ବୌଦ୍ଧ, ୪।୭(ସ୍ବ.ପ୍ର): ବୌଦ୍ଧର ରଥଯାତ୍ରା ଗୁରୁବାର ସମ୍ପନ୍ନ ହୋଇଛି । ସକାଳେ ପ୍ରଥମେ ସୁଦର୍ଶନଙ୍କୁ ରଥାଋଢ କରିବା ପରେ ପହଣ୍ଡି ହୋଇଥିଲା। ତିନି ଠାକୁର ଗୋଟି ପହଣ୍ଡିରେ ଯାଇ ରଥାଋଢ ହୋଇଥିଲେ । ଗୋଟି ପହଣ୍ଡି ଯୋଗୁ ଭକ୍ତମାନେ ତିନି ଠାକୁରଙ୍କୁ ବାଟ ଭୋଗ କରିଥିଲେ । ରଥଖଳାରେ ଶ୍ରୀ ଜିଉମାନେ ପହଞ୍ଚତ୍ବା ପରେ ଚାରିବେଢା ରଥ ପରିକ୍ରମା କରାଇ ଅପରାହ୍ନରେ ରଥ ଉପରକୁ ମହାପ୍ରଭୁଙ୍କୁ ବିଜେ କରାଯାଇଥିଲା । ପରେ ଛୁଆମାନଙ୍କୁ ରଥ ଛୁଆଁ ଯାଇଥିଲା । ରଥ ଉପରେ ଗଡଜାତ ରାଜାଙ୍କ ସ୍ବତ୍ତ୍ୱାଧିକାରୀ ଦେବେନ୍ଦ୍ର ପ୍ରସାଦ ଦେବଙ୍କ ଦ୍ୱାରା ଛେରାପହଁରା ସରିବା ପରେ ରଥଟଣା ହୋଇଥିଲା ା ସେହିପରି ସହରର ପୋଡାପଡା ହରିଗୁଢି ରଥରେ ମଧ୍ୟ ପାରମ୍ପରିକ ରୀତିରେ ଠାକୁରମାନଙ୍କୁ ରଥାଋଢ କରାଯାଇଥିଲା। ଏହି ରଥକୁ କେବଳ ମହିଳା ଭକ୍ତମାନେ ଟାଣିଥିଲେ। ଉଭୟ ରଥ ଆଗ ପଛ ହୋଇ ଗୋଟିଏ ଜାଗାରେ ଥିବା ମାଉସୀ ମା’ ମନ୍ଦିରକୁ ଯାଇଥିଲେ । ସେଠାରେ ପହଣ୍ଡି କରି ମାଉସୀ ମା’ ଘରେ ମହାପ୍ରଭୁଙ୍କୁ ବିଜେ କରାଯାଇଥିଲା । ଜିଲାପାଳ ଲଲାଟେନ୍ଦୁ ମିଶ୍ର, ଅତିରିକ୍ତ ଜିଲାପାଳ ରମାକାନ୍ତ ସେଠୀ, ଉପ ଜିଲାପାଳ ଏନସି ଜ୍ୟୋତି ରଞ୍ଜନ ନାୟକ, ଜିଲା ଓକିଲ ସଂଘ ସଭାପତି ତାରେଣୀ ମହାପାତ୍ର, ଓକିଲ ନାରାୟଣ ପରିଜା , ଶିବ ପ୍ରସାଦ ମିଶ୍ର, ପୂର୍ତ୍ତ ବିଭାଗ ସହକାରୀ ଯନ୍ତ୍ରୀ ସୁନ୍ଦର ମାଧବ ପାଢୀ ଏବଂ ସମସ୍ତ ଅଧିକାରୀଙ୍କ ତତ୍ତ୍ୱାବଧାନରେ ଶାନ୍ତି ଶୃଙ୍ଖଳା ସହ ରଥଯାତ୍ରା ସମାପନ ହୋଇଥିଲା। ଆଇନଶୃଙ୍ଖଳା ପାଇଁ ବୌଦ୍ଧ ପୋଲିସ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଥିଲା। ଏସଡିପିଓ ସାଲେଷ୍ଟିନ ଟିଗା, ଥାନା ଅଧିକାରୀ ତପସ୍ବିନୀ କହଁରଙ୍କ ସମେତ ବରିଷ୍ଠ ପୋଲିସ ଅଧିକାରୀମାନେ ସୁରକ୍ଷା ଦାୟିତ୍ୱ ତଦାରଖ କରିଥିଲେ । ସୂଚନା ଓ ଲୋକସଂପର୍କ ବିଭାଗ ସହଯୋଗରେ ଧାରା ବିବରଣୀ କେନ୍ଦ୍ର ଖୋଲାଯାଇ ଶ୍ରୀଜଗନ୍ନାଥଙ୍କ କଥାମୃତକୁ ପ୍ରସାରଣ କରାଯାଇଥିଲା। ସେହିପରି ଜିଲା ସ୍ବାସ୍ଥ୍ୟ ଓ ପାନୀୟଜଳ ବିଭାଗ ପକ୍ଷରୁ ଲୋକଙ୍କୁ ସେବା ଯୋଗାଇ ଦିଆଯାଇଥିଲା। ପାଗ ଅନୁକୁଳ ଥିବାରୁ ଲକ୍ଷାଧିକ ଭକ୍ତଙ୍କ ସମାଗମ ହୋଇଥିଲା ।