ବ୍ରହ୍ମପୁର ଅଫିସ,୮ା୫- ଲକ୍ଡାଉନ୍ ପରେ ବ୍ରହ୍ମପୁରର ବିଭିନ୍ନ ସ୍ଥାନରେ ରହିଯାଇଥିବା ୩୮ ଜଣ ଶ୍ରମିକଙ୍କୁ ଶୁକ୍ରବାର ରାତିରେ ଏକ ବସ୍ ଯୋଗେ ପଶ୍ଚିମବଙ୍ଗ ପଠାଯାଇଛି। ବିଏମ୍ସି ଓ ପୋଲିସ ପ୍ରଶାସନର ସହଯୋଗରେ ଏକ ବସ୍ ଏମାନଙ୍କୁ ନେଇ ପଶ୍ଚିମବଙ୍ଗ ମାଲଦା ଅଭିମୁଖେ ବାହାରିଥିଲା। ବିଏମ୍ସିର ଏନ୍ୟୁଏଲ୍ଏମ୍ର ମ୍ୟାନେଜର ନାସିର ଅଲ୍ଲୀ, ରାଜୀବ ମିଶ୍ର, ବ୍ରହ୍ମପୁର ଏସ୍ଡିପିଓ ବିଷ୍ଣୁପ୍ରସଦ ପତି ପ୍ରମୁଖ ଏହି ଅବସରରେ ଉପସ୍ଥିତ ଥିଲେ।
ସୂଚନା ପ୍ରକାରେ, ପ୍ରଥମ ପର୍ଯ୍ୟାୟ ଲକ୍ଡାଉନରେ କେରଳରୁ ଆସି ୨୮ ଜଣ ଶ୍ରମିକ ବ୍ରହ୍ମପୁରରେ ଅଟକି ରହିଥିଲେ। ସେମାନଙ୍କ ମଧ୍ୟରେ ୨ ଜଣ ବିହାରର ଥିବା ବେଳେ ଅନ୍ୟ ୨୬ ଜଣ ପଶ୍ଚିମବଙ୍ଗ ମାଲଦା ଅଞ୍ଚଳର। ସେମାନଙ୍କୁ ବିଏମସିର ଆଶ୍ରୟ କେନ୍ଦ୍ରରେ କ୍ୱାରାଣ୍ଟାଇନରେ ରଖାଯାଇ ଖାଇବା ପିଇବା ବ୍ୟବସ୍ଥା କରାଯାଇଥିଲା। କ୍ୱାରାଣ୍ଟାଇନ ଅବଧି ସରିଥିବାବେଳେ ସେମାନଙ୍କ ସ୍ବାସ୍ଥ୍ୟବସ୍ଥା ଯାଞ୍ଚ କରାଯାଇ ପ୍ରାୟ ଦେଢମାସ ପରେ ବସ୍ ଯୋଗେ ଘର ଅଭିମୁଖେ ପଠାଯାଇଛି। ଏଥିସହ ସହରର ବିଭିନ୍ନ ସ୍ଥାନରେ ଅଟକିଥିବା ଅନ୍ୟ ୧୦ ଜଣଙ୍କୁ ମଧ୍ୟ ଉକ୍ତ ବସ୍ ଯୋଗେ ପଠାଯାଇଥିବା ସୂଚନା ମିଳିଛି।