ନୂଆଦିଲ୍ଲୀ,୧ା୫(ପି.ଟି.): କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ନାଗରିକତ୍ୱ ବିବାଦ ତେଜିବାରେ ଲାଗିଛି। ସେ ବ୍ରିଟେନ ନାଗରିକ ବୋଲି ଅଭିଯୋଗ ଆସିବା ପରେ ଏନେଇ ରାହୁଲଙ୍କ ସ୍ପଷ୍ଟୀକରଣ ଲୋଡ଼ିଛନ୍ତି କେନ୍ଦ୍ର ସରକାର। ରାହୁଲ ୧୪ ଦିନ ମଧ୍ୟରେ ନିଜ ନାଗରିତ୍ୱ ସମ୍ପର୍କରେ ସ୍ପଷ୍ଟ କରନ୍ତୁ ବୋଲି ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ତାଙ୍କୁ ନୋଟିସ କରାଯାଇଛି।
ଭାଜପା ଏମ୍ପି ସୁବ୍ରମଣ୍ୟମ୍ ସ୍ବାମୀ ସ୍ବରାଷ୍ଟ୍ର ମନ୍ତ୍ରଣାଳୟରେ ଅଭିଯୋଗ ଆଣିଥିଲେ ଯେ, ରାହୁଲ ବ୍ରିଟେନର ବ୍ୟାକୋପ୍ସ ଲିମିଟେଡ୍ର ନିର୍ଦ୍ଦେଶକ ଓ ସେକ୍ରେଟାରୀ ଭାବେ କାର୍ଯ୍ୟକରିଛନ୍ତି। ଉକ୍ତ କମ୍ପାନୀ ୨୦୦୩ରୁ ବ୍ରିଟେନରେ ପଞ୍ଜୀକୃତ ହୋଇଛି। ହାମମ୍ପଶାୟରସ୍ଥିତ ଓ୍ବିନ୍ଚେଷ୍ଟର, ୫୧ ସାଉଥ୍ଗେଟ୍ ଷ୍ଟ୍ରିଟ୍ ଠିକଣାରେ ଏହା ଅବସ୍ଥିତ। ୨୦୦୫ ଅକ୍ଟୋବର ୧୦ରୁ ୨୦୦୬ ଅକ୍ଟୋବର ୩୧ ମଧ୍ୟରେ କମ୍ପାନୀର ବାର୍ଷିକ ରିଟର୍ନରେ ରାହୁଲଙ୍କ ଜନ୍ମଦିନ ୧୯୭୦ ଜୁନ୍ ୧୯ ବୋଲି ଉଲ୍ଲେଖ ଅଛି। ରାହୁଲ ଏଥିରେ ନିଜକୁ ବ୍ରିଟେନର ଜଣେ ନାଗରିକ ବୋଲି ଦର୍ଶାଇଥିଲେ। ୨୦୦୯ ଫେବୃୟାରୀ ୧୭ରେ କମ୍ପାନୀ ଭଙ୍ଗ ପାଇଁ ଉଦ୍ଦିଷ୍ଟ ଆବେଦନପତ୍ରରେ ମଧ୍ୟ ରାହୁଲଙ୍କୁ ବ୍ରିଟେନର ନାଗରିକ ବୋଲି ଦର୍ଶାଯାଇଥିବା ସୁବ୍ରମଣ୍ୟମ୍ ସ୍ବାମୀ ଅଭିଯୋଗ ଆଣିଛନ୍ତି। ଏହାକୁ ନେଇ ମନ୍ତ୍ରଣାଳୟ ପକ୍ଷରୁ ସୋମବାର ରାହୁଲଙ୍କୁ ଜାରି ଚିଠିରେ ଉଲ୍ଲେଖ କରାଯାଇଛି ଯେ, ବ୍ରିଟେନର ବ୍ୟାକୋପ୍ସ ଲିମିଟେଡ୍ କମ୍ପାନୀ ବାର୍ଷିକ ରିଟର୍ନ ଦାଖଲ କରିବାବେଳେ ସେଥିରେ ରାହୁଲ ନିଜକୁ ଜଣେ ବ୍ରିଟିଶ ନାଗରିକ ବୋଲି ଦର୍ଶାଇଥିଲେ। ତେଣୁ ଏସମ୍ପର୍କିତ ପ୍ରକୃତ ସ୍ଥିତି ମନ୍ତ୍ରଣାଳୟକୁ ଅବଗତ କରାନ୍ତୁ। ଭାଜପା ମୁଖପାତ୍ର ସମ୍ବିତ ପାତ୍ର କହିଛନ୍ତି, ରାହୁଲ ଜଣେ ରହସ୍ୟଜନକ ମଣିଷ। ସେ ଭାରତୀୟ ନା ବ୍ରିଟିଶ ସେନେଇ ସ୍ପଷ୍ଟ କରନ୍ତୁ। କଂଗ୍ରେସ ମୁଖପାତ୍ର ରଣଦୀପ ସୁର୍ଜଓ୍ବୋଲା ଏହାର ଜବାବରେ କହିଛନ୍ତି, ରାହୁଲ ଜଣେ ଭାରତୀୟ। ସ୍ବରାଷ୍ଟ୍ର ମନ୍ତ୍ରଣାଳୟକୁ ନୋଟିସର ମୁହଁତୋଡ଼ ଜବାବ ଦିଆଯିବ। ସେହିପରି ରାହୁଲ ଭାରତରେ ଜନ୍ମ ହୋଇ ବଡ଼ ହୋଇଛନ୍ତି। ତେଣୁ ତାଙ୍କ ନାଗରିକତ୍ୱକୁ ନେଇ ଆସିଥିବା ଅଭିଯୋଗ ଅମୂଳକ ବୋଲି ଭଉଣୀ ତଥା କଂଗ୍ରେସ ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଭଦ୍ରା ମଧ୍ୟ ଖଣ୍ଡନ କରିଛନ୍ତି। ଏହି ବିଷୟରେ ରାହୁଲଙ୍କୁ ଏନ୍ସିପି ସମର୍ଥନ କରିବା ସହ ଏହାକୁ ନିର୍ବାଚନୀ ପ୍ରସଙ୍ଗ କରାଯାଉଛି ବୋଲି ସମାଲୋଚନା କରିଛି।