ବ୍ରହ୍ମପୁର ଅଫିସ,୨୬।୧୧: ଗଞ୍ଜାମ ଜିଲା ବ୍ରହ୍ମପୁର ନୂଆ ବସ୍ଷ୍ଟାଣ୍ଡ ତଥା ସିଟି ବସ୍ଷ୍ଟାଣ୍ଡ ମଙ୍ଗଳବାର ବନ୍ଦ ହୋଇଛିି। ବିଡିଏ ପକ୍ଷରୁ ଜାରି କରାଯାଇଥିବା ପୂର୍ବ ନୋଟିସ୍ ଅନୁଯାୟୀ, ନୂଆ ବସ୍ଷ୍ଟାଣ୍ଡର ମରାମତି କାର୍ଯ୍ୟ ସକାଳୁ ପ୍ରଶାସନ ଆରମ୍ଭ କରିଛି। ସକାଳୁ ବିଡିଏ ଉପାଧ୍ୟକ୍ଷ ତଥା ବିଏମ୍ସି କମିଶନର ଚକ୍ରବର୍ତ୍ତୀ ସିଂ ରାଠୋରଙ୍କ ଉପସ୍ଥିତିରେ ବସ୍ଷ୍ଟାଣ୍ଡ ଆଗକୁ ଜେସିବି ଦ୍ୱାରା ଖୋଳାଯାଇଛି।
ଅନ୍ୟପକ୍ଷରେ ନୂଆ ବାସ୍ଷ୍ଟାଣ୍ଡ କାର୍ଯ୍ୟ ଶେଷ ପର୍ଯ୍ୟନ୍ତ ହଳଦିଆପଦର ବସ୍ଷ୍ଟାଣ୍ଡରୁ ଘରୋଇ ବସ ଚଳାଚଳ କରିବା ନେଇ ପ୍ରଶାସନ ପକ୍ଷରୁ ଜାରି କରାଯାଇଥିବା ନୋଟିସକୁ ବିରୋଧ କରି ଜିଲା ଘରୋଇ ବସ୍ ମାଲିକ ସଂଘ ବନ୍ଦ ଡାକରା ଦେଇଛି । ଏହାର ପ୍ରଭାବରେ ଜିଲାର ପୁରୁଷୋତ୍ତମପୁର, ଦିଗପହଣ୍ଡି, ଆସ୍କା ଦେଇ ଯାତାୟାତ କରିଥିବା ପ୍ରାୟ ୪୫୦ ବସ୍ ବନ୍ଦ ରହିଛି । ଫଳରେ ନୂଆ ବସ୍ଷ୍ଟାଣ୍ଡରେ ହଜାର ହଜାର ଯାତ୍ରୀ ନାହିଁ ନ ଥିବା ସମସ୍ୟାର ସମ୍ମୁଖୀନ ହୋଇଛନ୍ତି । ତେବେ ବସଷ୍ଟାଣ୍ଡର ନିର୍ମାଣ କାର୍ଯ୍ୟ ଆରମ୍ଭ ପରେ ବସଷ୍ଟାଣ୍ଡ ମଧ୍ୟରେ ରହିଥିବା ସମସ୍ତ ବସ୍ ଖାଲି କରାଯାଇଥିଲା। ସନ୍ଧ୍ୟା ସୁଦ୍ଧା ବସ ମାଲିକ ସଂଘ ବନ୍ଦକୁ ପ୍ରତ୍ୟାହାର ନ କଲେ ପ୍ରଶାସନ ପକ୍ଷରୁ କଠୋର ପଦକ୍ଷେପ ନିଆଯିବ ବୋଲି ବିଡିଏ ଉପାଧ୍ୟକ୍ଷ ରାଠୋର କହିଛନ୍ତି ।