ୱାଶିଂଟନ,୭ା୬: କରୋନା ସଂକ୍ରମଣରେ ବିଶ୍ୱରେ ସର୍ବାଗ୍ରେ ରହିଛି ଆମେରିକା। ଏଠାରେ ଆକ୍ରାନ୍ତଙ୍କ ସଂଖ୍ୟା ୨୦ ଲକ୍ଷ ଛୁଇଁବାକୁ ବସିଥିବାବେଳେ ୧ ଲକ୍ଷ ୧୨ ହଜାର ଲୋକ ଆଖିବୁଜିଲେଣି। ହେଲେ ଭାରତ ଓ ଚାଇନାରେ ଯଦି ଅଧିକ ଟେଷ୍ଟ କରାଯାଏ ତା’ହେଲେ ଉଭୟ ଦେଶରେ କରୋନା ସଂକ୍ରମିତଙ୍କ ସଂଖ୍ୟା ଆମେରିକାଠାରୁ ବହୁ ଅଧିକ ହେବ। ଶୁକ୍ରବାର ମୈନ୍ସ୍ଥିତ ପୁରିଟାନ ମେଡିକାଲ ପ୍ରଡକ୍ଟ କାର୍ଯ୍ୟକ୍ରମରେ ଯୋଗଦେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏଭଳି କହିଛନ୍ତି। ତାଙ୍କ ମତରେ ଆମେରିକାରେ ୨ କୋଟି ଲୋକଙ୍କ କରୋନା ଯାଞ୍ଚ କରାଯାଇଛି, ଯାହାକି ଅନ୍ୟ ଦେଶ ତୁଳନାରେ ଅଧିକ। ଜର୍ମାନୀରେ ୪୦ ଲକ୍ଷ ଏବଂ ଦକ୍ଷିଣ କୋରିଆରେ ୩୦ ଲକ୍ଷ ଯାଞ୍ଚ କରାଯାଇଥିବା ସେ କହିଛନ୍ତି।
ଜନସଂଖ୍ୟା ଦୃଷ୍ଟିରୁ ଆମେରିକାର ସ୍ଥାନ ବିଶ୍ୱରେ ୩ୟରେ ଥିବାବେଳେ ଚାଇନା ଏବଂ ଭାରତର ସ୍ଥାନ ଯଥାକ୍ରମେ ପ୍ରଥମ ଓ ଦ୍ୱିତୀୟ। ଆମେରିକାର ଜନସଂଖ୍ୟା ୩୩ କୋଟିରୁ ଊର୍ଦ୍ଧ୍ୱ ଥିବାବେଳେ ଚାଇନାର ଜନସଂଖ୍ୟା ପ୍ରାୟ ୧୪୪ କୋଟି ଏବଂ ଭାରତର ଜନସଂଖ୍ୟା ହେଉଛି ପ୍ରାୟ ୧୩୮କୋଟି। ଚାଇନାରେ କରୋନା ସଂକ୍ରମିତଙ୍କ ସଂଖ୍ୟା ପ୍ରାୟ ୮୩ ହଜାର ହୋଇଥିବାବେଳେ ଭାରତରେ ୨ ଲକ୍ଷ ୪୦ ହଜାର ଟପିଲାଣି। ସ୍ବାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ ଭାରତରେ ଏପର୍ଯ୍ୟନ୍ତ ୪୦ ଲକ୍ଷରୁ ଊର୍ଦ୍ଧ୍ୱ ଟେଷ୍ଟ କରାଯାଇଛି। ଆମେରିକାବାସୀଙ୍କ ଉଦ୍ଦେଶ୍ୟରେ ସେ କହିଛନ୍ତି ଯେ, ଆମେରିକାରେ ଅଧିକ ସଂକ୍ରମଣ ମାମଲା ରହିଛି, କାରଣ ଏଠାରେ ଅଧିକ ଟେଷ୍ଟ କରାଯାଉଛି। ଭାରତ ଓ ଚାଇନା ଭଳି କେତେକ ଦେଶରେ ଯଦି ଅଧିକ ଟେଷ୍ଟ କରାଯାଏ ତା’ହେଲେ ସେଠାରେ ମଧ୍ୟ ବହୁ ସଂକ୍ରମଣ ମାମଲା ସାମ୍ନାକୁ ଆସିବା ନିଶ୍ଚିତ। ସେ ପୁରିଟାନ ମେଡିକାଲ ପ୍ରଡକ୍ଟକୁ ଉଚ୍ଚ ପ୍ରଶଂସା କରିଥିଲେ। ଉଚ୍ଚମାନର ମେଡିକାଲ ସ୍ବାବ୍ ଉତ୍ପାଦନ କରିବାରେ ପୁରିଟାନ ଶ୍ରେଷ୍ଠ କମ୍ପାନୀ ମଧ୍ୟରୁ ଅନ୍ୟତମ। ତ୍ୱରିତ ପରୀକ୍ଷଣ ପାଇଁ ଏହି ସ୍ବାବ୍ ଗୁରୁତ୍ୱପୂର୍ଣ୍ଣ। ଟେଷ୍ଟିଂ କ୍ଷମତା ବୃଦ୍ଧି ଯୋଗୁ ଆମେରିକା ଲକ୍ଡାଉନରୁ ମୁକ୍ତ ହେବାରେ ଲାଗିଛି ଏବଂ ଦେଶର ଅର୍ଥନୀତି ସୁଧରିବାରେ ଲାଗିଛି।
ଆମେ ଭୟକୁ ବାସ୍ତବରେ ପରିଣତ କରିବାକୁ ଦେଇନାହୁଁ। ଆମେରିକା ଇତିହାସରେ ମାସିକ ଚାକିରିରେ ପ୍ରାୟ ଦୁଇଗୁଣ ବୃଦ୍ଧି ଘଟିଛି ବୋଲି ଟ୍ରମ୍ପ୍ କହିଛନ୍ତି। ସେ ନଭେମ୍ବର ୩ରେ ହେବାକୁ ଥିବା ରାଷ୍ଟପ୍ରତି ନିର୍ବାଚନ ପ୍ରସଙ୍ଗ ମଧ୍ୟ ଉଠାଇଛନ୍ତି। ସୂଚନାଥାଉ କି ଟ୍ରମ୍ପ ଦ୍ୱିତୀୟ ଥର ପାଇଁ ରାଷ୍ଟ୍ରପତି ହେବାକୁ ଚେଷ୍ଟା କରୁଥିବାବେଳେ ତାଙ୍କ ପ୍ରତିଦ୍ୱନ୍ଦ୍ୱୀ ତଥା ଡେମୋକ୍ରାଟିକ୍ ପ୍ରାର୍ଥୀ ଜୋ ବିଡେନ ବିଜୟୀ ହେବା ନେଇ ଏକାଧିକ ଜନମତ ସର୍ଭେ ଭବିଷ୍ୟବାଣୀ କରୁଛନ୍ତି। ହେଲେ ଟ୍ରମ୍ପ କହିଛନ୍ତି ଯେ, ଏହା ଏକ ଗୁରୁତ୍ୱପୂର୍ଣ୍ଣ ନିର୍ବାଚନ। ଭୁଲ୍ ରାଷ୍ଟ୍ରପତି ଚୟନ କରାଗଲେ ସେ ଟିକସ ବଢ଼ାଇବେ ଏବଂ ସୀମା ଖୋଲିଦେବେ। ଫଳରେ ସମସ୍ତେ ଆମ ଦେଶରେ ପ୍ରବେଶ କରିବେ।