ଦାରିଙ୍ଗବାଡ଼ି/ବ୍ରାହ୍ମଣୀଗାଁ,୨୩।୭(ଡି.ଏନ.ଏ)- ଦାରିଙ୍ଗବାଡ଼ି ବ୍ଲକ ବ୍ରାହ୍ମଣୀଗାଁ ବନାଞ୍ଚଳରେ ଗତ ଦୁଇଦିନ ହେଲା ବାଘ ଆତଙ୍କ ଦେଖାଯାଇଛି। ବାଘକୁ କେହି ଦେଖି ନ ଥିଲେ ମଧ୍ୟ ବନାଞ୍ଚଳ ଅନ୍ତର୍ଗତ ଆଡିଗୁଡ଼ି ଗ୍ରାମ ନିକଟ ସିଆଙ୍ଗାଉଜୁ ପାହାଡ଼ରେ ଶନିବାର ଏକ ବାଛୁରି ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ମରି ପଡ଼ିଥିବା ଏବଂ ନିକଟସ୍ଥ ବୁଦାରେ ଶଦ୍ଦ ଶୁଣି ଭୟରେ ସେଠାରୁ ପଳାଇ ଆସିଥିବା ଉକ୍ତ ଅଞ୍ଚଳର ଟିଙ୍ଗା ମୁଠାମାଝି କହିଛନ୍ତି। ଟିଙ୍ଗା ଜଙ୍ଗଲକୁ କାଠ ସଂଗ୍ରହ ପାଇଁ ଯାଇଥିବା ବେଳେ ଏପରି ଘଟଣା ଦେଖି ଅଞ୍ଚଳରେ ବାଘ ଥିବା ସନ୍ଦେହ କରୁଥିବା ସମ୍ପର୍କରେ ବନାଞ୍ଚଳ ଅଧିକାରୀ ଲଳିତମୋହନ ନାୟକଙ୍କୁ କହିଥିଲେ ା ବନ ବିଭାଗ ପକ୍ଷରୁ ରବିବାର ଏବଂ ସୋମବାର ଉକ୍ତ ଅଞ୍ଚଳରେ ତଦନ୍ତ କରାଯାଇଛି। ତେବେ ବାଛୁରି ମୃତଦେହ ପଡିଛି ବୋଲି କୁହାଯାଉଥିବା ସ୍ଥାନକୁ ଯିବାପାଇଁ ବନ କର୍ମଚାରୀମାନେ ଭୟ କରୁଛନ୍ତି। ଉକ୍ତ ସ୍ଥାନଟି ଘଞ୍ଚ ଜଙ୍ଗଲ ହୋଇଥିବାରୁ ସୁରକ୍ଷା ଦୃଷ୍ଟିରୁ ବନ ବିଭାଗ ସେଠାକୁ ପହଞ୍ଚି ପାରି ନ ଥିବା ବନାଞ୍ଚଳ ଅଧିକାରୀ ନାୟକ କହିଛନ୍ତି। ତଥାପି ଖୁବ୍ଶୀଘ୍ର ସେଠାରୁ ପାଦଚିହ୍ନ ଚିହ୍ନଟ କରାଯିବ ବୋଲି ସେ କହିଛନ୍ତି। ଉକ୍ତ ଅଞ୍ଚଳରେ ଚିତ୍ତା ବାଘ ଥିବା ବନ ବିଭାଗ ଅନୁମାନ କରିଛି ା ବାଘକୁ ନେଇ ଆଡିଗୁଡ଼ି ଗ୍ରାମବାସୀ ଭୟଭୀତ ଥିବାରୁ ସେମାନଙ୍କୁ ସୋଲାର ଲାଇଟ ଯୋଗାଇ ଦିଆଯିବା ସହ ବନ ବିଭାଗ କର୍ମଚାରୀ ବାରମ୍ବାର ଗ୍ରାମକୁ ଯାଇ ଲୋକେ ସୁରକ୍ଷିତ ରହିବା ପାଇଁ ବିଭିନ୍ନ ପରାମର୍ଶ ଦେଉଛନ୍ତି। ସୂଚନାଯୋଗ୍ୟ, ଚଳିତ ମାସରେ ଉକ୍ତ ବନାଞ୍ଚଳର ଉଲିପଦର ହଷ୍ଟେଲ ଭିତରକୁ ବାଘ ପଶି ଆସିଥିବା ଆତଙ୍କ ସୃଷ୍ଟି ହୋଇଥିଲା। ଏବେ ସୁଦ୍ଧା ବନ ବିଭାଗ ପକ୍ଷରୁ ତାହା ବାଘ କିମ୍ବା ଅନ୍ୟ କୌଣସି ହଂସ୍ରଜନ୍ତୁ ସ୍ପଷ୍ଟ କରାଯାଇନାହିଁ। ବାଘ ଆତଙ୍କ ଯୋଗୁ ଜଙ୍ଗଲକୁ ଯାଇପାରୁ ନ ଥିବା ବେଳେ ସନ୍ଧ୍ୟା ହେଲେ ଘରୁ ବାହାରିବାକୁ ସୁରକ୍ଷିତ ମଣୁ ନ ଥିବା ଗ୍ରାମବାସୀ କହିଛନ୍ତି।