ନୂଆଦିଲ୍ଲୀ,୨୯-୪: ଆମେରିକା କମ୍ପାନୀ ଜନସନ ଆଣ୍ଡ ଜନସନ ନିଜର ଲୋକପ୍ରିୟ ବେବି ଶାମ୍ପୁରେ ହାନିକାରକ ପଦାର୍ଥ ଥିବା ଅଭିଯୋଗକୁ ଖଣ୍ଡନ କରିଛି। ରାଜସ୍ଥାନ ସରକାରଙ୍କ ଜୟପୁରସ୍ଥିତ ଔଷଧ ପରୀକ୍ଷଣ ପ୍ରୟୋଗଶାଳା କମ୍ପାନୀର ବେବି ଶାମ୍ପୁରେ ଫର୍ମାଲଡିହାଇଡ(କ୍ୟାନସରକାରକ) ମିଳିଥିବା ଅଭିଯୋଗ କରିଥିଲା। ଲାବରେଟୋରୀ ରିପୋର୍ଟକୁ ଭିତ୍ତି କରି ରାଷ୍ଟ୍ରୀୟ ଶିଶୁ ଅଧିକାର ସଂରକ୍ଷଣ ଆୟୋଗ(ଏନ୍ସିପିସିଆର୍) ସମସ୍ତ ରାଜ୍ୟସରକାର ଓ କେନ୍ଦ୍ର ଶାସିତ ପ୍ରଦେଶର ମୁଖ୍ୟ ଶାସନ ସଚିବଙ୍କ ନିକଟକୁ ପତ୍ର ଲେଖି ଜନସନ ଆଣ୍ଡ ଜନସନର ବେବି ଶାମ୍ପୁ ବିକ୍ରି ବନ୍ଦ କରିବାକୁ ନିର୍ଦ୍ଦେଶ ଦେଇଥିଲା। ଏଥିସହ ସମସ୍ତ ଷ୍ଟକ୍ ହଟାଇଦେବାକୁ କୁହାଯାଇଥିଲା। ତେବେ କମ୍ପାନୀକୁ ଶାମ୍ପୁ ବିକ୍ରି ରୋକିବା ଲାଗି କୁହାଯାଇ ନାହିଁ ବୋଲି ଏକ ବିବୃତି ଜାରି କରି କୁହାଯାଇଛି। ଉକ୍ତ ପ୍ରୟୋଗଶାଳା ରିପୋର୍ଟକୁ ମଧ୍ୟ ଏହା ଅସ୍ବୀକାର କରିଛି। ସୂଚନାଥାଉ କି, କମ୍ପାନୀର ୪ ହଜାର କୋଟି ଟଙ୍କାର ବେବି କେୟାର ବଜାରରେ ଭାରତରେ ପ୍ରାୟ ୭୫% ଅଂଶ ରହିଛି। କମ୍ପାନୀ ପକ୍ଷରୁ କୁହାଯାଇଛି ଯେ, ବେବି ଶାମ୍ପୁରେ ଫର୍ମାଲଡିହାଇଡ ବ୍ୟବହାର କରାଯାଏ ନାହିଁ। ଶାମ୍ପୁରେ ଏଭଳି କୌଣସି ରାସାୟନିକ ପଦାର୍ଥ ବ୍ୟବହାର କରାଯାଏ ନାହିଁ, ଯାହା ପରେ ଫର୍ମାଲଡିହାଇଡରେ ପରିବର୍ତ୍ତିତ ହୁଏ।