ଢେଙ୍କାନାଳ ଅଫିସ, ୮।୫ – କରୋନା ମାଡ଼ରେ ଦୁର୍ବିସହ ହୋଇପଡ଼ିଛି କ୍ଷୁଦ୍ର ବ୍ୟବସାୟୀଙ୍କ ଜୀବନଜୀବିକା। ଦେଢ଼ମାସ ହେଲା ଦୋକାନ ବନ୍ଦ ରହିବା ଯୋଗୁ ଦୋହଲି ଯାଇଛି ସେମାନଙ୍କ ଆର୍ଥିକ ସ୍ଥିତି। ଦୈନିକ ଦୋକାନ ଖୋଲି ଗୁଜରାଣ ମେଣ୍ଟାଉଥିବା ସେଲୁନ ଏବଂ ମିଠା ଦୋକାନୀ ଦୁର୍ଦ୍ଦିନରେ କାଳାତିପାତ କରୁଛନ୍ତି। ଦିନକୁ ଦିନ ପରିବାର ପୋଷଣ ଚିନ୍ତା ବଢୁଥିବାବେଳେ ବ୍ୟବସାୟୀମାନେ ଗୁରୁବାର ଢେଙ୍କାନାଳ ଜିଲାପାଳ ଭୂମେଶ ଚନ୍ଦ୍ର ବେହେରାଙ୍କ ଦ୍ୱାରସ୍ଥ ହୋଇ ସହାୟତା ନିବେଦନ କରିଛନ୍ତି।
କରୋନା ପ୍ରଭାବିତ ଢେଙ୍କାନାଳ ଜିଲା ଅରେଞ୍ଜ ଜୋନ୍ରେ ରହିଛି। ଲକ୍ଡାଉନ୍ ନିୟମ କଟକଣା ଯୋଗୁ ମିଠା ଏବଂ ସେଲୁନ୍ ଦୋକାନୀ ଦୋକାନ ଖୋଲିପାରୁନାହାନ୍ତି। ଦିନକୁ ଦିନ ସମସ୍ୟା ଜଟିଳ ହେଉଥିବାରୁ ଗୁରୁବାର ମା’ ଅନ୍ନପୂର୍ଣ୍ଣା ବାରିକ ୱେଲଫେୟାର ଆସୋସିଏଶନର କର୍ମକର୍ତ୍ତାମାନେ ସାମାଜିକ କର୍ମୀ ରାମଚନ୍ଦ୍ର ପାତ୍ରଙ୍କ ନେତୃତ୍ୱରେ ଜିଲାପାଳଙ୍କୁ ଭେଟିଥିଲେ। ସହରରେ ୧୫୦ଟି ସେଲୁନ ରହିଛି। ଏଠାରେ ବହୁ କାରିଗର କାମ କରୁଛନ୍ତି। ଏବେ ଦୋକାନରେ ତାଲା ଝୁଲୁଥିବାରୁ ପେଟପାଟଣା ଚିନ୍ତା ଘାରିଥିବା ସଂଘର ଅମରେନ୍ଦ୍ର ବାରିକ, ଟଙ୍କଧର ବାରିକ, ଦୁଃଶାସନ ବାରିକ, ତପନ ବାରିକ, ସମ୍ପାଦକ ସୋମନାଥ ବାରିକ ପ୍ରମୁଖ କହିଛନ୍ତି। ସେହିପରି ମିଠା ଦୋକାନୀମାନେ ମଧ୍ୟ ସହାୟତା କରିବାକୁ ଅନୁରୋଧ କରିଛନ୍ତି।
ଏ ନେଇ ଜିଲାପାଳ କୁହନ୍ତି, ସରକାରୀସ୍ତରରେ ୧୭ ତାରିଖ ଯାଏ ଗାଇଡ୍ଲାଇନ୍ ରହିଛି। ଏହାପରେ ଆଲୋଚନା କରି ଯାହାକିଛି ପଦକ୍ଷେପ ନିଆଯିବ।