ବୌଦ୍ଧ,୪ା୬ (ସ୍ବ.ପ୍ର.)-କରୋନା ମହାମାରୀର ପ୍ରଭାବ ଚଳିତବର୍ଷ ଶ୍ରୀଜଗନ୍ନାଥଙ୍କ ସ୍ନାନଯାତ୍ରା ଉପରେ ପଡିଛି। ଏଥର ବୌଦ୍ଧରେ ଗଡଜାତ ଅମଳରୁ ଚାଲି ଆସୁଥିବା ପରମ୍ପରା ଭଙ୍ଗ କରାଯାଇ ଶ୍ରୀଜଗନ୍ନାଥଙ୍କ ସ୍ନାନଯାତ୍ରାରେ କୌଣସି ଭକ୍ତଙ୍କୁ ସାମିଲ କରା ନ ଯିବାକୁ ପ୍ରଶାସନ ପକ୍ଷରୁ ନିଷ୍ପତ୍ତି ଗ୍ରହଣ କରାଯାଇଛି। ଜିଲାପାଳ ଲଲାଟେନ୍ଦୁ ମିଶ୍ର ଓ ଦେବତ୍ତୋର ଅଧିକାରୀ ତଥା ଉପଜିଲାପାଳ ଏନସି ଜ୍ୟୋତିରଞ୍ଜନ ନାଏକଙ୍କ ଉପସ୍ଥିତିରେ ବ୍ରାହ୍ମଣ ସମାଜର କର୍ମକର୍ତ୍ତାଙ୍କ ସହିତ ଏ ନେଇ ଗତ ଆଲୋଚନା କରାଯାଇଥିଲା ା ଏହି ସମୟରେ ପ୍ରଶାସନ ପକ୍ଷରୁ ମାତ୍ର ୨୫ ଜଣ ସେବାୟତ ସାମିଲ ହୋଇ ସ୍ନାନଯାତ୍ରା ପାଳନ କରାଯିବାକୁ ସ୍ଥିର ହୋଇଛି। ଏଥିସହିତ ଏଥର ଠାକୁରଙ୍କ ସ୍ନାନଯାତ୍ରାରେ ସ୍ବଳ୍ପ ସଂଖ୍ୟକ ସେବାୟତଙ୍କୁ ସାମିଲ କରାଯିବା ସହିତ ୧୦ ବର୍ଷରୁ କମ୍ ଓ ୬୫ବର୍ଷରୁ ଊର୍ଦ୍ଧ୍ୱ ସେବାୟତଙ୍କୁ ସାମିଲ ନ ହେବା ପାଇଁ ପ୍ରଶାସନ ପକ୍ଷରୁ ବାରଣ କରାଯାଇଛି। ଠାକୁରମାନଙ୍କ ସ୍ନାନଯାତ୍ରା କେବଳ ଔପଚାରିକ ପୂଜାପଦ୍ଧତି ମଧ୍ୟରେ କରାଯାଇ ଶେଷ କରିବାକୁ ପରାମର୍ଶ ଦିଆଯାଇଛି। ସ୍ନାନଯାତ୍ରା ଦିନ ତିନି ଠାକୁରଙ୍କୁ ଭକ୍ତମାନେ ସ୍ନାନବେଦୀରେ ଗଜବେଶରେ ଦର୍ଶନ ପାଇଥାନ୍ତି। ଚଳିତବର୍ଷ ମନ୍ଦିରକୁ ଭକ୍ତମାନେ ଆସିବା ନେଇ ପୂର୍ବରୁ କଟକଣା ଜାରି କରାଯାଇ ଥିବା ବେଳେ ସ୍ନାନଯାତ୍ରାରେ ଗଜବେଶରେ ମଧ୍ୟ ଦର୍ଶନ ମିଳିବାର ସମ୍ଭାବନା ନାହିଁ। ସେହିପରି ବୌଦ୍ଧରେ ଶ୍ରୀଜଗନ୍ନାଥଙ୍କ ରଥଯାତ୍ରା ପାଳନ ହେବା ନେଇ ଆଶଙ୍କା ପ୍ରକାଶ ପାଇଛି। ସୂଚନାଯୋଗ୍ୟ ଯେ, ବିଶ୍ୱପ୍ରସିଦ୍ଧ ପୁରୀ ରଥଯାତ୍ରା ପରେ ବୌଦ୍ଧ ଗଡଜାତର ରଥଯାତ୍ରାର ପ୍ରସିଦ୍ଧି ରହିଛି।