ବ୍ରହ୍ମପୁର ଅଫିସ,୧୩।୯- ବ୍ରହ୍ମପୁର ରେଳଷ୍ଟେଶନ ସମ୍ମୁଖରେ ଦୀର୍ଘଦିନ ହେଲା ଏକ ନାଲି ରଙ୍ଗର କାର ଛିଡା ହୋଇରହିଛି। ସମ୍ପୃକ୍ତ ଗାଡିର ମାଲିକ କାର୍ଟିକୁ ସେଠାରୁ ନେଉ ନ ଥିବା ଯୋଗୁ ଦୀର୍ଘ ମାସ ଧରି ଏହା ପଡ଼ି ରହିଛି। କାର୍ ଭିତରେ ଏକ କଳା ରଙ୍ଗର ବ୍ୟାଗ୍ ରହିଥିବା ବେଳେ ଗାଡ଼ିର ପଛରେ ଡାକ୍ତର ଚିହ୍ନ ରହିଛି। ଏଣୁ ଏହା ଜଣେ ଡାକ୍ତରଙ୍କ କାର୍ ହୋଇଥିବା ସନ୍ଦେହ କରାଯାଉଛି। ହେଲେ କେଉଁ କାରଣ ପାଇଁ ଗାଡ଼ିଟିକୁ କେହି ନେଉ ନାହାନ୍ତି ସେ ନେଇ ଲୋକଙ୍କ ମନରେ ଅନେକ ପ୍ରଶ୍ନ ଉପୁଜିଛି। ପ୍ରତିଦିନ ଗଞ୍ଜାମ ଜିଲା ସମେତ ଅନ୍ୟ ଜିଲାରୁ ହଜାର ହଜାର ଯାତ୍ରୀ ବ୍ରହ୍ମପୁର ରେଳଷ୍ଟେଶନକୁ ଆସିଥାନ୍ତି। ଏବେ କାର୍ ଭିତରେ ଥିବା କଳାବ୍ୟାଗ୍କୁ ନେଇ ସମସ୍ତେ ଆତଙ୍କିତ ହୋଇଯାଇଛନ୍ତି। ବ୍ୟାଗରେ କଣ ରହିଛି ତାହା ଏବେବି ସ୍ପଷ୍ଟ ହୋଇପାରିନାହିଁ ।ଏନେଇ ରେଳବାଇ ଥାନାରେ ଅଭିଯୋଗ ହୋଇଛି। ପୋଲିସ ଘଟଣା ସ୍ଥଳରେ ପହଞ୍ଚି କାର ନମ୍ବର(ଓଆର-୦୨-ଏଚ୍- ୭୭୪୭)କୁ ଆର୍ଟିଓ ଅଫିସକୁ କାରର ମାଲିକ ସମ୍ପର୍କରେ ଜାଣିବା ପାଇଁ ଚିଠି କରିଛି। ତେବେ ଗାଡିଟି ରାୟଗଡା ଅଞ୍ଚଳର ହୋଇଥିବା ପୋଲିସ ଜାଣିବା ପରେ ରାୟଗଡା ଥାନାକୁ ମଧ୍ୟ ଏନେଇ ସୂଚନା ଦିଆଯାଇଛି ବୋଲି ରେଳବାଇ ଥାନାଧିକାରୀ ସୁକାନ୍ତ ଭୋଇ ସୂଚନା ଦେଇଛନ୍ତି। ସେ ଆହୁରି ମଧ୍ୟ କହିଛନ୍ତି କାର ଭିତରେ ଥିବା ବ୍ୟାଗକୁ ନେଇ ସାଧାରଣ ଲୋକେ ଭୟଭୀତ ହେବା ଆବଶ୍ୟକ ନାହିଁ। କାର ମାଲିକଙ୍କ ପରିଚୟ ମିଳିିବା ପରେ ସବୁକିଛି ଜଣାପଡ଼ିଯିବ ବୋଲି ସେ କହିଛନ୍ତି ।