କୌଣସି ଶୁଭ କାମ ପୂର୍ବରୁ ଗଣେଶଙ୍କୁ ଆରାଧନା କରାଯାଏ। ସମସ୍ତ ଦେବତାଙ୍କଠାରୁ ଗଣେଶଙ୍କ ସ୍ଥାନ ସର୍ବାଗ୍ରେ। ପୌରାଣିକ କଥା ଅନୁସାରେ, ଗଣେଶ ଆଜୀବନ ବ୍ରହ୍ମଚାରୀ ରହିବାକୁ ଚାହୁଁଥିଲେ। କିନ୍ତୁ ଦିନେ ତାଙ୍କର ବିବାହ ନ କରିବା ସଂକଳ୍ପ ଭାଙ୍ଗିଗଲା ଏବଂ ରିଦ୍ଧି, ସିଦ୍ଧିଙ୍କ ସହ ବିବାହ ହେଲା। ଆସନ୍ତୁ ଜାଣିବା ଗଣେଶଙ୍କ ବିବାହ ସମ୍ପର୍କିତ କିଛି ବିଶେଷ କଥା।
ଗଣେଶ ନିଜ ଶରୀରକୁ ନେଇ ସବୁବେଳେ ଚିନ୍ତାଗ୍ରସ୍ତ ରହୁଥିଲେ। ହାତୀ ପରି ମୁହଁ ଏବଂ ବଡ଼ ପେଟ ଯୋଗୁ ଗଣେଶଙ୍କୁ କିଏ ବିବାହ କରିବ ବୋଲି ଭାବୁଥିଲେ। ତାଙ୍କ ବିବାହ ଯଦି ନ ହେବ ତେବେ ସେ କାହାର ବିବାହ କରାଇ ଦେବେ ନାହିଁ ବୋଲି ସଂକଳ୍ପ ନେଇଥିଲେ। ସେଥିପାଇଁ ଯେଉଁ ଦେବତାଙ୍କ ବିବାହ ହେଉଥିଲା ସେଠାକୁ ଯାଇ ବିଘ୍ନ ଘଟାଉଥିଲେ। ଗଣେଶଙ୍କ ଏପରି ବ୍ୟବହାରରେ ଅନ୍ୟ ଦେବତାମାନେ ଚିନ୍ତାରେ ପଡ଼ିଗଲେ। ସେମାନେ ବୁଝିପାରିଲେନି ଯେ, କ’ଣ କରିବାକୁ ପଡ଼ିବ। ଦେବତାମାନେ ବ୍ରହ୍ମାଙ୍କ ନିକଟକୁ ଯାଇ ଏ ସମସ୍ତ କଥା କହିଥିଲେ।
ଏହା ପରେ ବ୍ରହ୍ମା ନିଜର ମାନସ କନ୍ୟା ରିଦ୍ଧି ଏବଂ ସିଦ୍ଧିଙ୍କୁ ନେଇ ଗଣେଶଙ୍କ ନିକଟକୁ ଯାଇଥିଲେ ଏବଂ ତାଙ୍କୁ ପଢ଼ାଇବା ପାଇଁ କହିଥିଲେ। ଯେତେବେଳେ ଗଣେଶଙ୍କ ନିକଟକୁ ବିବାହ ଖବର ଆସୁଥିଲା,ରିଦ୍ଧି ସିଦ୍ଧି ତାଙ୍କ ଧ୍ୟାନ ଅନ୍ୟ କେଉଁ ଆଡ଼େ ଲଗାଇ ଦେଉଥିଲେ। ଦିନେ ଗଣେଶ ଜାଣିବାକୁ ପାଇଲେ ବିନା ବାଧାରେ ଦେବତାଙ୍କ ବିବାହ ଖୁବ୍ ଭଲରେ ସମ୍ପନ୍ନ ହୋଇଯାଉଛି। ଏଥିରେ ସେ ରାଗି ଯାଇଥିଲେ। ଏହା ଜାଣି ବ୍ରହ୍ମା ଗଣେଶଙ୍କ ନିକଟକୁ ଆସି ରିଦ୍ଧି, ସିଦ୍ଧିଙ୍କ ବିବାହ ପ୍ରସ୍ତାବ ତାଙ୍କୁ ଦେଇଥିଲେ। ଗଣେଶ ଖୁସିରେ ଏହି ପ୍ରସ୍ତାବରେ ରାଜି ହୋଇଯାଇଥିଲେ। ଶେଷରେ ଗଣେଶଙ୍କ ସହିତ ରିଦ୍ଧି ସିଦ୍ଧିଙ୍କ ବିବାହ ଖୁବ୍ ଧୂମ୍ଧାମରେ ସମ୍ପନ୍ନ ହୋଇଥିଲା।
