ନୂଆଦିଲ୍ଲୀ,୬ା୭(ପି.ଟି.): ବଜେଟ ଉପସ୍ଥାପନ ବେଳେ ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ପରମ୍ପରା ଭଙ୍ଗକରି ବ୍ରିଫ୍କେସ୍ ବଦଳରେ ଗୃହକୁ ଏକ ଲାଲ୍ ରଙ୍ଗର ସିଲ୍କ ବ୍ୟାଗ୍ରେ ବଜେଟ ଦସ୍ତାବିଜ୍ ଆଣି ଆସିଥିଲେ। ଏହା ବହିଖାତା ପରମ୍ପରାକୁ ମନେପକାଇଦେଇଥିଲା। ଅତୀତରେ ସମସ୍ତ ଅର୍ଥମନ୍ତ୍ରୀ ବଜେଟ ଉପସ୍ଥାପନ ପାଇଁ ବ୍ରିଫ୍କେସ୍ ଧରି ଆସୁଥିଲେ। ଏହା ଉପନିବେଶୀୟ ପରମ୍ପରା ବୋଲି କୁହାଯାଉଥିଲା। ସୀତାରାମନ୍ ଆଣିଥିବା ଲାଲ୍ ବ୍ୟାଗ୍ରେ ଜାତୀୟ ସଙ୍କେତ ରହିଥିଲା।
ପୂର୍ବରୁ ଉପନିବେଶୀୟ ପରମ୍ପରାକ୍ରମେ ସନ୍ଧ୍ୟା ୫ଟାରେ ବଜେଟ ଉପସ୍ଥାପନ କରାଯାଇଆସୁଥିଲା। ଅଟଳ ବିହାରୀ ବାଜପେୟୀଙ୍କ ସରକାରରେ ତତ୍କଳୀନ ଅର୍ଥମନ୍ତ୍ରୀ ଯଶଓ୍ବନ୍ତ ସିହ୍ନା ଏହି ପରମ୍ପରା ଭଙ୍ଗ କରି ପୂର୍ବାହ୍ନ ୧୧ଟାରେ ବଜେଟ ଉପସ୍ଥାପନ କରିଥିଲେ। ସେବେଠାରୁ ପୂର୍ବାହ୍ନରେ ବଜେଟ ଉପସ୍ଥାପନ ହୋଇଆସୁଛି। ଭାରତର ବ୍ୟବସାୟୀମାନେ ପାରମ୍ପରିକ ଭାବେ ହିସାବ ରଖୁଥିବା କାଗଜପତ୍ରକୁ ବହିଖାତା କହୁଥିଲେ। ସରକାର ବଜେଟରେ ଭାରତୀୟ ପରମ୍ପରାକୁ ଅନୁସରଣ କରିଥିବା ମୁଖ୍ୟ ଅର୍ଥନୈତିକ ଉପଦେଷ୍ଟା କ୍ରିଷ୍ଣମୂର୍ତ୍ତି ସୁବ୍ରମଣ୍ୟନ୍ କହିଛନ୍ତି।