ଅନୁଗୋଳ ଅଫିସ୍, ୫।୨ – ଗୁରୁତର ଅବସ୍ଥାରେ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ ଅଣାଯାଇଥିବା ଜଣେ ମହିଳାଙ୍କୁ ଡାକ୍ତର ମୃତ ଘୋଷଣା କରିବା ସହ ବ୍ୟବଚ୍ଛେଦ ପାଇଁ ପଠାଇ ଦେଇଥିଲେ ବି ପରିବାର ଲୋକେ ମହିଳାଜଣକ ବଞ୍ଚିଥିବା ଭାବି ୨ଥର ବ୍ୟବଚ୍ଛେଦ ଗୃହରୁ କାଜୁଆଲଟିକୁ ଫେରାଇ ଆଣିଥିଲେ। ଏପରି କି ଡାକ୍ତର ଭଲ ଭାବେ ଦେଖୁ ନ ଥିବା ଅଭିଯୋଗ କରି ସେମାନେ ତାତି ଯାଇଥିଲେ। ଖବରପାଇ ଅନୁଗୋଳ ପୋଲିସ ଓ ଏଡିଏମ୍ଓ (ମେଡିକାଲ) ଡାକ୍ତର ପ୍ରତାପ ବେହେରା କାଜୁଆଲିଟିରେ ପହଞ୍ଚି ବୁଝାଶୁଝା କରିବା ପରେ ପରିବାର ଲୋକେ ମୃତଦେହ ବ୍ୟବଚ୍ଛେଦ କରାଇଥିଲେ।
ପୋଲିସ ସୂତ୍ରରୁ ପ୍ରକାଶ ଯେ, ଛେଣ୍ଡିପଦା ଥାନା ମାମୁରିଆ ଅଞ୍ଚଳର ହୀରା ମଲିକ(୫୫)ଙ୍କ ଉଚ୍ଚ ରକ୍ତଚାପ ଥିବାରୁ ଡାକ୍ତରଙ୍କ ପରାମର୍ଶ ଅନୁସାରେ ପରିବାର ଲୋକେ ଏକ ମେଶିନ କିଣି ଆବଶ୍ୟକ ବେଳେ ତାଙ୍କ ପଲ୍ସ ମାପୁଥିଲେ। ମଙ୍ଗଳବାର ଭୋର୍ ସମୟରେ ହଠାତ୍ ହୀରାଙ୍କ ରକ୍ତ ଚାପ ବଢ଼ିବା ସହ ହୃଦ୍ଘାତ ହୋଇଥିଲା। ଗୁରୁତର ଅବସ୍ଥାରେ ପୁଅ ରାଜେଶ ପ୍ରସାଦ ମଲିକ ଓ ଅନ୍ୟମାନେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ନେଇଆସିଥିଲେ। ହେଲେ ଡାକ୍ତର ହୀରାଙ୍କୁ ମୃତ ଘୋଷଣା କରି ବ୍ୟବଚ୍ଛେଦ ପାଇଁ ମୃତଦେହ ପଠାଇ ଦେଇଥିଲେ। ଏହି ସମୟରେ ପରିବାର ଲୋକେ ଆଣିଥିବା ପଲ୍ସ ମେଶିନ୍ କାର୍ଯ୍ୟ କରୁଥିବାରୁ ହୀରା ବଞ୍ଚିଥିବା ଭାବି ତାଙ୍କୁ କାଜୁଆଲଟି ଫେରାଇ ଆଣିବା ସହ ଠିକ୍ ଭାବେ ଡାକ୍ତର ଦେଖୁ ନ ଥିବା ଅଭିଯୋଗ କରିଥିଲେ। ଡାକ୍ତର ପୁନଃ ଯାଞ୍ଚ ପରେ ହୀରା ମୃତ ବୋଲି କହି ବ୍ୟବଚ୍ଛେଦ କରିବାକୁ ପରାମର୍ଶ ଦେଇଥିଲେ। କିନ୍ତୁ ଉକ୍ତ ପଲ୍ସ ମେଶିନ ଯୋଗୁ ହୀରା ବଞ୍ଚିଥିବା ପୁଣି ଦାବି କରି ପରିବାର ଲୋକେ ତାଙ୍କୁ କାଜୁଆଲଟିକୁ ଆଣିଥିଲେ। ଏହାକୁ ନେଇ ଡାକ୍ତରଖାନା ପରିସରରେ ଚାପା ଉତ୍ତେଜନା ପ୍ରକାଶ ପାଇଥିଲା। ଖବରପାଇ ପୋଲିସ ଓ ଏଡିଏମ୍ଓ ମେଡିକାଲରେ ପହଞ୍ଚି ବୁଝାଶୁଝା କରିଥିଲେ। ନିଜେ ଏଡିଏମ୍ଓ ବେହେରା ଯାଞ୍ଚ କରିବା ସହ ହୀରାଙ୍କୁ ମୃତ ଘୋଷଣା କରିଥିଲେ। ଏହାପରେ ପୋଲିସ ମୃତଦେହ ବ୍ୟବଚ୍ଛେଦ କରାଇ ପରିବାର ଲୋକଙ୍କୁ ହସ୍ତାନ୍ତର କରିଥିଲା। ଏ ସମ୍ପର୍କରେ ଏଡିଏମ୍ଓ ବେହେରା କହିଛନ୍ତି, ମୃତ୍ୟୁ ପରେ ବି କିଛି ସମୟ ପର୍ଯ୍ୟନ୍ତ ପଲ୍ସ ମେଶିନ ସାମାନ୍ୟ କାର୍ଯ୍ୟ କରିଥାଏ। ଏହାକୁ ନେଇ ହୀରାଙ୍କ ପରିବାର ଲୋକେ ସନ୍ଦେହରେ ପଡ଼ିଥିଲେ। ତେବେ ବୁଝାଶୁଝା ପରେ ସେମାନେ ମୃତଦେହ ବ୍ୟବଚ୍ଛେଦ କରାଇଥିଲେ ବୋଲି ବେହେରା ପ୍ରକାଶ କରିଛନ୍ତି।