ଅନୁଗୋଳ ଅଫିସ୍, ୨୬ା୧ – ଅନୁଗୋଳ ଜିଲାକୁ ଅପରାଧ ମୁକ୍ତ କରିବାକୁ ପ୍ରସ୍ତୁତ ହୋଇଛି ବ୍ଲୁ ପ୍ରିଣ୍ଟ। ଉପାନ୍ତରୁ ସହର, ଗ୍ରାମାଞ୍ଚଳରୁ ନଗର ଯାଏ ଆପରାଧିକ କାର୍ଯ୍ୟକଳାପର ଡାଟା ବେସ୍ ପ୍ରସ୍ତୁତ କରୁଛି ପୋଲିସ। ବିଶେଷ କରି ଖାକି ଟାର୍ଗେଟରେ ଏବେ ରହିଛନ୍ତି ଧଳା ଜହର ବ୍ୟବସାୟୀ ଏବଂ କୋଲ୍ ମାଫିଆ। ଆପରାଧିକ କାର୍ଯ୍ୟକଳାପ ଦମନ ସହ ଆଇନଶୃଙ୍ଖଳା ପରିସ୍ଥିତିର ମୁକାବିଲା ପାଇଁ ଏପରି ସ୍ବତନ୍ତ୍ର ରଣନୀତି ପ୍ରସ୍ତୁତ କରିଛନ୍ତି ଏସ୍ପି ଜଗମୋହନ ମୀନା।
୨୦୧୯ ଅଗଷ୍ଟ ୨୩ରେ ଜିଲା ପୋଲିସର ମଙ୍ଗ ଧରିଥିଲେ ଏସ୍ପି ମୀନା। ଏହା ପରଠାରୁ ଆରମ୍ଭ ହୋଇଛି ଅପରାଧୀଙ୍କ ଡାଟା ବେସ୍ ପ୍ରସ୍ତୁତି। ଅଦ୍ୟାବଧି ଚୋରି, ରାହାଜାନି, ଲୁଟ, ଡକାୟତି ଭଳି ଅପରାଧରେ ସମ୍ପୃକ୍ତ ୨୬୦ ଜଣଙ୍କ ଡାଟାବେସ୍ ପ୍ରସ୍ତୁତ ସରିଲାଣି। ଜିଲାର ଲୁଟେରାଙ୍କ ସହ ଜିଲା ବାହାରୁ ଆସୁଥିବା ଅପରାଧୀଙ୍କ ଉପରେ କଡ଼ା ନଜର ରଖାଯାଇଛି। ଅପରାଧ ଦମନ ସମ୍ପର୍କରେ ସୂଚନା ଦେଇ ଏସ୍ପି କହିଛନ୍ତି, କୌଣସି ଅପରାଧୀଙ୍କ ପ୍ରତି ପୋଲିସ କୋହଳ ମନୋଭାବ ପୋଷଣ କରିବ ନାହିଁ। ଜିଲାରେ ବିଭିନ୍ନ ସମୟରେ ଆଇନ ଶୃଙ୍ଖଳା ପରିସ୍ଥିତି ଦେଖାଦେଉଛି। ଲୋକମାନେ ନିଜ ହକ୍ ପାଇଁ ଶାନ୍ତିପୂର୍ଣ୍ଣ ଭାବେ ଆନ୍ଦୋଳନ କଲେ କୌଣସି ସମସ୍ୟା ନାହିଁ। ହେଲେ ଆକ୍ରୋଶମୂଳକ ମନୋଭାବ ନେଇ ଆନ୍ଦୋଳନ କଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଅନୁଗୋଳ ସହରକୁ ଧଳା ଜହର ହବ୍ କରିଥିବା ବ୍ରାଉନ୍ ସୁଗାର ମାଫିଆଙ୍କୁ ରୋକିବାକୁ ବଡ଼ ପଦକ୍ଷେପ ଗ୍ରହଣ କରାଯାଇଛି। ଅଦ୍ୟାବଧି ବ୍ରାଉନସୁଗାର ଏବଂ କଫ ସିରପ୍ ବ୍ୟବସାୟୀଙ୍କ ବିରୋଧରେ ୧୦ମାମଲା ରୁଜୁ କରାଯାଇଛି। ଏପରି ନିଶା କାରବାରରେ ସମ୍ପୃକ୍ତ ୨୪ଜଣ ବନ୍ଧା ହେଲେଣି। ୮ଜଣଙ୍କ ସ୍ଥାବର ଅସ୍ଥାବର ସମ୍ପତ୍ତିକୁ ଜବତ କରାଯାଇଛି। ଏବେ ନିଶା ବ୍ୟବସାୟୀଙ୍କ ସମ୍ପତ୍ତି ବାଜ୍ୟାପ୍ତି କରିବାକୁ ପ୍ରସ୍ତୁତି ଆରମ୍ଭ ହୋଇଛି।
ସେହିପରି କୋଲ୍ମାଫିଆଙ୍କୁ ଧରିବାକୁ ମଧ୍ୟ ସ୍ବତନ୍ତ୍ର ଜାଲ ବିଛାଯାଇଛି। ଚୋରା କୋଇଲା ଚାଲାଣରେ ସମ୍ପୃକ୍ତ ଅଭିଯୋଗରେ ୧୮ଜଣଙ୍କୁ ଗିରଫ କରାଯାଇଛି। ଅନୁଗୋଳ, ବଅଁରପାଳ, ବିକ୍ରମପୁର, ଜରପଡ଼ା, କୋଲିୟାରୀ, ତାଳଚେର ଏବଂ ଛେଣ୍ଡିପଦା ଥାନା ଅଞ୍ଚଳରେ ସମ୍ପୃକ୍ତ କୋଇଲା ମାଫିଆ ଧରାପଡ଼ିଛନ୍ତି। କୋଇଲା ଚାଲାଣରେ ବ୍ୟବହୃତ ବହୁ ଟ୍ରକ୍, ପିକ୍ଅପ୍ ଭ୍ୟାନ୍ ଜବତ ହୋଇଛି। ଜିଲାରେ ଚାଲିଥିବା ଚୋରା କୋଇଲା ମାଫିଆଙ୍କ କିଙ୍ଗପିନ୍ଙ୍କୁ ସାବାଡ୍ କରିବାକୁ ପଦକ୍ଷେପ ନିଆଯାଉଛି। ଅପରାଧର ମୂଳୋତ୍ପାଟନ ସହ ଚୋରା ବନ୍ଧୁକ କାରବାର ଉପରେ ସ୍ବତନ୍ତ୍ର ନଜର ରଖାଯାଇଛି। ଏଥିପାଇଁ ଏକ ସ୍ବତନ୍ତ୍ର ଟିମ୍ କାର୍ଯ୍ୟ କରୁଥିବା ଏସ୍ପି ସୂଚନା ଦେଇଛନ୍ତି।