ଲଣ୍ଡନ,୨୫।୩: ସାରା ବିଶ୍ୱରେ କରୋନା ଭାଇରସ୍ ବେ-ଲଗାମ୍ ହୋଇପଡ଼ିଛି। ଏହାକୁ ରୋକିବା ପାଇଁ ସାରା ଦେଶ ନିଜ ପକ୍ଷରୁ ବିଭିନ୍ନ ସତର୍କତା ଅବଲମ୍ବନ କରିବା ସହ କେତେକ ପଦକ୍ଷେପ ଗ୍ରହଣ କରିଛନ୍ତି। ଏହାରି ଭିତରେ ବ୍ରିଟେନ ରାଜ ପରିବାରରୁ ଏକ ବଡ଼ ଖବର ସାମ୍ନାକୁ ଆସିଛି। କରୋନା କବଳରୁ ରାଜ ପରିବାର ବର୍ତ୍ତିପାରି ନ ଥିବା ବେଳେ ମହାରାଣୀ ଏଲିଜାବେଥ୍ ଦ୍ୱିତୀୟଙ୍କ ବଡ଼ ପୁଅ ପ୍ରିନ୍ସ ଚାଲର୍ସଙ୍କ ରିପୋର୍ଟ ପଜିଟିଭ୍ ଆସିଥିବା ଜଣାପଡ଼ିଛି। ବୁଧବାର ଏନେଇ ବକିଂହାମ୍ ପ୍ୟାଲେସ୍ରୁ ସୂଚନା ମିଳିଛି। ୭୧ ବର୍ଷୀୟ ପ୍ରିନ୍ସ ଚାଲର୍ସଙ୍କୁ ସ୍କଟ୍ଲାଣ୍ଡରେ ଥିବା ଘରେ ଆଇସୋଲେଶନ୍ରେ ରଖାଯାଇ ଚିକିତ୍ସା କରାଯାଉଛି। ଏବେ ତାଙ୍କର ସ୍ବାସ୍ଥ୍ୟାବସ୍ଥା ଠିକ୍ ଥିବା ବେଳେ ଚାଲର୍ସ ଘରେ ରହି କାମ କରିବେ ବୋଲି ସୂଚନା ମିଳିଛି। ସେହିପରି ଚାଲର୍ସଙ୍କ ପତ୍ନୀ ଡଚେସ୍ ଅଫ୍ କର୍ନଓ୍ବାଲଙ୍କ ମଧ୍ୟ କରୋନା ଯାଞ୍ଚ କରାଯାଇଛି। ତେବେ ତାଙ୍କ ରିପୋର୍ଟ ନେଗେଟିଭ୍ ଆସିଛି। ନିକଟରେ ଚାଲ୍ସ ଏକ ଜନସାଧାରଣ କାର୍ଯ୍ୟକ୍ରମରେ ଯୋଗଦେଇଥିଲେ। ସେଠାରୁ ଆସିବା ପରେ ତାଙ୍କ ନିକଟରେ କରୋନା ଲକ୍ଷଣ ଦେଖାଦେଇଥିଲା। ଯାଞ୍ଚ କରାଯିବା ପରେ ବୁଧବାର ତାଙ୍କ ରିପୋର୍ଟ ପଜିଟିଭ୍ ଆସିଛି। ସୂଚନାଯୋଗ୍ୟ, ବ୍ରିଟେନରେ ଏପର୍ଯ୍ୟନ୍ତ କରୋନା ଭାଇରସ୍ରେ ସଂକ୍ରମିତଙ୍କ ସଂଖ୍ୟା ୮ହଜାରରୁ ଊର୍ଦ୍ଧ୍ୱ ହୋଇଥିବା ବେଳେ ଏଥିରେ ୪୦୦ରୁ ଊର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିଛି।