ବ୍ରହ୍ମପୁର ଅଫିସ୍,୯ା୧୨-ଖୁବ୍ କମ୍ ବୟସରୁ ଦୃଷ୍ଟିଶକ୍ତି ହରାଇଥିଲେ ସୌମ୍ୟା। ଜୀବନ ଯେମିତି ଅନ୍ଧକାର ଆଡ଼କୁ ଠେଲି ହୋଇଯାଇଥିଲା। ତେବେ ସୌମାଙ୍କ ଅନ୍ଧାର ଜୀବନ ମଧ୍ୟରେ ଆଲୋକ ଭରିଦେବାକୁ ମିଳିଯାଇଛନ୍ତି ଜଣେ ଜୀବନ ସାଥୀ। ରବିବାର ବ୍ରହ୍ମପୁରର ଏକ କଲ୍ୟାଣ ମଣ୍ଡପରେ ସୌମ୍ୟାଙ୍କ ହାତ ଧରିଛନ୍ତି ଆନ୍ଧ୍ରପ୍ରଦେଶର ମଦନ ମୋହନ। ଏହି ଆଦର୍ଶ ବିବାହକୁ ନେଇ ବ୍ରହ୍ମପୁରରେ ଚର୍ଚ୍ଚା ଲାଗିରହିଛି ।
ବ୍ରହ୍ମପୁର ସହର ଗେଟ୍ବଜାର ରାଧାକ୍ରିଷ୍ଣ ସାହିର ଜି.ଏଲ୍.ଏନ୍. ସ୍ବାମୀ ଶେଖରଙ୍କ ୨ ଝିଅ ଏବଂ ଗୋଟିଏ ପୁଅ। ସାନଝିଅ ସୌମ୍ୟା ୧୪ ବର୍ଷ ବୟସରେ ମସ୍ତିଷ୍କ ମ୍ୟାଲେରିଆରେ ଆକ୍ରାନ୍ତ ହୋଇଥିଲେ। ରୋଗ ଭଲ ହେଲା, କିନ୍ତୁ ଧୀରେ ଧୀରେ ସେ ଦୃଷ୍ଟିଶକ୍ତି ହରାଇବାରେ ଲାଗିଲେ। ଏକ ଘରୋଇ କମ୍ପାନୀରେ କାମ କରୁଥିବା ଶେଖର ନିଜ ଆର୍ଥିକ କ୍ଷମତା ଅନୁଯାୟୀ ଝିଅର ଚିକିତ୍ସା କରାଇଲେ। ହେଲେ ସୁଫଳ ମିଳିଲାନି । ଶତପ୍ରତିଶତ ଦୃଷ୍ଟିବାଧିତ ହୋଇଗଲେ ସୌମ୍ୟା। ଝିଅର ବିବାହ ଯୋଗ୍ୟ ବୟସ ହେବାରୁ ଶେଖର ଚିନ୍ତିତ ଥିଲେ। ଆନ୍ଧ୍ରପ୍ରଦେଶର ବିଜୟାନଗରମ୍ରେ ରହୁଥିବା ଜଣେ ସମ୍ପର୍କୀୟ ମଦନଙ୍କ ସମ୍ପର୍କରେ ଶେଖରଙ୍କୁ କହିଥିଲେ। ଆନ୍ଧ୍ରପ୍ରଦେଶ ତିରୁପତିର ଜି.ଭେଙ୍କଟ ସୀମାଦ୍ରୀଙ୍କ ପୁଅ ମଦନ ତିରୁମାଲା ମନ୍ଦିରରେ ଭକ୍ତଙ୍କୁ ମାଗଣାରେ ଖାଦ୍ୟ ଦିଆଯାଉଥିବା କ୍ୟାଣ୍ଟିନ୍ରେ କାମ କରନ୍ତି। ସମ୍ପୃକ୍ତ ସମ୍ପର୍କୀୟଙ୍କ ଜରିଆରେ ସୌମା ଓ ମଦନଙ୍କ ବିବାହ ସମ୍ପର୍କରେ ଶେଖର ଏବଂ ସୀମାଦ୍ରୀ କଥା ହୋଇଥିଲେ। ମଦନଙ୍କୁ ସୌମ୍ୟାଙ୍କ ଦୃଷ୍ଟିହୀନତା ସମ୍ପର୍କରେ କୁହାଯାଇଥିଲା। ଏହାକୁ ଅତି ସକରାମତ୍କ ଭାବେ ଗ୍ରହଣକରି ମଦନ ବିବାହ ପାଇଁ ରାଜି ହୋଇଯାଇଥିଲେ। ରବିବାର ଉଭୟ ପରିବାରର ବନ୍ଧୁବାନ୍ଧବଙ୍କ ଉପସ୍ଥିତିରେ ବିବାହ ସମ୍ପନ୍ନ ହୋଇଛି। ବିନା ଯୌତୁକରେ ଏହି ଆଦର୍ଶ ବିବାହକୁ ସମସ୍ତେ ପ୍ରଶଂସା କରୁଛନ୍ତି ।
ନିଜ ବିବାହକୁ ନେଇ ଆଶଙ୍କାରେ ଥିବା ସୌମାଙ୍କ ସ୍ବପ୍ନ ପୂରଣ ହେଲା ବୋଲି ସେ କହିଛନ୍ତି । ସେହିପରି ମଦନ ଓ ତାଙ୍କ ବାପାଙ୍କୁ ପ୍ରଶଂସା କରିବା ପାଇଁ ପାଖରେ କୌଣସି ଶବ୍ଦ ନାହିଁ ବୋଲି ସୌମ୍ୟାଙ୍କ ବାପା ଶେଖର କହିଛନ୍ତି। ଭେଙ୍କେଟେଶ୍ୱର ସ୍ବାମୀଙ୍କ ଆଶୀର୍ବାଦ ଯୋଗୁ ବିବାହ ହୋଇପାରିଲା ବୋଲି ସେ ପ୍ରକାଶ କରିଛନ୍ତି । ଅନ୍ୟପକ୍ଷରେ ମଦନଙ୍କ ବାପା ସୀମାଦ୍ରୀ କହିଛନ୍ତି, ସୌମ୍ୟାଙ୍କ ଦୃଷ୍ଟିହୀନତା ତାଙ୍କ ପରିବାର ପାଇଁ କୌଣସି ପ୍ରତିବନ୍ଧକ ସୃଷ୍ଟି ହୋଇ ନ ଥିଲା। ସୌମା ବୋହୂ ନୁହେଁ, ଝିଅ ଭାବେ ଘରେ ରହିବେ ବୋଲି ସେ କହିଛନ୍ତି। ସେହିପରି ମଦନ କେବେ ବାହ୍ୟ ସୁନ୍ଦରତାକୁ ଦେଖୁ ନ ଥିଲେ। ସୌମା ଦୃଷ୍ଟିବାଧିତ ଜାଣିବା ପରେ ସେ ବିବାହ କରିବାକୁ ରାଜି ହୋଇଯାଇଥିଲେ। ତାଙ୍କୁ ଜୀବନ ସାଥୀ ଭାବେ ପାଇଥିବାରୁ ଖୁସି ଥିବା ମଦନ କହିଛନ୍ତି।