ରୂପ୍ସା, ୧୨।୭(ଡି.ଏନ.ଏ.): ବାଲେଶ୍ୱର ସଦର ବ୍ଲକ ଅନ୍ତର୍ଗତ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ, ଶ୍ରୀରାମପୁର ଶାଖାରୁ ଗୁରୁବାର ୩୨ଲକ୍ଷ ୪୨ହଜାର ଟଙ୍କା ଡକାୟତି ହୋଇଥିବା ଫିଲ୍ଡ଼ ଅଫିସର ଲିଙ୍ଗରାଜ ସାହୁ ବସ୍ତା ଥାନାରେ ଲିଖିତ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ଥାନାରେ ଏକ ମାମଲା (ନଂ. ୧୮୭/୧୯) ରୁଜୁ କରି ପୋଲିସ ଡକାୟତଙ୍କୁ ଧରିବା ପାଇଁ ଜାଲ ବିଛାଇଛି। ଏସ୍ପି ବି. ଯୁଗଳ କିଶୋର କୁମାରଙ୍କ ନିର୍ଦ୍ଦେଶକ୍ରମେ ବରିଷ୍ଠ ପୋଲିସ ଅଧିକାରୀଙ୍କୁ ନେଇ ଏକ ସ୍ବତନ୍ତ୍ର ଟିମ୍ ଗଠନ କରାଯାଇଛି। ଗୁରୁବାର ସନ୍ଧ୍ୟାରେ ଏସ୍ପିଙ୍କ ସମେତ ସଦର ଏସ୍ଡ଼ିପିଓ ପ୍ରଭାସ ଚନ୍ଦ୍ର ପାଲ, ବସ୍ତା ଏସ୍ଡ଼ିପିଓ ରଣଜିତ ପୃଷ୍ଟି, ବସ୍ତା ଆଇଆଇସି ଧନେଶ୍ୱର ସାହୁ, ରୂପ୍ସା ଓଆଇସି ସୁଚନ୍ଦ୍ର ମହାଳିକ ପ୍ରମୁଖ ବ୍ୟାଙ୍କରେ ପହଞ୍ଚତ୍ ଅନୁଧ୍ୟାନ କରିଥିଲେ। ଅପରପକ୍ଷରେ ସନ୍ଧାନୀ କୁକୁର ସହ ସାଇଣ୍ଟିଫିକ୍ ଟିମ୍ ପହଞ୍ଚତ୍ ତଦନ୍ତ ଆରମ୍ଭ କରିଛନ୍ତି।
ଗୁରୁବାର ଅପରାହ୍ନ ୧ଟା ୨୦ମିନିଟ୍ ସମୟରେ ୨ଟି ପଲସର୍ରେ ୬ଜଣ ଦୁର୍ବୃତ୍ତ ଆସି ବ୍ୟାଙ୍କରେ ଲୁଟ୍ପାଟ୍ କରିଥିଲେ। ବ୍ୟାଙ୍କ କର୍ମଚାରୀ ଓ ଗ୍ରାହକଙ୍କୁ ମାରଣାସ୍ତ୍ର ସହ ବନ୍ଧୁକ ଦେଖାଇ ଭୟଭୀତ କରାଇଥିଲେ। ମାତ୍ର ୧୦ମିନିଟ୍ ମଧ୍ୟରେ ଷ୍ଟ୍ରଙ୍ଗରୁମ୍ ଓ କ୍ୟାଶ୍ କାଉଣ୍ଟରରେ ଥିବା ୩୨ଲକ୍ଷ ୪୨ହଜାର ଟଙ୍କା ନେଇ ବ୍ୟାଙ୍କ ବାହାରୁ ତାଲା ପକାଇ ଚମ୍ପଟ ମାରିଥିଲେ। ଫିଲ୍ଡ଼ ଅଫିସର ଓ ୨ଜଣ ଗ୍ରାହକଙ୍କଠାରୁ ୩ଟି ମୋବାଇଲ ନେଇ ଯାଇଥିଲେ। ପୋଲିସ ଗାନ୍ଧୀଛକ-ମଥାନୀ ରାସ୍ତାରେ ପଡ଼ିଥିବା ଫିଲ୍ଡ଼ ଅଫିସରଙ୍କ ମୋବାଇଲ ଉଦ୍ଧାର କରିଛି। ବ୍ୟାଙ୍କ ପରିସରରୁ ୪ଟି ବୋମା ଓ ଗୋଟିଏ କଟର ମେଶିନ୍ ଜବତ କରାଯାଇଥିଲା। ତେବେ ଦୁର୍ବୃତ୍ତମାନେ ପଶ୍ଚିମବଙ୍ଗ ଅଞ୍ଚଳର ହୋଇଥାଇ ପାରନ୍ତି ବୋଲି ପୋଲିସ ଅନୁମାନ କରିବା ପରେ ଶୁକ୍ରବାର ଆଇଆଇସି ସାହୁଙ୍କ ତତ୍ତ୍ୱାବଧାନରେ ଏକ ସ୍ବତନ୍ତ୍ର ପୋଲିସ ଟିମ୍ ପଶ୍ଚିମବଙ୍ଗରେ ଛାନଭିନ୍ ଆରମ୍ଭ କରିଛି।