ସମ୍ବଲପୁର,୨୯।୧୨(ବ୍ୟୁରୋ): ସମ୍ବଲପୁର ଜିଲା ଠେଲକୋଲି ଥାନା ଆଇସିଆଇସିଆଇ ବ୍ୟାଙ୍କ ବାମଲୋଇ ଶାଖାରେ ରେଙ୍ଗାଲି ବ୍ଲକର ଜମାଖାତାରୁ ଟଙ୍କା ଠକେଇ ହୋଇଛି। ବିଭିନ୍ନ ଯୋଜନାରେ ଥିବା ପେନ୍ସନ ଟଙ୍କାରୁ ୬ ମାସ ଭିତରେ ପ୍ରାୟ ୧୨ ଲକ୍ଷ ୪୭ ହଜାର ୭୦ ଟଙ୍କା ଠକେଇ ହୋଇଛି । ତଦନ୍ତ ପରେ ଏହି ଘଟଣାରେ ସବୁଠାରୁ ଆଶ୍ଚର୍ଯ୍ୟଜନକ ତଥ୍ୟ ସାମ୍ନାକୁ ଆସିଛି । ପୂର୍ବତନ ବିଡିଓଙ୍କ ଦସ୍ତଖତ ଜାଲିଆତି କରି ବ୍ୟାଙ୍କ ମ୍ୟାନେଜର ଅନିର୍ବାଣ ଦେ, କ୍ୟାଶିୟର ସୁଧୀର କୁମାର ମେହେର, ପୂର୍ବତନ କ୍ୟାଶିୟର ତଥା କେନ୍ଦୁଝର ଜିଲାରେ ଏକ ଘରୋଇ ବ୍ୟାଙ୍କରେ କାମ କରୁଥବା ପ୍ରବୀଣ ଭାରତୀଙ୍କୁ ପୋଲିସ ଗିରଫ କରିଛି । ଅଭିଯୁକ୍ତମାନଙ୍କ ସମସ୍ତ ଜମାଖାତାକୁ ବନ୍ଦ କରିବା ପାଇଁ ପୋଲିସ ବ୍ୟାଙ୍କଗୁଡିକୁ ନିର୍ଦ୍ଦେଶ ଦେଇଛି । ଏ ନେଇ ଥାନାରେ କେସ ନଂ. ୧୯୫/୧୯ରେ ପୋଲିସ ଏକ ମାମଲା ରୁଜୁ କରି ଅଭିଯୁକ୍ତମାନଙ୍କୁ କୋର୍ଟ ଚାଲଣା କରିଛି।
ସୂଚନାଯୋଗ୍ୟ, ଉକ୍ତ ବ୍ଲକର ଜମାଖାତା ଆଇସିଆଇସିଆଇ ବ୍ୟାଙ୍କରେ ରହିଛି । ଉକ୍ତ ଟଙ୍କା ପେନ୍ସନ ଆକାଉଣ୍ଟରେ ଜମା ରହିଥିଲା । ନୂତନ ବିଡିଓ ଯୋଗଦାନ ପରେ ଜମା ଖାତାଗୁଡିକ ଯାଞ୍ଚ କରିଥିଲେ । ସେ ସମୟରେ ଟଙ୍କାର ତାଲମେଳ ନ ଥିବା ସେ ଜାଣିବାକୁ ପାଇଥିଲେ । ପରେ ସେ ଡିସେମ୍ବର ୨୪ ତାରିଖ ଥାନାରେ ଅଭିଯୋଗ କରିଥିଲେ । ଅଭିଯୋଗକୁ ନେଇ ପୋଲିସ ତଦନ୍ତ ଆରମ୍ଭ କରିଥିଲା । ପୂର୍ବତନ ବିଡିଓଙ୍କ ଜାଲ ଦସ୍ତଖତରେ ଟଙ୍କା ନଗଦ ଉଠା ହୋଇଥିବା ଜାଣାପଡ଼ିଥିଲା। ପୋଲିସ ତଦନ୍ତ ପରେ ବ୍ୟାଙ୍କ ମ୍ୟାନେଜର ଦେ, କ୍ୟାଶିୟର ମେହେର ଓ ପୂର୍ବତନ କ୍ୟାଶିୟର ପ୍ରବୀଣ ଭାରତୀଙ୍କ ସମ୍ପୃକ୍ତି ଥିବା ଜାଣିବାକୁ ପାଇଥିଲା।