ବିଜେପୁର,୧୫।୪(ଡି.ଏନ୍.ଏ.): ମହାମାରୀ କରୋନା ସଭିଙ୍କ ମୁହଁରୁ ହସ ଛଡାଇ ନେଇଛି। ବର୍ତ୍ତମାନ ସୁଦ୍ଧା ଏହାର ଫଳପ୍ରଦ ଔଷଧ ବାହାରି ନାହିଁ। ଏଣୁ ବ୍ୟକ୍ତିଗତ ସଚେତନତା ହିଁ ଏହାକୁ ପ୍ରତିରୋଧ କରିପାରିବ। ଅପରପକ୍ଷେ ସଂକ୍ରମଣ ଆଶଙ୍କାକୁ ଦେଖି ସରକାର ଲକ୍ଡାଉନ କଟକଣା ଅବଧିକୁ ବଢାଇ ଦେଇଛନ୍ତି। ଘରେ ରହି ଲୋକେ ଏହି ସଂକ୍ରମଣରୁ ମୁକ୍ତି ପାଇଁ ଠାକୁରଙ୍କୁ ପ୍ରାର୍ଥନା କରୁଛନ୍ତି। ଏହିକ୍ରମରେ ବରଗଡ଼ ଜିଲା ବିଜେପୁରର ଜଣେ ଚିତ୍ରଶିଳ୍ପୀ ନିଆରା ଢଙ୍ଗରେ ବ୍ୟଙ୍ଗ ଚିତ୍ରରେ କରୋନା ମୁକ୍ତି ପାଇଁ ଠାକୁରଙ୍କୁ ନିବେଦନ କରିବା ଏଠି ଚର୍ଚ୍ଚାର ବିଷୟ ହୋଇଛି। ସେ ହେଲେ କେଉଁଟିପାଲିର ବିଜୟ ବେଶ୍ରା। ଭାରତ ବର୍ଷରେ ପୁରାଣ ମତାନୁଯାୟୀ ଗଜାନନ ହେଉଛନ୍ତି ଅଗ୍ରପୂଜ୍ୟ। ପୁଣି ସେ ବିଘ୍ନ ବିନାଶ କରନ୍ତି ବୋଲି ତାଙ୍କୁ ବିଘ୍ନ ବିନାଶନ ଭାବେ ପୂଜାର୍ଚ୍ଚନା କରାଯାଏ। ତେଣୁ ଏଭଳି ଘଡିସନ୍ଧି ମୁହୂର୍ତ୍ତରେ ତାଙ୍କର ପୂଜା ଆରାଧନା କଲେ ଏହି ସଂକଟରୁ ମୁକ୍ତି ପାଇବା ବୋଲି ଚିତ୍ର ମାଧ୍ୟମରେ ନିଜର ଚିନ୍ତାଧାରାକୁ ବ୍ୟକ୍ତ କରିଥିବା ସେ ତାଙ୍କର ପ୍ରତିକ୍ରିୟାରେ କହିଛନ୍ତି।