ଏରସମା,୨୭ା୪ (ସ୍ବ.ପ୍ର.): କରୋନା ମୁକାବିଲା ଲାଗି ସାମାଜିକ ଦୂରତ୍ୱ ରକ୍ଷା କରିବା ସହ ମାସ୍କ ପିନ୍ଧିବାକୁ ବାଧ୍ୟତାମୂଳକ କରାଯାଇଛି। ଏହି ପରିପ୍ରେକ୍ଷୀରେ ସବୁ ଲୋକଙ୍କୁ ମାସ୍କ ଯୋଗାଇ ଦେବା ଲାଗି ଏରସମା ବ୍ଲକର ମା’ଶକ୍ତି ଏସ୍ଏଚ୍ଜିର ମହିଳାମାନେ ଆଗେଇ ଆସିଛନ୍ତି। ଲୋକଙ୍କ ଆବଶ୍ୟକତା ମୁତାବକ ମାସ୍କ ବଜାରରେ ଉପଲବ୍ଧ ନ ଥିବା ଅଭିଯୋଗ ହେବା ପରେ ମା’ଶକ୍ତି ଏସ୍ଏଚ୍ଜି ପକ୍ଷରୁ ଅଦ୍ୟାବଧି ବ୍ଲକ ପ୍ରଶାସନକୁ ୯୨୦୦ ହାତତିଆରି ମାସ୍କ ଯୋଗାଇ ଦିଆଯାଇଛି। ମିଶନ ଶକ୍ତି ପକ୍ଷରୁ ଜନ ଶିକ୍ଷଣ ସଂସ୍ଥାନ, ଏରସମା ଶାଖା ମା’ଶକ୍ତି ୟୁନିଟର ମହିଳାମାନେ ମାସ୍କ ତିଆରି କରି ଯୋଗାଉଛନ୍ତି। ସଂସ୍ଥାନର ପ୍ରଶିକ୍ଷିକା ସନ୍ଧ୍ୟାରାଣୀ କୁଅଁରଙ୍କ ତତ୍ତ୍ୱାବଧାନରେ ସଙ୍ଗୀତା ସାହୁ, ପ୍ରଭାସିନୀ ଭୋଳ, ପୁଷ୍ପାଞ୍ଜଳି ଭୋଳ, ରୀନାରାଣୀ ବାରିକ, ସୁପ୍ରିୟା ସାହୁ ପ୍ରମୁଖ ବ୍ଲକ ମିଶନ ଶକ୍ତି ଜରିଆରେ ମାସ୍କ ଯୋଗାଇଛନ୍ତି। ଏ ସମ୍ପର୍କରେ ପ୍ରକଳ୍ପ ସଂଯୋଜକ କାର୍ତ୍ତିକ ସ୍ବାଇଁ କହିଛନ୍ତି, ଏହି ମହିଳାମାନେ ମାସ୍କ ଯେଗାଇବାରେ ପ୍ରମୁଖ ଭୂମିକା ଗ୍ରହଣ କରିଛନ୍ତି। ତେଣୁ ସପ୍ତାହ ମଧ୍ୟରେ ଆଉ ୪୨୦୦ ମାସ୍କ ଯୋଗାଇବାର ଲକ୍ଷ୍ୟ ଧାର୍ଯ୍ୟ କରାଯାଇଛି।