ମାଞ୍ଚେଷ୍ଟର, ୩୦ା୬ (ପି.ଟି.): ଆଗକୁ ଇଂଲଣ୍ଡ ବିପକ୍ଷରେ ଖେଳାଯିବାକୁଥିବା ୩ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ବେଳେ ଓ୍ବେଷ୍ଟଇଣ୍ଡିଜ କ୍ରିକେଟ ଖେଳାଳିଙ୍କ ଶାର୍ଟ କଲର୍ରେ ଏକ ଭିନ୍ନ ଧରଣର ଲୋଗୋ ଦେଖିବାକୁ ମିଳିବ। ସେଥିରେ ଲେଖାଥିବ ‘ବ୍ଲାକ୍ ଲିଭ୍ସ ମ୍ୟାଟର’। କ୍ରୀଡ଼ାରେ ବର୍ଣ୍ଣବାଦ ବିରୋଧରେ ପ୍ରତିବାଦ ସ୍ବରୂପ ଓ୍ବେଷ୍ଟଇଣ୍ଡିଜ ଖେଳାଳିମାନେ ଏହି ଲୋଗୋ ବ୍ୟବହାର କରିବାକୁ ନିଷ୍ପତ୍ତି ନେଇଛନ୍ତି। ସୂଚନାଯୋଗ୍ୟ ନିକଟରେ ଆମେରିକାରେ ପୋଲିସ ନିର୍ଯାତନାରେ ଜର୍ଜ ଫ୍ଲଏଡ୍ ନାମକ ଜଣେ କୃଷ୍ଣକାୟଙ୍କ ମୃତ୍ୟୁ ଘଟଣାରେ ବିଶ୍ୱବ୍ୟାପୀ ବିଭିନ୍ନ ଅଞ୍ଚଳରେ ପ୍ରତିକ୍ରିୟା ପ୍ରକାଶ ପାଇଥିଲା। ସମାଜରୁ ବର୍ଣ୍ଣବାଦ ଏବେ ସୁଦ୍ଧା ଦୂର ହୋଇ ନ ଥିବା ପ୍ରମାଣିତ କରୁଛି। ଏଥିପାଇଁ ଆମେ ସମସ୍ତେ ମିଳିମିଶି ସଚେତନତା ସୃଷ୍ଟି କରିବା ଆବଶ୍ୟକ ବୋଲି ଓ୍ବେଷ୍ଟଇଣ୍ଡିଜ ଅଧିନାୟକ ଜାସନ ହୋଲ୍ଡର କହିଛନ୍ତି। ଲୋଗୋର ଡିଜାଇନ୍ କରିଛନ୍ତି ଆଲିଶା ହୋସାନା। ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ଦ୍ୱାରା ଏହା ମଧ୍ୟ ଅନୁମୋଦନ ଲାଭ କରିସାରିଛି। ପ୍ରିମିୟର ଲିଗ୍ ଫୁଟ୍ବଲ ଚଳିତମାସ ପ୍ରଥମ ଭାଗରେ ଆରମ୍ଭ ହୋଇଛି। ଏଥିରେ ଭାଗ ନେଉଥିବା ସମସ୍ତ ୨୦ଟି କ୍ଲବ ସିଜନର ଅବଶିଷ୍ଟ ମ୍ୟାଚ୍ରେ ଏହି ଲୋଗୋ ବ୍ୟବହାର କରିବେ।
