ଭୁବନ, ୧୫।୯(ଡି.ଏନ୍.ଏ.) – ଢେଙ୍କାନାଳ ଜିଲା ଭୁବନ ଥାନା ଓଢ଼ଣା-ମାଳପୁରା ଗ୍ରାମ ନିକଟରେ ପ୍ରବାହିତ ବ୍ରାହ୍ମଣୀ ନଦୀରୁ ଶୁକ୍ରବାର ମିଳିଥିବା ଗଳିତ ମୃତଦେହକୁ ନେଇ ଅଡୁଆ ବଢ଼ିବାରେ ଲାଗିଛି। ଶନିବାର ଦିନତମାମ କସରତ ସତ୍ତ୍ୱେ ମୃତଦେହ ଚିହ୍ନଟ ହୋଇପାରିନାହିଁ। ମୃତଦେହର ୨ ଦାବିଦାର ପ୍ରମାଣ ଦେଇପାରିନାହାନ୍ତି। ଫଳରେ ୭୨ଘଣ୍ଟା ପାଇଁ ଶବକୁ ପୋଲିସ ନିଜ ହେପାଜତରେ ରଖିଛି। ଅନ୍ୟପଟେ ମୃତଦେହର ଡିଏନ୍ଏ ଟେଷ୍ଟ କରିବାକୁ ରାଜି ହୋଇଛନ୍ତି ଉଭୟ ଦାବିଦାର ପରିବାର। ରିପୋର୍ଟ ଆସିବା ପରେ ମୃତକଙ୍କ ପରିଚୟ ମିଳିପାରିବ ବୋଲି ପୋଲିସ ଆଶାବ୍ୟକ୍ତ କରିଛି।
ପରଜଙ୍ଗ ବ୍ଲକ କୁନ୍ଦନଦେଈପୁର ନଦୀଘାଟରେ ଗତ ୭ ତାରିଖରେ ଡଙ୍ଗାବୁଡ଼ି ଘଟଣାରେ ୩ଜଣଙ୍କ ମୃତଦେହ ଉଦ୍ଧାର କରାଯାଇଛି। ନିଖୋଜ ଥିବା ରୋଡ୍ ଗ୍ରାମର ବିନୋଦ ସାହୁଙ୍କ ପୁଅ ରମେଶଙ୍କ ଏଯାଏ କୌଣସି ପତ୍ତା ମିଳିପାରିନାହିଁ। ସେହିପରି କାମାକ୍ଷାନଗର ଥାନା ନୂଆଆଳତୁମା ଗ୍ରାମ ଦୁଇଗୋଡ଼ିଆ ସାହିର ପରିଆ ମଲ୍ଲିକଙ୍କ ପୁଅ କରୁଣାକର ଗତ ଶନିବାର ବ୍ରାହ୍ମଣୀର ଶାଖା ନଦୀ ରାମିଆଳରେ ଭାସି ଯାଇଥିଲେ। ଓଢ଼ଣା-ମାଳପୁରା ଗ୍ରାମ ନିକଟରୁ ଉଦ୍ଧାର କରାଯାଇଥିବା ମୃତଦେହକୁ ଉଭୟେ ନିଜର ବୋଲି ଦାବି କରୁଛନ୍ତି। ଏହାକୁ ନେଇ ଅଡୁଆ ବଢ଼ିବାରେ ଲାଗିଛି।
ଏ ନେଇ ଥାନାଧିକାରୀ ନିର୍ମଳା ଗୋଚ୍ଛାୟତ କୁହନ୍ତି, ସୁଶାନ୍ତଙ୍କ ବାପା ବିନୋଦ ଏବଂ କରୁଣାକରଙ୍କ ବାପା ପରିଆ ନିଜର ସମ୍ପର୍କୀୟଙ୍କ ସହ ପହଞ୍ଚତ୍ ମୃତଦେହ ଚିହ୍ନଟ କରିବାକୁ ଉଦ୍ୟମ କରିଥିଲେ। ହେଲେ ମୃତଦେହ ଅଧିକ ଫୁଲିଯାଇଥିବାରୁ ସେମାନେ ଦେଇଥିବା ତଥ୍ୟ ମେଳ ଖାଇ ନ ଥିଲା। ଏହାପରେ ଉଭୟ ପରିବାରକୁ ନେଇ ଆଲୋଚନା କରାଯାଇଥିଲା। ବ୍ୟବଚ୍ଛେଦ ପରେ ମୃତଦେହକୁ ୭୨ ଘଣ୍ଟା ପାଇଁ ସଂରକ୍ଷଣ କରି ରଖାଯିବ। ଯଦି ସେହି ସମୟ ମଧ୍ୟରେ କେହି ବଳିଷ୍ଠ ପ୍ରମାଣ ଦିଅନ୍ତି ତେବେ ସମ୍ପୃକ୍ତ ପରିବାରକୁ ଶବ ହସ୍ତାନ୍ତର କରାଯିବ। ଏହା ନ ହେଲେ ୭୨ ଘଣ୍ଟା ପରେ ପୋଲିସ ନିଜ ତତ୍ତ୍ୱାବଧାନରେ ମୃତଦେହ ସଂସ୍କାର କରିବ। ମୃତଦେହର ନମୁନା ଡିଏନ୍ଏ ଟେଷ୍ଟ ପାଇଁ ପଠାଇବାକୁ ଉଭୟ ପରିବାର ସହମତି ଜଣାଇଛନ୍ତି। ରିପୋର୍ଟ ଆସିବା ପରେ ଦାବିଦାରଙ୍କ ରକ୍ତ ନମୁନା ସହ ଏହାକୁ ମେଳ କରାଯିବ। ଏଥିରୁ ପ୍ରକୃତ ସତ୍ୟତା ଜଣାପଡ଼ିବ ବୋଲି ଥାନାଧିକାରୀ ସୂଚନା ଦେଇଛନ୍ତି।