ନାଉଗାଁ,୮ା୧୧(ସ୍ବ.ପ୍ର.): ନାଉଗାଁ ବ୍ଲକ କାର୍ଯ୍ୟାଳୟ ପରିସରରେ ଗୁରୁବାର ବ୍ଲକସ୍ତରୀୟ ଭୀମଭୋଇ ଭିନ୍ନକ୍ଷମ ସାମର୍ଥ୍ୟ ଶିବିର ଅନୁଷ୍ଠିତ ହୋଇଯାଇଛି। ମାତ୍ର ଏହି ଶିବିରରେ ନାନା ଅବ୍ୟବସ୍ଥା ଦେଖିବାକୁ ମିଳିଛି। ଫଳରେ ଏହାକୁ ନେଇ ଅନେକ ଭିନ୍ନକ୍ଷମ ଅସନ୍ତୋଷ ବ୍ୟକ୍ତ କରିଛନ୍ତି। ବିଶେଷକରି ଯେଉଁଠି ଶିବିର ଆୟୋଜନ କରାଯାଇଥିଲା ସେଠାରେ ସ୍ଥାନାଭାବ ଯୋଗୁ ଅନେକ ଭିନ୍ନକ୍ଷମ ବୃଦ୍ଧାବୃଦ୍ଧ ତଳେ ବସିଥିବା ଦେଖିବାକୁ ମିଳିଥିଲା। ଏପରି କି ଶିବିରକୁ ଯିବା ପାଇଁ ଅନେକ ଭିନ୍ନକ୍ଷମ ତଳେ ଘୁଷୁରି ଘୁଷୁରି ଯାଇଥିଲେ। ଶିବିରକୁ ତିରୁଣା ପଞ୍ଚାୟତ ନରଣପୁର ଗ୍ରାମର ଳଳିତା ବଓ୍ବୋ ଆସିଥିଲେ। ତେବେ ସ୍ଥାନାଭାବରୁ ସେ ଶ୍ୱାସରୁଦ୍ଧ ହୋଇ ତଳେ ପଡିଯାଇଥିଲେ। ତାଙ୍କୁ ନାଉଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ଶିବିର ମଧ୍ୟକୁ ଭିନ୍ନକ୍ଷମଙ୍କୁ ନେବା ପାଇଁ ବ୍ଲକ ପ୍ରଶାସନ ପକ୍ଷରୁ କୌଣସି କର୍ମଚାରୀଙ୍କୁ ନିୟୋଜିତ କରାଯାଇ ନ ଥିଲା। ଯଦ୍ଦ୍ବାରା ଭିନ୍ନକ୍ଷମମାନେ ନିଜସ୍ବ ଉଦ୍ୟମରେ ପାହାଚ ଚଢି ଯିବାର ଦେଖା ଯାଇଥିଲା। ସ୍ଥାନାଭାବା ଓ ଅତ୍ୟଧିକ ଭିନ୍ନକ୍ଷମ ଆସିଥିବାବେଳେ ସେମାନଙ୍କ ପାଇଁ ପାନୀୟଜଳ, ପଙ୍ଖା ଆଦିର ବ୍ୟବସ୍ଥା ମଧ୍ୟ କରାଯାଇ ନ ଥିଲା। ଶିବିରରେ ୫୫୩ ଆବେଦନ ପଞ୍ଜୀକୃତ କରାଯାଇଥିଲା। ଏଥିରେ ଅସ୍ଥିଶଲ୍ୟରେ ୨୭୦, ମାନସିକ ଅନଗ୍ରସରରେ ୧୫୮, ଚକ୍ଷୁରେ ୭୩ଟି, ବାକ୍, ଶ୍ରବଣ ଓ ଶକ୍ତିବାଧିତରେ ୪୯ଟି ଓ ଥାଲାସିମିଆରେ ୩ଟି ଅଭିଯୋଗ ଥିଲା। ସମସ୍ତ ବିଭାଗର ଡାକ୍ତର ଯୋଗଦେଇ ପରୀକ୍ଷା କରି ପ୍ରମାଣପତ୍ର ଦେଇଥିଲେ। ଏହାମଧ୍ୟରୁ ୧୨ଜଣ ଆଶାବାଡି, ହୁଇଲ ଚେୟାର ଆଦି ଉପକରଣ ନେବା ପାଇଁ ଆବେଦନ କରିଛନ୍ତି। ଯୋଜନାରେ ନାମ ପଞ୍ଜୀକରଣ କରିଥିବା ଯୋଗ୍ୟ ବ୍ୟକ୍ତିଙ୍କୁ ଚିହ୍ନଟ କରାଯାଇ କମ୍ପ୍ୟୁଟରୀକରଣ ପ୍ରମାଣପତ୍ର ଦିଆଯିବ ବୋଲି ଜନମଙ୍ଗଳ ସମ୍ପ୍ରସାରଣ ଅଧିକାରୀ ଦେବାଶିଷ ସ୍ବାଇଁ କହିଛନ୍ତି। ଶିବିରରେ ଅବ୍ୟବସ୍ଥା ସମ୍ପର୍କରେ ଜନମଙ୍ଗଳ ସମ୍ପ୍ରସାରଣ ଅଧିକାରୀ ସ୍ବାଇଁଙ୍କୁ ପଚାରିବାରେ ସେମିତି କିଛି ହୋଇ ନ ଥିବା କହିଥିଲେ।