ଦୋହା,୩୦।୯: ବିଶ୍ୱ ଆଥ୍ଲେଟିକ୍ସ ଚାମ୍ପିୟନଶିପ ଇତିହାସରେ ସଫଳତମ ଆଥ୍ଲେଟ କିମ୍ବଦନ୍ତୀ ଉସେନ ବୋଲ୍ଟଙ୍କୁ ପଛରେ ପକାଇଛନ୍ତି ଆମେରିକାର ମହିଳା ଧାବକ ଏଲିସନ ଫେଲିକ୍ସ। ସେ ଚଳିତ ବିଶ୍ୱ ଚାମ୍ପିୟନଶିପରେ ମିକ୍ସଡ୍ ୪ ଗୁଣା ୪୦୦ ମିଟର ରିଲେ ଇଭେଣ୍ଟରେ ଆମେରିକାକୁ ସ୍ବର୍ଣ୍ଣ ପଦକ ଜିତାଇଛନ୍ତି। ଏହି ଇଭେଣ୍ଟକୁ ଆମେରିକା ୩ ମିନିଟ୍ ୯.୩୪ ସେକେଣ୍ଡରେ ଶେଷ କରି ଶୀର୍ଷ ସ୍ଥାନ ହାସଲ କରିଥିଲା। ଫେଲିକ୍ସ ୧୦ ମାସ ତଳେ ମାତୃତ୍ୱ ଲାଭ କରିଥିଲେ। ତାଙ୍କ ବିଶ୍ୱ ଚାମ୍ପିୟନଶିପ୍ କ୍ୟାରିୟରର ସ୍ବର୍ଣ୍ଣ ପଦକ ସଂଖ୍ୟା ୧୨ରେ ପହଞ୍ଚତ୍ଛି। ୩୩ ବର୍ଷୀୟ ଆଥ୍ଲେଟ ବିଶ୍ୱ ଚାମ୍ପିୟନଶିପ୍ର ୨୦୦ ମି., ୪୦୦ ମି., ୪ ଗୁଣା ୧୦୦ ମି., ୪ ଗୁଣା ୪୦୦ ମି. ଓ ମିକ୍ସଡ୍ ୪ ଗୁଣା ୪୦୦ ମି.ରେ ୧୨ ସ୍ବର୍ଣ୍ଣ ଜିତିଛନ୍ତି। ଏହା ଜାମାଇକାର ବୋଲ୍ଟଙ୍କଠାରୁ ଗୋଟିଏ ଅଧିକ। ବୋଲ୍ଟ ଶେଷ ଥର ପାଇଁ ୨୦୧୭ ସଂସ୍କରଣରେ ଟ୍ରାକକୁ ଓହ୍ଲାଇଥିଲେ। ଏ ନେଇ ଫେଲିକ୍ସଙ୍କୁ ଆଇଏଏଫ୍ ପକ୍ଷରୁ ଶୁଭେଚ୍ଛା ଦିଆଯାଇଛି। ଉଲ୍ଲେଖଥାଉ କି, ୪ଥର ଅଲିମ୍ପିଆନ ଗତ ନଭେମ୍ବରରେ କନ୍ୟା ସନ୍ତାନ ମା’ ହୋଇଥିଲେ।