ଜଗତ୍ସିଂହପୁର ଅଫିସ,୩ା୭: ବ୍ୟାଙ୍କଗୁଡିକ କେବଳ ଟଙ୍କା ଜମା ଉପରେ ଗୁରୁତ୍ୱ ଦେଉଛନ୍ତି। କିନ୍ତୁ ଋଣ ଦେବା ନଁା ଧରୁନାହାନ୍ତି। ଯେଉଁଥିପାଇଁ ଜଗତ୍ସିଂହପୁର ଜିଲାରେ କ୍ରେଡିଟ୍ ଡେବିଟ୍ ଅନୁପାତ ୪୦%ରୁ କମ ରହୁଛି। ଏହା ସରକାରଙ୍କ ଉଦ୍ଦେଶ୍ୟ ନୁହେଁ। ତେଣୁ ବ୍ୟାଙ୍କଗୁଡିକ ଋଣ ଦେବା ଉପରେ ଗୁରୁତ୍ୱ ଦିଅନ୍ତୁ। ବିଶେଷକରି ଶିକ୍ଷା, କୃଷି ଓ ଗୃହ ନିର୍ମାଣ ପାଇଁ ଋଣ ଦେବାକୁ ପ୍ରାଥମିକତା ଦିଅନ୍ତୁ। ମଙ୍ଗଳବାର ଜିଲାପାଳଙ୍କ କାର୍ଯ୍ୟାଳୟ ପରିସର ସଦ୍ଭାବନା ସଭାଗୃହରେ ବ୍ୟାଙ୍କ ସମୂହ ଜିଲା ପରାମର୍ଶଦାତା କମିଟି ଏବଂ ଜିଲାସ୍ତରୀୟ ସମୀକ୍ଷା ବୈଠକରେ ପୌରୋହିତ୍ୟ କରି ଜିଲାପାଳ ଏହା କହିଛନ୍ତି। ଚଳିତ ମାସ ଶେଷ ସୁଦ୍ଧା ବ୍ୟାଙ୍କଗୁଡିକ ଅଧିକ ୧% ଋଣ ପ୍ରଦାନ କରିବାକୁ ଜିଲାପାଳ ଉପସ୍ଥିତ ବ୍ୟାଙ୍କଗୁଡିକର ଶାଖା ପରିଚାଳକଙ୍କୁ ପରାମର୍ଶ ଦେଇଥିଲେ। ଏହି ଅବସରରେ ସେ ଶିକ୍ଷା, କୃଷି ଓ ଗୃହ ନିର୍ମାଣ ହାର ଜାଣିବା ପାଇଁ ଚାହିଁଥିଲେ ସୁଦ୍ଧା କେହି କିଛି କହି ନ ଥିଲେ। ବ୍ୟାଙ୍କଗୁଡିକର ଶାଖା ପରିଚାଳକଙ୍କ ଏଭଳି ନୀରବତା ଜିଲାପାଳଙ୍କୁ ବିସ୍ମିତ କରିଥିଲା। ପରୋକ୍ଷରେ ବ୍ୟାଙ୍କଗୁଡିକ ଲୋକଙ୍କୁ ଋଣ ଦେବାରେ କୁଣ୍ଠାପ୍ରକାଶ କରୁଥିବା ବାରି ହୋଇ ଯାଉଛି ବୋଲି ଜିଲାପାଳ କହିଥିଲେ। ଜଗତ୍ସିଂହପୁର ଏକ ଶିକ୍ଷିତ ଜିଲା ହୋଇଥିବାରୁ ଶିକ୍ଷା ଋଣ ନେବା ପାଇଁ ଅଧିକାଂଶ ଇଚ୍ଛା ପ୍ରକାଶ କରିଥାନ୍ତି। କିନ୍ତୁ ବ୍ୟାଙ୍କ କର୍ମଚାରୀ ସେମାନଙ୍କୁ ନିରାଶ କରୁଛନ୍ତି। ଯେଉଁ କାରଣରୁ ଜିଲାରେ ଶିକ୍ଷା ଋଣ ହାର ବହୁତ କମ। ସେହିପରି ଜଗତ୍ସିଂହପୁର ଏକ କୃଷି ପ୍ରଧାନ ଜିଲା ହୋଇଥିବାରୁ କୃଷି ଋଣ ନେବା ପାଇଁ ଚାଷୀ ଚାହିଁ ବସିଥାନ୍ତି। ହେଲେ ଚାଷୀଙ୍କୁ ଋଣ ଦେବା ପାଇଁ ବ୍ୟାଙ୍କଗୁଡିକ କୁଣ୍ଠାବୋଧ କରୁଛନ୍ତି। ବ୍ୟାଙ୍କଗୁଡିକ ପାଖରେ ଋଣ ପ୍ରଦାନ ସମ୍ପର୍କିତ କୌଣସି ତଥ୍ୟ ନ ଥିବାରୁ ଜିଲାପାଳ ଅସନ୍ତୋଷ ପ୍ରକାଶ କରିଥିଲେ।
ଏଥିରେ ମିଶନ ଶକ୍ତି, ସ୍ବୟଂ ସହାୟକ ଗୋଷ୍ଠୀ, ଯୁବ ଉଦ୍ୟୋଗୀ, ଚାଷୀଙ୍କୁ ଋଣ ପ୍ରଦାନ ଉପରେ ମଧ୍ୟ ଗୁରୁତ୍ୱାରୋପ କରାଯାଇଥିଲା। ସରକାରଙ୍କ ଅନେକ ଜନ କଲ୍ୟାଣକାରୀ ଯୋଜନାର ସୁଫଳ ଲୋକେ ପାଇବା ଉଚିତ। ହିତାଧିକାରୀଙ୍କୁ ଋଣ ଓ ରିହାତି ଦେବା କ୍ଷେତ୍ରରେ ପଦକ୍ଷେପ ନେବାକୁ ସେ ପରାମର୍ଶ ଦେଇଥିଲେ। ବୈଠକରେ ଜିଲା ପରିଷଦ ସଭାପତି ପ୍ରିୟଦର୍ଶିନୀ ବିଶ୍ୱାଳ ବ୍ୟାଙ୍କରମାନେ ବିଭିନ୍ନ କ୍ଷେତ୍ରରେ ଆନ୍ତରିକତା ପ୍ରକାଶ କରୁ ନ ଥିବାରୁ କ୍ଷୋଭ ପ୍ରକାଶ କରିଥିଲେ। ଆଗାମୀ ଦିନରେ ବ୍ୟାଙ୍କଗୁଡିକ ଋଣ ପ୍ରଦାନ ଉପରେ ବିଶେଷ ଦୃଷ୍ଟି ଦେବାକୁ ସେ ପରାମର୍ଶ ଦେଇଥିଲେ। ଅନ୍ୟମାନଙ୍କ ମଧ୍ୟରେ ୟୁକୋ ବ୍ୟାଙ୍କ ଜୋନାଲ ମ୍ୟାନେଜରଏଚ୍. କେ. ଆରୋରା, ଏଲ୍ଡିଏମ୍ ସତୀଶ କୁମାର ପାତ୍ର, ପୂର୍ବତନ ଏଲ୍ଡିଏମ୍ ଅନିଲ ପଟ୍ଟନାୟକ, ଆର୍ବିଆଇ ପ୍ରତିନିଧି ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ। ଡିଆରଡିଏ ପ୍ରକଳ୍ପ ନିର୍ଦ୍ଦେଶକ ବ୍ରଜ ଗୋପାଳ ଆଚାର୍ଯ୍ୟ, ଏଡିଏମ୍ ନାବାର୍ଡ ବିଶ୍ୱଭୂଷଣ ମହାନ୍ତି, ଏଲ୍ଡିଓ ଖୁସିରାମ ସାହୁ, ଏସ୍ଡିପିଓ ପ୍ରକାଶ ଚନ୍ଦ୍ର ପାଲ ପ୍ରମୁଖ ଉପସ୍ଥିତ ଥିଲେ। କୃଷି, ଉଦ୍ୟାନ କୃଷି, ମତ୍ସ୍ୟଚାଷ, ପଶୁପାଳନ ଓ ଦୁଗ୍ଧ ଉତ୍ପାଦନ, ପ୍ରଧାନମନ୍ତ୍ରୀ ମୁଦ୍ରା ଯୋଜନା, ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ଋଣ ପ୍ରଦାନ, ପ୍ରଧାନମନ୍ତ୍ରୀ ଫସଲ ବୀମା ଯୋଜନା, ଗ୍ରାମାଞ୍ଚଳ ଆତ୍ମନିଯୁକ୍ତି ଯୋଜନାରେ ଯୁବତୀଯୁବକଙ୍କୁ କ୍ଷୁଦ୍ର ଋଣ ପ୍ରଦାନ, ଦକ୍ଷତା ବିକାଶ, ଅର୍ଥନୈତିକ ସାକ୍ଷରତା ଶିବିର, ଓଡ଼ିଶା ଜୀବିକା ମିଶନ, ଜାତୀୟ ସହରାଞ୍ଚଳ ଜୀବିକା ମିଶନ, ରାଜ୍ୟ ଅନୁସୂଚିତ ଜନଜାତି ଓ ଜାତି ଆଧିକାର ବିକାଶ ନିଗମ, କୃଷି ଭିତ୍ତିକ କାର୍ଯ୍ୟକ୍ରମ, କିଶାନ କ୍ରେଡିଟ୍ କାର୍ଡ ଆଦି ଉପରେ ଆଲୋଚନା ହୋଇଥିଲା। ଶେଷରେ ଜିଲା ଅଗ୍ରଣୀ ବ୍ୟାଙ୍କ ପରିଚାଳକ ସତୀଶ କୁମାର ପାତ୍ର ଧନ୍ୟବାଦ ଦେଇଥିଲେ।