭାଗ ଜିଲାର ବିଭିନ୍ନ ସ୍ଥାନରେ ଥିବା କରତକଳ ଉପରେ ଚଢ଼ାଉ କରି କାଠ, ଯନ୍ତ୍ରାଂଶ ଆଦି ଜବତ କରିଥିଲା। ସଦର ଥାନା ପଦାଗାଁ, ବସ୍ତା ଥାନା ଧପାଖନ୍ଦ ଓ ପୋଡ଼ାପୋଡ଼ା ଗ୍ରାମ ନିକଟରେ ଥିବା ୩ କରତକଳ ଉପରେ ଚଢ଼ାଉ ହୋଇଥିଲା। ସେହିପରି ସଦର ଥାନା ଅଧୀନ ଅନନ୍ତପୁର ଓ ରୂପ୍ସା ଥାନା ଜାମୁନିଆ ଅଞ୍ଚଳର ୩ କରତକଳ ସମେତ ଭୋଗରାଇ ବ୍ଲକରେ ୪ଟି କରତକଳ ଉପରେ ଚଢ଼ାଉ କରାଯାଇଥିଲା। ଅନୁରୂପ ବାଲିଆପାଳ ବ୍ଲକରେ ମଧ୍ୟ ଧରପଗଡ଼ କରାଯାଇଥିଲା। ପରେ ବିଭାଗ ଏ ଦିଗରେ ଶିଥିଳତା ଅବଲମ୍ବନ କରିବାରୁ ବିଭିନ୍ନ ସ୍ଥାନରେ ପୁଣି ବେଆଇନ କରତକଳ ମୁଣ୍ଡ ଟେକିଥିବା ରୂପ୍ସାର ପରିବେଶପ୍ରେମୀ ରବୀନ୍ଦ୍ର କୁମାର ବେହେରା ଅଭିଯୋଗ କରିିଛନ୍ତି। ଏପରି କି ପରିକ୍ଷୀ, ରୂପ୍ସା, ଲଛମନଖୁଣ୍ଟା, ମଧୁପୁରା, ହଳଦୀପଦା ଆଦି ଅଞ୍ଚଳରେ ଏବେ ଅନେକ ବେଆଇନ କରତକଳ ଚାଲିଛି। ଏ ଦିଗରେ ପ୍ରଶାସନିକ ପଦକ୍ଷେପ ନିଆ ନ ଗଲେ ଜୋରଦାର ଆନ୍ଦୋଳନ କରାଯିବ ବୋଲି ବିଭିନ୍ନ ସଂଗଠନ ପକ୍ଷରୁ ଚେତାବନୀ ଦିଆଯାଇଛି। ଏ ସମ୍ପର୍କରେ ଚାନ୍ଦିପୁର ରେଞ୍ଜ ଅଫିସର କ୍ଷୀରାବ୍ଧତ୍ ପ୍ରଧାନଙ୍କୁ ପଚରାଯିବାରୁ ଅଭିଯୋଗ ମୁତାବକ ବେଆଇନ କରତକଳ ବନ୍ଦ ଦିଗରେ ନିଶ୍ଚୟ ବିଭାଗୀୟ ପଦକ୍ଷେପ ନିଆଯିବ ବୋଲି କହିଛନ୍ତି।