ରଣପୁର, ୯ା୩(ସ୍ବ.ପ୍ର.): ଦେଶବ୍ୟାପୀ ଅନ୍ତର୍ଜାତୀୟ ମହିଳା ଦିବସ ପାଳନ କରାଯାଇ ନାରୀ ସୁରକ୍ଷା ଓ ଅଧିକାର ଉପରେ ସଚେତନତା କାର୍ଯ୍ୟକ୍ରମ କରାଯାଉଥିବା ବେଳେ ନୟାଗଡ଼ ଜିଲା ରଣପୁର ଅଞ୍ଚଳରେ ସୋମବାର ଏହାର ବିପରୀତ ଘଟଣା ଦେଖିବାକୁ ମିଳିଛି l ଜଣେ ବୋହୂଙ୍କୁ ତାଙ୍କ ଶାଶୁ ଶାରୀରିକ ନିିର୍ଯାତନା ଦେଉଥିବାବେଳେ ପୋଲିସର ନିଷ୍କ୍ରିୟତା ପ୍ରତିବାଦରେ ଗ୍ରାମର ମହିଳାମାନେ ସକାଳ ୧୦ଟାରୁ ରଣପୁର ଥାନା ଘେରାଉ କରିଥିଲେ। ଘଟଣାରୁ ପ୍ରକାଶ ଯେ, ରଣପୁର ନିକଟ ରଘୁନାଥପୁର ଗ୍ରାମର ଅଜୟ ବିଶ୍ୱାଳ ନିରାକାରପୁର ଥାନା ସାମନ୍ତରାପୁର ଗ୍ରାମର ଭାଗୀରଥି ସାମନ୍ତରାୟଙ୍କ ଝିଅ ଟିକିନା ବିଶ୍ୱାଳଙ୍କୁ ୪ବର୍ଷ ତଳେ ବିବାହ କରିଥିଲେ l ବିବାହର କିଛିଦିନ ଭଲରେ କଟିବା ପରେ ଅଧିକ ଯୌତୁକ ପାଇଁ ଟିକିନାଙ୍କ ଉପରେ ଶାଶୁଘର ଲୋକେ ନିର୍ଯାତନା ଦେବା ଆରମ୍ଭ କରିଥିଲେ। ଏପରି କି ଗାଳିଗୁଲଜ ସହ ମାଡ଼ ମାରୁଥିବା ଅଭିଯୋଗ କରାଯାଇଛି। ଏପରିସ୍ଥଳେ ସୋମବାର ସକାଳୁ ଟିକିନାଙ୍କୁ ତାଙ୍କ ଶାଶୁ ଠେଙ୍ଗାରେ ପିଟୁଥିବା ଦେଖି ଗ୍ରାମର ମହିଳାମାନେ ପହଞ୍ଚତ୍ଥିଲେ। ସେମାନେ ଟିକିନାଙ୍କୁ ଉଦ୍ଧାର କରି ରଣପୁର ଥାନାକୁ ଆଣିଥିଲେ l ଥାନାରେ ଅଭିଯୋଗ ପରେ ସେମାନେ ଟିକିନାଙ୍କୁ ନ୍ୟାୟ ଦେବାକୁ ଦାବି କରିଥିଲେ। ହେଲେ ପୋଲିସ ପକ୍ଷରୁ କୌଣସି ତତ୍ପରତା ପ୍ରକାଶ ନ ପାଇବାରୁ ସେମାନେ ଥାନା ଘେରାଉ କରିବାକୁ ବାଧ୍ୟ ହୋଇଥିବା ପ୍ରକାଶ କରିଥିଲେ।