ଭାପୁର, ୨୧।୭(ଡି.ଏନ.ଏ.) – ଢେଙ୍କାନାଳ ସଦର ଏବଂ ଓଡ଼ାପଡ଼ା ବ୍ଲକ ଅଞ୍ଚଳରେ ହାତୀ ଉପଦ୍ରବ ବଢ଼ିବାରେ ଲାଗିଛି। ବ୍ୟସ୍ତବହୁଳ ରାସ୍ତାରେ ହାତୀଙ୍କ ବିଚରଣ ପଥଚାରୀଙ୍କ ଜୀବନକୁ ବିପଦରେ ପକାଉଛି। ରାସ୍ତା ପାର୍ଶ୍ୱରେ ସୃଷ୍ଟି ହୋଇଥିବା ଘଞ୍ଚ ବୁଦା ଆଢୁଆଳରେ ରହୁଥିବା ହାତୀ ହଠାତ୍ ପଦାକୁ ବାହାରି ଆକ୍ରମଣ କରୁଛନ୍ତି। ଏହାକୁ ନେଇ ମହୁଲପୁଞ୍ଜି-ଟେଣୁଆ ଏବଂ ଘଟିପିରି-କଳାଙ୍ଗ ରାସ୍ତାରେ ଦିନବେଳା ବି ଯାତାୟାତ କରିବାକୁ ଲୋକମାନେ ଭୟ କରୁଛନ୍ତି।
ପ୍ରତିବର୍ଷ ବଡ଼ମ୍ବା ସଂରକ୍ଷିତ ଜଙ୍ଗଲରୁ ହାତୀପଲ କଳାଙ୍ଗ ଅଞ୍ଚଳକୁ ଆସି ବର୍ଷା ଆରମ୍ଭ ହେଲେ ଫେରିଯାଇଥାନ୍ତି। ଚଳିତ ବର୍ଷ ମୌସୁମୀ ବର୍ଷା ଆରମ୍ଭ ହେବା ପରେ ଉକ୍ତ ହାତୀପଲକୁ ଆଉ ଦେଖିବାକୁ ମିଳୁନାହିଁ। ସେମାନେ ନିଜ ଆବାସସ୍ଥଳୀକୁ ଫେରି ଯାଇଥିବା ଅନୁମାନ କରାଯାଉଛି। ହେଲେ ଏବେ ଅଞ୍ଚଳବାସୀଙ୍କ ଚିନ୍ତା ବଢ଼ାଇଛନ୍ତି ୭୦ରୁ ଊର୍ଦ୍ଧ୍ୱ ଝାଡ଼ଖଣ୍ଡୀ ହାତୀ। ସେମାନେ ଏବେ ସୁଦ୍ଧା ସ୍ଥାନ ପରିବର୍ତ୍ତନ କରିନାହାନ୍ତି। ଉକ୍ତ ହାତୀପଲ ମହୁଲପୁଞ୍ଜି-ଟେଣୁଆ ଏବଂ ଘଟିପିରି-କଳାଙ୍ଗ ରାସ୍ତା ମଧ୍ୟରେ ଦିନବେଳା ପାର୍ ହେଉଛନ୍ତି। ରାସ୍ତାକଡ଼ରେ ବଢ଼ିଥିବା ଗୁଳ୍ମଜାତୀୟ ଗଛ ସେମାନଙ୍କ ଖାଦ୍ୟାଭାବ ଦୂର କରୁଛି। ଦୀର୍ଘସମୟ ଯାଏ ସେମାନେ ରାସ୍ତାପାର୍ଶ୍ୱରେ ଛିଡ଼ାହୋଇ ଡାଳ ଭାଙ୍ଗି ଖାଉଛନ୍ତି। ଫଳରେ ଯାତାୟାତ ବାଧାପ୍ରାପ୍ତ ହେଉଛି। ଅନେକ ସମୟରେ ରାସ୍ତା ଉପରକୁ ମାଡ଼ି ଆସିଥିବା ଲଟାବୁଦା ଯୋଗୁ ହାତୀଙ୍କ ଉପସ୍ଥିତି ଜାଣିବା ସମ୍ଭବ ହେଉନାହିଁ। ଏହି କାରଣରୁ ଓସ୍ତପାଳ ଏବଂ ହରିଡ଼ାପଶି ଗ୍ରାମର ୨ଜଣ ବ୍ୟକ୍ତି ଦୁଇମାସ ମଧ୍ୟରେ ହାତୀ ଆକ୍ରମଣର ଶିକାର ହୋଇ ପ୍ରାଣ ହରାଇଛନ୍ତି। ପଲରେ ଥିବା କେତୋଟି ଦନ୍ତା ଅତ୍ୟଧିକ ହିଂସ୍ର ଆଚରଣ ପ୍ରଦର୍ଶନ କରୁଛନ୍ତି। ଏହାକୁ ନେଇ ଭୟ ଆତଙ୍କ ଭିତରେ ଦିନ କାଟୁଛନ୍ତି ଅଞ୍ଚଳବାସୀ। ବନ ବିଭାଗ ଅଧୀନରେ ଥିବା ମହୁଲପୁଞ୍ଜି-ଟେଣୁଆ ରାସ୍ତା ପାର୍ଶ୍ୱର ବୁଦା ସଫା କରିବାକୁ ବାରମ୍ବାର ଦାବି କରାଯାଇଥିଲେ ମଧ୍ୟ କେହି ଦୃଷ୍ଟି ଦେଉ ନ ଥିବା ଗ୍ରାମବାସୀ କହିଛନ୍ତି।
ଏ ନେଇ ଭାପୁର ବନପାଳ ପ୍ରଭାକର ରଣା କୁହନ୍ତି, ରାସ୍ତା ସଫା କରିବାକୁ ବିଭାଗୀୟ ନିର୍ଦ୍ଦେଶ ନାହିଁ। ହାତୀ ଉପଦ୍ରବ ସମ୍ପର୍କରେ ଅଧିକାରୀଙ୍କୁ ଜଣାଇବୁ। ଉପରୁ ନିର୍ଦ୍ଦେଶ ଆସିବାପରେ ତଦନୁଯାୟୀ କାର୍ଯ୍ୟପନ୍ଥା ଗ୍ରହଣ କରାଯିବ। ସେହିପରି ଗ୍ରାମ୍ୟ ଉନ୍ନୟନ ବିଭାଗ ଅଧୀନରେ ଥିବା ଘଟିପିରି-କଳାଙ୍ଗ ରାସ୍ତାପାର୍ଶ୍ୱ ସଫେଇ ସମ୍ପର୍କରେ କନିଷ୍ଠ ଯନ୍ତ୍ରୀ ଉଦୟନାଥ ଖଟୁଆ କୁହନ୍ତି, ଲଟାବୁଦା ସଫା କରିବାକୁ ବନ ବିଭାଗର ଅନୁମତି ଲୋଡ଼ା। ଏଥିଲାଗି ନିବେଦନ କରାଯାଇଛି। ନିର୍ଦ୍ଦେଶ ମିଳିଲେ ସଫେଇ ଆରମ୍ଭ ହେବ ବୋଲି ସେ ସୂଚନା ଦେଇଛନ୍ତି।