ପୁରୀ ଅଫିସ,୨୮।୨: ଶ୍ରୀମନ୍ଦିରରେ ଅନେକ ସମୟରେ ନୀତିରେ ବିଳମ୍ବ ହେଉଛି। ଏଥିଯୋଗୁ ଶ୍ରଦ୍ଧାଳୁମାନେ ଠିକ୍ ଭାବେ ଠାକୁରଙ୍କୁ ଦର୍ଶନ କରିପାରୁ ନ ଥିବାବେଳେ ମହାପ୍ରସାଦ ବାହାରିବାରେ ଡେରି ହେଉଛି। ଫଳରେ ବିଭିନ୍ନ ସମୟରେ ଭକ୍ତ ଅବଢା ନ ପାଇ ଫେରିବାକୁ ବାଧ୍ୟ ହେଉଛନ୍ତି। ତେଣୁ ନୀତିକାନ୍ତିଙ୍କୁ କିପରି ସୁବ୍ୟବସ୍ଥିତ କରାଯିବ ସେ ନେଇ ତତ୍ପରତା ଦେଖାଇଛି ଶ୍ରୀମନ୍ଦିର ପ୍ରଶାସନ। ଏଣିକି ପ୍ରତ୍ୟହ ସନ୍ଧ୍ୟା ୬ଟାରୁ ରାତି ୮ଟା ପର୍ଯ୍ୟନ୍ତ ୨ ଘଣ୍ଟା ନୀତି ପ୍ରଶାସକ ଶ୍ରୀମନ୍ଦିର ପରିସର ଶାଖା କାର୍ଯ୍ୟାଳୟରେ ବସିବେ। ନୀତି କିପରି ଧାର୍ଯ୍ୟ ସମୟରେ ସମ୍ପାଦିତ ହେବ ତାହା ଉପରେ ନଜର ରଖିବେ ଏବଂ ଏ ସଂକ୍ରାନ୍ତୀୟ ଅଭିଯୋଗ ମଧ୍ୟ ଶୁଣିବେ। ଗୁରୁବାରଠାରୁ ଶାଖା କାର୍ଯ୍ୟାଳୟ ପରିସରରେ ନୀତି ପ୍ରଶାସକଙ୍କ ପାଇଁ ଏକ ସ୍ବତନ୍ତ୍ର ପ୍ରକୋଷ୍ଠ କାର୍ଯ୍ୟକ୍ଷମ ହୋଇଛି।
ମହାପ୍ରଭୁଙ୍କ ସେବାପୂଜାରେ ବିଳମ୍ବ ସଂକ୍ରାନ୍ତରେ ପୂର୍ବରୁ କଠୋର ଆଭିମୁଖ୍ୟ ଗ୍ରହଣ କରିଥିଲା ଶ୍ରୀମନ୍ଦିର ପ୍ରଶାସନ। ଯେଉଁ ପାଳିଆ ସେବକ ତିନିଥର ନୀତିରେ ବିଳମ୍ବ କରିବେ ତାଙ୍କୁ ସେବାରୁ ବହିଷ୍କାର କରାଯିବ। ଏପରି କି ଜାଣିଶୁଣି ଯଦି କେହି ଥରେ ବି ବିଳମ୍ବ କରୁଥିବା ଜଣାପଡ଼ିିବ ତେବେ ଶାଢିବନ୍ଧା ରଦ୍ଦ ସହିତ ତାଙ୍କୁ ମଧ୍ୟ ସେବାରୁ ବିଦା କରାଯିବ ବୋଲି ଗତବର୍ଷ ଜାନୁୟାରୀ ୨୯ ତାରିଖ ପରିଚାଳନା କମିଟି ବୈଠକରେ ନିଷ୍ପତ୍ତି ହୋଇଥିଲା। ଏହାପରେ କିଛି ମାସ ଠାକୁରଙ୍କ ନୀତିକାନ୍ତି ଠିକ୍ଠାକ ଚାଲିଲା। ପରବର୍ତ୍ତୀ ସମୟରେ ଏହା ଅକାମୀ ହୋଇପଡ଼ିିଲା। ଗତ କିଛିମାସ ହେବ ପୁଣି ନୀତିକାନ୍ତି ବିଳମ୍ବ ହେଉଛି। ଗତ ୨୪ ତାରିଖରେ ସୁଆର ମହାସୁଆର ନିଯୋଗ ମଧ୍ୟ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କୁ ସ୍ମାରକପତ୍ର ଦେଇଛି। ଏଥିରେ ନିଯୋଗ ଦର୍ଶାଇଥିଲା ଯେ, ଶ୍ରୀମନ୍ଦିରରେ ବ୍ୟବସ୍ଥାବଳୀ ଲାଗୁ ହେବାଠାରୁ ଭୋଗମଣ୍ଡପ ଧାର୍ଯ୍ୟ ସମୟରେ ସରୁଥିବାରୁ ଭକ୍ତ ଓ ଜନସାଧାରଣ ବିକ୍ରି ଭୋଗ ଓ ବରାଦି ଭୋଗ ଠିକ୍ ସମୟରେ ପାଇ ଆନନ୍ଦିତ ହେଉଥିଲେ। ପ୍ରାୟ ୨ ମାସ ହେବ ଶ୍ରୀମନ୍ଦିର ନୀତି ଧାର୍ଯ୍ୟ ସମୟଠାରୁ ବିଳମ୍ବରେ ସରୁଛି। ନୀତିକାନ୍ତି ଠିକ୍ ଭାବେ ତଦାରଖ କରାଯାଉ ନ ଥିବାରୁ ଭକ୍ତମାନେ ଦର୍ଶନ କରି ମହାପ୍ରସାଦ ନ ପାଇ ମନଦୁଃଖରେ ଫେରୁଛନ୍ତି। ସୂପକାର ସଭ୍ୟମାନେ ଧାର୍ଯ୍ୟ ସମୟ ମଧ୍ୟରେ ଭୋଗ ରନ୍ଧନ କରୁଛନ୍ତି। କିନ୍ତୁ ଭୋଗ ନିର୍ଘଣ୍ଟ ସମୟରେ ସରୁ ନ ଥିବାରୁ ମହାପ୍ରସାଦ ଯୋଗାଇ ନ ପାରି ଅଯଥାରେ ନିନ୍ଦିତ ହେଉଛନ୍ତି। ତେଣୁ ଧାର୍ଯ୍ୟ ସମୟରେ କିପରି ନୀତି ସମ୍ପାଦିତ ହେବ ତାହାର ତଦାରଖ ଲାଗି ନୀତି ପ୍ରଶାସକ ପ୍ରତ୍ୟହ ୨ ଘଣ୍ଟା ଶ୍ରୀମନ୍ଦିର ଶାଖା କାର୍ଯ୍ୟାଳୟରେ ବସିବା ଲାଗି ସ୍ଥିର ହୋଇଛି। ଏଥିସହ ନୀତି ସଂକ୍ରାନ୍ତୀୟ ଅଭିଯୋଗ ମଧ୍ୟ ଶୁଣିବେ। ପୂର୍ବରୁ ଦିନବେଳା ଯେପରି ନୀତି ପ୍ରଶାସକ ନୀତିର ତଦାରଖ କରୁଥିଲେ ସେପରି କରିବେ। ସନ୍ଧ୍ୟାରେ ଶ୍ରୀମନ୍ଦିର ଶାଖା କାର୍ଯ୍ୟାଳୟରେ ପହଞ୍ଚତ୍ ନୀତିକାନ୍ତି କଥା ବୁଝିବେ ବୋଲି ଜଣାପଡ଼ିିଛି ।