ନୂଆଦିଲ୍ଲୀ,୧୨।୧୧: ବ୍ରାଜିଲ୍ରେ ହେବାକୁ ଥିବା ୧୧ତମ ବ୍ରିକ୍ସ୍ ଶିଖର ସମ୍ମିଳନୀରେ ଯୋଗଦେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ନଭେମ୍ବର ୧୩ ଓ ୧୪ ଦୁଇ ଦିନ ଧରି ଆୟୋଜନ ହେଉଥିବା ଏହି କାର୍ଯ୍ୟକ୍ରମରେ ସାମିଲ ହେବାକୁ ପ୍ରଧାନମନ୍ତ୍ରୀ ମୋଦି ମଙ୍ଗଳବାର ଦ୍ୱିପ୍ରହରରେ ବ୍ରାଜିଲର ରାଜଧାନୀ ବ୍ରାସିଲିଆ ଗସ୍ତ କରିବେ। ମୋଦିଙ୍କ ସହ ଏହି ଗସ୍ତରେ ଭାରତରୁ ଉଦ୍ୟୋଗପତିଙ୍କ ଏକ ପ୍ରତିନିଧିମଣ୍ଡଳ ରହିଥିବା ଜଣାପଡ଼ିଛି। ଚଳିତ ବର୍ଷ ବ୍ରିକ୍ସ୍ ସମ୍ମିଳନୀର ବିଷୟ ବସ୍ତୁ ରହିଛି ‘ଅଭିନବ ଭବିଷ୍ୟତ ପାଇଁ ଆର୍ଥିକ ବୃଦ୍ଧି’। ଏହି ସମ୍ମିଳନୀରେ ଅନ୍ୟ ୫ଟି ଦେଶ ମଧ୍ୟ ଯୋଗଦେବେ। ଏହି ବୈଠକରେ ଦ୍ୱିପାକ୍ଷିକ ଆଲୋଚନା ହେବା ସହ ଅର୍ଥନୀତି ଉପରେ ଅଧିକ ଗୁରୁତ୍ୱ ଦିଆଯିବ। ଅନ୍ୟପଟେ ମୋଦି ଋଷର ରାଷ୍ଟ୍ରପତି ଭ୍ଲ୍ଲାଡିମିର ପୁଟିନ ଓ ଚାଇନାର ରାଷ୍ଟ୍ରପତି ସି ଜିନ୍ପିଙ୍ଗଙ୍କୁ ପୃଥକ୍ ପୃଥକ୍ ଭାବେ ଭେଟି ସେମାନଙ୍କ ସହ ଦ୍ୱିପାକ୍ଷିକ ଆଲୋଚନା କରିବେ। ତେବେ ୬ଷ୍ଠ ଥର ପାଇଁ ମୋଦି ଏହି ସମ୍ମିଳନୀରେ ଯୋଗଦେଉଛନ୍ତି। ପ୍ରଥମ ଥର ସେ ୨୦୧୪ରେ ବ୍ରାଜିଲର ଫୋର୍ଟାଲେଜାରେ ଆୟୋଜିତ ଶିଖର ସମ୍ମିଳନୀରେ ସାମିଲ ହୋଇଥିଲେ।