ପାତ୍ରପୁର,୧୪।୬(ଉମାଚରଣ କର): ଗାଁକୁ ଯିବା ପାଇଁ ପକା ରାସ୍ତା ନ ଥିବାରୁ ଜାମୁଗଣ୍ଡ ମୁକୁଳା ନାଳ ପାର ହେବାକୁ ପଡୁଛି। ନଦୀର ଉପର ମୁଣ୍ଡରେ ବର୍ଷା ହେଲେ ନାଳରେ ବଢି ଆସିଯାଏ ଆଉ ପ୍ରାୟ ୧୫ରୁ ଊର୍ଦ୍ଧ୍ୱ ଗ୍ରାମ ଏକ ପ୍ରକାର ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଏ। ଏଥିପାଇଁ ନାଳ ଉପରେ ବ୍ରିଜ ନିର୍ମାଣ ପାଇଁ ପ୍ରଶାସନିକ ଅଧିକାରୀଙ୍କ ପାଖରେ ବାରମ୍ବାର ଗୁହାରି କରିଥିଲେ ସୁଦ୍ଧା କୌଣସି ସୁଫଳ ମିଳି ନ ଥିଲା । ଶେଷରେ ବାଧ୍ୟ ହୋଇ ଉକ୍ତ ଗ୍ରାମବାସୀ ନିଜ ସମର୍ଥ ଅନୁଯାୟୀ ଟଙ୍କା ଆଦାୟ କରି ନାଳ ଉପରେ ଛୋଟିଆ ବ୍ରିଜ ନିର୍ମାଣ ପାଇଁ ଅଣ୍ଟା ଭିଡିଥିବା ଦେଖିବାକୁ ମିଳିଛି । ଏମିତି ଏକ ଘଟଣା ଦେଖିବାକୁ ମିଳିଛି ଗଞ୍ଜାମ ଜିଲା ପାତ୍ରପୁର ବ୍ଲକ ଆଦିବାସୀ ଅଧ୍ୟୁଷିତ ବୁରାତାଲ ପଞ୍ଚାୟତରେ। ଗତ ଏକ ବର୍ଷ ଧରି କମଳାଖତ, ନୂଆଁସାହି, ସାନ ଅଞ୍ଚୁପା, ଜେନା ସାହି, ବଡ ଅଞ୍ଚୁପା, ମୁଣ୍ଡେଇସିଙ୍ଗି, କୁଶମଳା, ମଇଁଷିଖତ, ବଡ ସଚାରୁ, ସାନ ସଚାରୁ, କାନ୍ତିଗାଁ, ବଡ ଅଞ୍ଜାଗୁଲି, ବାତ୍ରା ସାହି, ସାନଗାଁ, ସାନଅଞ୍ଜାଗୁଲି, ବିଲୁଗାଁ ପ୍ରମୁଖ ଗ୍ରାମବାସୀ ବାରମ୍ବାର ବ୍ଲକ ପ୍ରଶାସନ ନିକଟରେ ବ୍ରିଜ ନିର୍ମାଣ ପାଇଁ ଦାବି କରିଆସୁଥିଲେ ସୁଦ୍ଧା ବ୍ଲକ ପ୍ରଶାସନ ପକ୍ଷରୁ କୌଣସି ଆଖି ଦୃଶିଆ କାର୍ଯ୍ୟ ପନ୍ଥା ଗ୍ରହଣ କରି ନ ଥିବା ଦେଖିବାକୁ ମିଳିଛି। ଆଗକୁ ବର୍ଷା ଋତୁ ଆସୁଥିବା ବେଳେ ଆଗୁଆ ସଜାଗ ହୋଇ ଉକ୍ତ ଗ୍ରାମବାସୀ ତିରିଶ ହଜାର ଟଙ୍କା ଚାନ୍ଦା ବାହାର କରି ଜାମୁଗଣ୍ଡ ନାଳ ଉପରେ ଏକ ଛୋଟିଆ ବ୍ରିଜ ନିର୍ମାଣ ପାଇଁ ଅଣ୍ଟା ଭିଡିଥିଲେ। ଜେସିବି ମାଧ୍ୟମରେ ପଥରଗୁଡିକୁ ବାହାର କରି ରାସ୍ତା ସଫା କରାଯାଇଥିବା ବେଳେ ନାଳ ମୁଖ୍ୟ ସ୍ରୋତ ନିକଟରେ ପିଲ୍ଲାର କାମ ଆରମ୍ଭ କରିଥିଲେ। ହେଲେ ଗ୍ରାମବାସୀ ଆଦାୟ କରିଥିବା ଚାନ୍ଦା ସମୁଦ୍ରକୁ ଶଙ୍ଖେ ଥିଲା ଏବଂ ଦୁଇଟି ପିଲ୍ଲାର କାମରେ ସମସ୍ତ ଟଙ୍କା ସରିଯାଇଥିଲା । ବର୍ତ୍ତମାନ ସେମାନେ ନିରୁପାୟ ହୋଇ ଭାଗ୍ୟକୁ ଆଦରି ବସିଛନ୍ତି । ପୁଣି ଥରେ ଚାନ୍ଦା ବାହାର କରିବା ପାଇଁ ଗ୍ରାମବାସୀ ଆଲୋଚନା କରୁଥିବା ଜଣା ପଡିଛି l ଉଭୟ କେନ୍ଦ୍ର ଓ ରାଜ୍ୟ ସରକାର ଆଦିବାସୀଙ୍କ ଉନ୍ନତି ପାଇଁ ପାଣି ଭଳି ଟଙ୍କା ଖର୍ଚ୍ଚ କରୁଛନ୍ତି । କିନ୍ତୁ ପାତ୍ରପୁର ବ୍ଲକର ଉକ୍ତ ଅଞ୍ଚଳଗୁଡ଼ିକରେ ସରକାରୀ ଯୋଜନା ବାଟବଣା ହୋଇ ପଡିରହିଛି । ସୂଚନାଥାଉ କି ଉକ୍ତ ଗ୍ରାମବାସୀ ସମସ୍ୟାର ସମାଧାନ ପାଇଁ ବିଡିଓଙ୍କୁ ଜଣାଇଥିବା ବେଳେ ନାଳରେ ବଢି ଆସିଲେ ତାର ବାନ୍ଧି ନାଳ ପାର ହେବାର ନଜିର ରହିଛି । ଏମିତିକି ୨୦୨୧ରେ ଜଣେ ଯୁବକ ପାଣିରେ ବୁଡ଼ିଯାଇଥିଲେ । ନାଳ ଉପରେ ବ୍ରିଜ ନିର୍ମାଣ ପାଇଁ ଗତବର୍ଷ ଜୁଲାଇରେ ପ୍ରଶାସନ ପକ୍ଷରୁ ସମୀକ୍ଷା ମଧ୍ୟ କରାଯାଇଥିଲା । ଏମିତି କି ପାତ୍ରପୁର ବ୍ଲକ କାର୍ଯ୍ୟାଳୟଠାରେ ଅନୁଷ୍ଠିତ ଜନ ଶୁଣାଣି କାର୍ଯ୍ୟକ୍ରମରେ ଗ୍ରାମବାସୀ ଜିଲାପାଳଙ୍କ ନିକଟରେ ଗୁହାରି କରିଥିଲେ । ତଥାପି
ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନ ଥିବାରୁ ବୃଦ୍ଧିଜୀବୀ ମହଲରେ ଅସନ୍ତୋଷ ପ୍ରକାଶ ପାଇଛି।