ଛତ୍ରପୁର,୧ା୧୧(ଡି.ଏନ.ଏ)- ଚଳିତବର୍ଷ ସେପ୍ଟେମ୍ବର ମାସ ସୁଦ୍ଧା ଗଞ୍ଜାମ ଜିଲାରେ ୨,୩୭୦ ଜଣଙ୍କ ଡ୍ରାଇଭିଂ ଲାଇସେନ୍ସ ରଦ୍ଦ କରାଯାଇଛି। ବେପାରୁଆ ଗାଡିଚାଳନା, ହେଲ୍ମେଟ୍ ନ ପିନ୍ଧି ଓ ମଦ୍ୟପାନ କରି ଗାଡି ଚଳାଇବା ଆଦି କାରଣରୁ ଏପରି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ପୋଲିସ ଓ ଆର୍ଟିଓଙ୍କ ନିଜସ୍ବ ରିପୋର୍ଟକୁ ଆଧାର କରି ଡ୍ରାଇଭିଂ ଲାଇସେନ୍ସ ରଦ୍ଦ କରାଯାଇଛି। ସେଥିମଧ୍ୟରେ ବେପାରୁଆ ଗାଡିଚାଳନା ଓ ଅନ୍ୟ କାରଣ ଯୋଗୁ ୧,୫୮୩ ଜଣଙ୍କ ଡ୍ରାଇଭିଂ ଲାଇସେନ୍ସ ରଦ୍ଦ ପାଇଁ ଆର୍ଟିଓଙ୍କୁ ପୋଲିସ ପକ୍ଷରୁ ସୁପାରିସ କରାଯାଇଥିଲା। ଆରଟିଓ କାର୍ଯ୍ୟାଳୟ ପକ୍ଷରୁ ଉପରୋକ୍ତ କାରଣରୁ ୭୮୭ ଜଣଙ୍କ ଡ୍ରାଇଭିଂ ଲାଇସେନ୍ସ ରଦ୍ଦ କରାଯାଇଥିଲା। ଜାନୁୟାରୀରେ ୧୬୯ ଜଣଙ୍କ ଡ୍ରାଇଭିଂ ଲାଇସେନ୍ସ ରଦ୍ଦ ହୋଇଥିବାବେଳେ ଫେବୃୟାରୀରେ ୨୬୧, ମାର୍ଚ୍ଚରେ ୨୬୫, ଏପ୍ରିଲରେ ୧୨୨, ମେ ମାସରେ ୨୦୬ ଜଣଙ୍କ ଡ୍ରାଇଭିଂ ଲାଇସେନ୍ସ ରଦ୍ଦ କରାଯାଇଛି। ସେହିପରି ଜୁନ୍ ମାସରେ ୩୬୧, ଜୁଲାଇରେ ୨୨୭, ଅଗଷ୍ଟରେ ୪୬୮, ସେପ୍ଟେମ୍ବର ମାସରେ ୨୯୧ ଜଣଙ୍କ ଡ୍ରାଇଭିଂ ଲାଇସେନ୍ସ ରଦ୍ଦ ହୋଇଛି। ଏଥିସହ ହେଲ୍ମେଟ୍ ନ ପିନ୍ଧି ଗାଡି ଚଳାଇ ଧରାପଡିଥିବା ଚାଳକଙ୍କଠାରୁ ଚଳିତବର୍ଷ ସେପ୍ଟେମ୍ବର ମାସ ଶେଷ ସୁଦ୍ଧା ୮୬ ଲକ୍ଷ ୩୮ ହଜାର ୫୦୦ ଟଙ୍କା ଜରିମାନା ଆଦାୟ ହୋଇଛି। ସେଥିମଧ୍ୟରେ ପୋଲିସ ପକ୍ଷରୁ ୬୪ ହଜାର ୪୦୯ ଜଣଙ୍କଠାରୁ ୮୩ ଲକ୍ଷ ୧୦୦ ଟଙ୍କା ଜରିମାନା ଆଦାୟ ହୋଇଥିବାବେଳେ ଆର୍ଟିଓ କାର୍ଯ୍ୟାଳୟ ପକ୍ଷରୁ ୮୧୪୮ ଜଣଙ୍କଠାରୁ ୩ ଲକ୍ଷ ୩୮ ହଜାର ୪୦୦ ଟଙ୍କା ଜରିମାନା ଆଦାୟ ହୋଇଛି। ଚଳିତବର୍ଷ ସେପ୍ଟେମ୍ବର ଶେଷ ସୁଦ୍ଧା ୩୧୪୪ ଗାଡି ଯାଞ୍ଚ ହୋଇଥିଲା। ସେଥିରୁ ୧୩୨୧ ଗାଡିର ବୀମା ପ୍ରମାଣପତ୍ର ନ ଥିଲା। ଏଥିଲାଗି ସେମାନଙ୍କଠାରୁ ୩ ଲକ୍ଷ ୩୮ ହଜାର ଟଙ୍କା ଜରିମାନା ଆଦାୟ କରାଯାଇଛି। ସୂଚନାଯୋଗ୍ୟ, ୨୦୧୮ରେ ୨,୦୦୧ ଜଣଙ୍କ ଡ୍ରାଇଭିଂ ଲାଇସେନ୍ସ ରଦ୍ଦ ହୋଇଥିଲା।