ଢେଙ୍କାନାଳ ଅଫିସ,୨୫ା୧୧-ଢେଙ୍କାନାଳ ସଦର ଥାନା ସିମିନଈସ୍ଥିତ ଏଚ୍ଡିଏଫ୍ସି ବ୍ୟାଙ୍କ ଶାଖାରୁ ୨୦୧୭ରେ ସଙ୍ଗଠିତ ଲୁଟ୍ ମାମଲାର ରାୟ ସୋମବାର ପ୍ରକାଶ ପାଇଛି।
ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ୍ ମୁକ୍ତିରଞ୍ଜନ ଶତପଥୀ ଘଟଣାର ଅନ୍ୟତମ ଅଭିଯୁକ୍ତ ସୋଗରପଶି ଗ୍ରାମର ମାନସ କୁମାର ଷେଣ୍ଢ (୪୦)ଙ୍କୁ ଦୋଷୀ ସାବ୍ୟସ୍ତ କରିବା ସହ ୭ବର୍ଷ ସଶ୍ରମ କାରାଦଣ୍ଡାଦେଶ ଶୁଣାଇଛନ୍ତି। ଏଥିସହ ୩୦ହଜାର ଟଙ୍କା ଜରିମାନା ଏବଂ ଅନାଦାୟେ ଅଧିକ ବର୍ଷେ ଜେଲ୍ ଭୋଗିବାକୁ ରାୟରେ ଉଲ୍ଲେଖ କରିଛନ୍ତି। ସରକାରଙ୍କ ପକ୍ଷରୁ ଅତିରିକ୍ତ ପବ୍ଲିକ ପ୍ରସିକ୍ୟୁଟର ଅକ୍ଷୟ ଭୋଇ ଏବଂ ପ୍ରମିଳା ମହାପାତ୍ର ମାମଲା ପରିଚାଳନା କରିଥିଲେ। ଅନ୍ୟପଟେ ଫେରାର ଥିବା ଅନ୍ୟ ୪ଜଣଙ୍କ ବିରୋଧରେ କୋର୍ଟ ଓ୍ବାରେଣ୍ଟ ଜାରି କରିଛନ୍ତି।
ମାମଲାର ବିବରଣୀ ଅନୁଯାୟୀ, ୨୦୧୭ ଏପ୍ରିଲ ୧୩ ଅପରାହ୍ନ ୧୨ଟାରେ ୪ଜଣ ବନ୍ଧୁକଧାରୀ ବ୍ୟାଙ୍କରେ ପଶି ଆତଙ୍କ ସୃଷ୍ଟି କରିଥିଲେ। ଲୁହାରଡ୍ରେ ସିସିଟିଭି କ୍ୟାମେରା ଭାଙ୍ଗି ନଗଦ ୪ଲକ୍ଷ ୮୮ ହଜାର ଟଙ୍କା, କର୍ମଚାରୀଙ୍କ ମୋବାଇଲ ଫୋନ, କମ୍ପ୍ୟୁଟର, ସିପିୟୁ ଏବଂ ମନିଟର ନେଇଯାଇଥିଲେ। ଏ ନେଇ ବ୍ୟାଙ୍କ ମ୍ୟାନେଜର ଶକ୍ତିଶଙ୍କର ବେହେରାଙ୍କ ଅଭିଯୋଗକ୍ରମେ ସଦର ଥାନାରେ ନଂ. ୧୩୦/୧୭, ଦଫା ୩୯୫ ଅନୁଯାୟୀ ମାମଲା ରୁଜୁ କରାଯାଇଥିଲା। ଘଟଣାର ତଦନ୍ତ କରି ପୋଲିସ ୬ଜଣଙ୍କୁ ଅଟକ ରଖିଥିଲା। ଟିଆଇ ପରେଡ୍ରେ ସେମାନଙ୍କ ମଧ୍ୟରେ ଜଣେ ନାବାଳକ ଥିବା ଜଣାପଡ଼ିଥିଲା। ତାଙ୍କ ମାମଲା ଜୁଭେନାଇଲ କୋର୍ଟରେ ବିଚାରାଧୀନ ରହିଛି। ଫେରାର ଅଭିଯୁକ୍ତ ଟାଉନ ଥାନା ଅଞ୍ଚଳର ପ୍ରକାଶ ବେହେରା ଓରଫ୍ ଚିକୁ, ବାଜିଚୌକର ଶିବରାମ ରାଉତ ଓରଫ୍ ଶିବୁ, ଦୋଳମଣ୍ଡପ ସାହିର ସୌମ୍ୟରଞ୍ଜନ ମାଟି ଓରଫ୍ ଚିମ୍ପୁ, ସିମିଳିଆ ଅଞ୍ଚଳର ସୁଜିତ କୁମାର ରାଉତ ଓରଫ୍ ଲିପୁ କୋର୍ଟରେ ଅନୁପସ୍ଥିତ ଥିଲେ। ତେଣୁ ସେମାନଙ୍କ ଦଣ୍ଡବିଧାନର ଶୁଣାଣି କରା ନ ଯାଇ ସେମାନଙ୍କ ବିରୋଧରେ ଓ୍ବାରେଣ୍ଟ ଜାରି କରାଯାଇଛି।