ସମ୍ବଲପୁର,୧୧ା୪(ପ୍ରମୋଦ ବହିଦାର): ରେଙ୍ଗାଲି ପୋଲିସ ଏବଂ ଅବକାରୀ ବିଭାଗ ପୃଥକ୍ ସ୍ଥାନରେ ଚଢ଼ାଉ କରି ବ୍ରାଉନସୁଗାର, କଫ୍ ସିରପ ଜବତ କରିବା ସହ ସମ୍ପୃକ୍ତ ୪ ଅଭିଯୁକ୍ତଙ୍କୁ ଗିରଫ କରିଛି।
ବିଶ୍ବସ୍ତ ସୂତ୍ରରୁ ଖବର ପାଇ ପୋଲିସ ଓ ଅବକାରୀ ଟିମ୍ ରେଙ୍ଗାଲି ରେଳ ଷ୍ଟେଶନରୁ ୬୦ ଗ୍ରାମ ବ୍ରାଉନସୁଗାର ଜବତ କରିଥିଲେ। ଏଥିରେ ସମ୍ପୃକ୍ତ ଧନୁପାଲି ଥାନା ସୁନାପାଲିର କିରଣ ଓରାମ ଓ ଅଜିତ ଲାକ୍ରାଙ୍କୁ ଗିରଫ କରାଯାଇଛି। ସେହିପରି ରେଙ୍ଗାଲି ପୁରୁଣାବସ୍ତି ଅଞ୍ଚଳରୁ ୧୮ ଷ୍ଟ୍ରିପ ନିଶା ବଟିକା ଜବତ କରି ପୁରୁଣାବସ୍ତିର ସ୍ନେହବର୍ଦ୍ଧନ ମହାନନ୍ଦଙ୍କୁ ଗିରଫ କରାଯାଇଛି। ତାଙ୍କଠାରୁ ନଗଦ ୧୮୦୦ ଟଙ୍କା ଜବତ କରାଯାଇଛି।
ଅନ୍ୟ ଏକ ଘଟଣାରେ ପୋଲିସ ଓ ଅବକାରୀ କର୍ମଚାରୀ ରେଙ୍ଗାଲି ମାଉଲିନଗରରେ ଚଢ଼ାଉ କରି ୩୩୯ ବୋତଲ କଫ୍ ସିରପ ଜବତ କରିଛନ୍ତି। ଏହାସହ ବିଶାଲ ମହାପାତ୍ର ନାମକ ଜଣେ ଅଭିଯୁକ୍ତଙ୍କୁ ଗିରଫ କରିଛନ୍ତି। ଏ ନେଇ ରେଙ୍ଗାଲି ଥାନାରେ ପୃଥକ୍ ମାମଲା ରୁଜୁ କରି ପୋଲିସ ବୁଧବାର ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି।