ଲକ୍ଷ୍ନୌ/କାନପୁର,୨୧ା୧୨: ଉତ୍ତରପ୍ରଦେଶରେ ଶୁକ୍ରବାର ସଂଶୋଧିତ ନାଗରିକତ୍ୱ ଆଇନ (ସିଏଏ) ବିରୋଧରେ ଆନ୍ଦୋଳନ ବିଭିନ୍ନ ସ୍ଥାନରେ ହିଂସାର ରୂପ ନେଇଛି। ଏଥିରେ ୬ ଜଣଙ୍କ ମୃତ୍ୟୁ ଘଟିଥିବା ପୋଲିସ ସ୍ପଷ୍ଟ କରିଛି। ଏହାକୁ ମିଶାଇ ଉତ୍ତରପ୍ରଦେଶରେ ବିକ୍ଷୋଭଜନିତ ମୃତ୍ୟୁସଂଖ୍ୟା ୭ରେ ପହଞ୍ଚତ୍ଛି। ତେବେ ପୋଲିସ ଗୋଟିଏ ହେଲେ ଗୁଳି ଚଳାଇ ନ ଥିବା ୟୁପି ପୋଲିସ ମହାନିର୍ଦ୍ଦେଶକ ଓ.ପି. ସିଂ କହିଛନ୍ତି। ଯଦି ଫାୟାରିଂ ହୋଇଥାଏ ତେବେ ବିକ୍ଷୋଭକାରୀ କରିଥିବେ ବୋଲି ଅନ୍ୟ ଜଣେ ପୋଲିସ ଅଧିକାରୀ କହିଛନ୍ତି।
ପୋଲିସ ସୂଚନା ଅନୁଯାୟୀ ବିଜ୍ନୋରରେ ୨ ଜଣ, ସମ୍ଭାଲ, ଫିରୋଜାବାଦ, ମିରଟ ଓ କାନପୁରରେ ଜଣେ ଲେଖାଏ ବିକ୍ଷୋଭକାରୀ ପ୍ରାଣ ହରାଇଛନ୍ତି। ଶୁକ୍ରବାର ନମାଜ ପାଠ ପରେ ଉତ୍ତରପ୍ରଦେଶର ୧୩ଟି ଜିଲାରେ ସିଏଏ ବିରୋଧରେ ଜୋର୍ଦାର ବିକ୍ଷୋଭ ପ୍ରଦର୍ଶନ କରାଯାଇଥିଲା। ୧୪୪ ଧାରାକୁ ଉଲ୍ଲଂଘନ କରି ବିକ୍ଷୋଭକାରୀ ରାଜରାସ୍ତାକୁ ଓହ୍ଲାଇବା ସହ ବିଭିନ୍ନ ସ୍ଥାନରେ ହିଂସାକାଣ୍ଡ ଘଟାଇଥିଲେ। କାନପୁରରେ ଗୁଳିମାଡ଼ରେ ୧୨ ଜଣ ଆହତ ହୋଇଥିବାବେଳେ ସେମାନଙ୍କ ମଧ୍ୟରୁ ଜଣକର ମୃତ୍ୟୁ ଘଟିଛି। ବିଭିନ୍ନ ସ୍ଥାନରେ ପୋଲିସ ଓ ବିକ୍ଷୋଭକାରୀଙ୍କ ମଧ୍ୟରେ ସଂଘର୍ଷ ଘଟିଥିଲା। ଗୁଳିମାଡ଼ରେ ଆହତ ଆସିଫ (୨୦)ଙ୍କର ମୃତ୍ୟୁ ଘଟିଥିବା ବେଳେ ଗୁରୁତର ଆହତ ସଲିମ ମିରଟର ଆନନ୍ଦ ହସ୍ପିଟାଲରେ ଚିକିତ୍ସିତ ହେଉଛନ୍ତି। ୯ ଜଣଙ୍କୁ କାନପୁରର ଲାଲା ଲଜପତ୍ ରାୟ ହସ୍ପିଟାଲରେ ଭର୍ତ୍ତି କରାଯାଇଛି। ସେମାନଙ୍କ ମଧ୍ୟରୁ ୩ ଜଣଙ୍କ ପେଟରେ, ଜଣକ ଛାତିରେ ଓ ଅନ୍ୟମାନଙ୍କ ଗୋଡ଼ରେ ଗୁଳି ବାଜିଥିବା ଡାକ୍ତର ସଞ୍ଜୟ କାଲା କହିଛନ୍ତି। ତେବେ ପୋଲିସ ଗୁଳି ଚଳାଇ ନ ଥିବା କାନପୁର ଜୋନ୍ ଏଡିଜି ପ୍ରେମ୍ ପ୍ରକାଶ କହିଛନ୍ତି। ୟୁପିର ଗୋରଖପୁର, ଦେଓବନ୍ଦ, ମୁଜାଫରନଗର, ହାପୁର, ଶାମ୍ଲି, ପ୍ରୟାଗରାଜ୍, ବୁଲନ୍ଦସହର, ମିରଟ, ଫିରୋଜାବାଦ, ବାରାଣସୀ, ଫାରୁକାବାଦ, ବିଜ୍ନୋର, ଭାଦୋଇ ଏବଂ ହମିରପୁରରେ ହିଂସାକାଣ୍ଡ ଘଟିଛି। ବିଭିନ୍ନ ଜିଲାରେ ଉତ୍ତେଜନା ଲାଗି ରହିଥିବାରୁ ପରିସ୍ଥିତିକୁ ନିୟନ୍ତ୍ରଣ କରିବା ଲାଗି ପର୍ଯ୍ୟାପ୍ତ ପୋଲିସ ମୁତୟନ କରାଯାଇଛି। କାନପୁରର ବାବୁପୁରଓ୍ବାରେ ଶୁକ୍ରବାର ନମାଜପାଠ ପରେ ହଜାର ହଜାର ଲୋକ ୧୪୪ ଧାରାକୁ ଉଲ୍ଲଂଘନ କରି ଆନ୍ଦୋଳନରେ ସାମିଲ ହୋଇଥିଲେ। ହଲିମ ମୁସ୍ଲିମ କଲେଜରୁ ଫୁଲବାଗ ପର୍ଯ୍ୟନ୍ତ ସେମାନେ ପ୍ରତିବାଦ ଶୋଭାଯାତ୍ରାରେ ବାହାରିଥିବାବେଳେ ଶୋ‘ରୁମ୍ ଓ ଗାଡ଼ି ଭଙ୍ଗାରୁଜା କରିବା ସହ ପୋଲିସ ଉପରକୁ ଟେକାମାଡ଼ କରିଥିଲେ। ଉତ୍ତ୍ୟକ୍ତ ବିକ୍ଷୋଭକାରୀଙ୍କୁ ଘଉଡାଇବାକୁ ଯାଇ ପୋଲିସ ଲାଠିଚାଳନା କରିଥିଲେ।
ଫିରୋଜାବାଦରେ ମଧ୍ୟ ପୋଲିସ ଓ ବିକ୍ଷୋଭକାରୀଙ୍କ ମଧ୍ୟରେ ସଂଘର୍ଷ ହୋଇଥିଲା। ଉତ୍ତ୍ୟକ୍ତ ଜନତା ପୋଲିସ ଉପରକୁ ଢେଲାମାଡ଼ କରିବା ସହ କେତେକ ଗାଡ଼ି ପୋଡ଼ିଦେଇଥିଲେ। ଶାମ୍ଲିର ଆଜାଦ ଚୌକଠାରେ ବିକ୍ଷୋଭକାରୀଙ୍କୁ ଘଉଡାଇବାକୁ ପୋଲିସ ମୃଦୁ ଲାଠିଚାଳନା କରିଥିଲା। ହାପୁର ଏବଂ ମୁଜାଫରନଗରରେ ମଧ୍ୟ ଅନୁରୂପ ସ୍ଥିତି ଦେଖାଦେଇଥିଲା।
ଗୋରଖପୁରରେ ଟେକାମାଡ଼ କରୁଥିବା ବିକ୍ଷୋଭକାରୀଙ୍କୁ ପୋଲିସ ଲାଠିମାଡ଼ କରିଥିଲା। ଦେଓବନ୍ଦରେ ୨୫୦୦ ବିକ୍ଷୋଭକାରୀ ସରଫତା ବଜାରରୁ ଖାନ୍କା ପୋଲିସ ଆଉଟପୋଷ୍ଟ ଆଡ଼କୁ ସିଏଏ ବିରୋଧୀ ସ୍ଲୋଗାନ ଦେଇ ଶୋଭାଯାତ୍ରାରେ ବାହାରିଥିଲେ। ବାରାଣସୀରେ ସିଏଏ ବିରୋଧୀ ବିକ୍ଷୋଭ ଶାନ୍ତିପୂର୍ଣ୍ଣ ଥିଲା। ଆନ୍ଦୋଳନକାରୀ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପୋଲିସ ଅଧିକାରୀଙ୍କୁ ଦେଇଥିଲେ।
ଦିଲ୍ଲୀର ଦରିଆଗଞ୍ଜ ଅଞ୍ଚଳରେ ବିକ୍ଷୋଭକାରୀ ଏକ କାର୍ ଜାଳିଦେଇଥିବାବେଳେ ଦିଲ୍ଲୀର ଇଣ୍ଡିଆ ଗେଟ୍ ନିକଟରେ ସୁରକ୍ଷା କର୍ମୀଙ୍କୁ ଢେଲାମାଡ଼ କରିଥିଲେ। ବିକ୍ଷୋଭକାରୀଙ୍କୁ ତଡ଼ିବା ପାଇଁ ପୋଲିସ ପାଣିମାଡ଼ କରିବା ସହ ଲାଠିଚାଳନା କରିଥିଲା। ଏହାବ୍ୟତୀତ ମହାରାଷ୍ଟ୍ର, କର୍ନାଟକ-କେରଳ ସୀମାନ୍ତ ଅଞ୍ଚଳରେ ଆନ୍ଦୋଳନ ହିଂସାତ୍ମକ ହୋଇଥିଲା। ଉତ୍ତରପ୍ରଦେଶ, ଦିଲ୍ଲୀ ସମେତ ବିଭିନ୍ନ ଅଞ୍ଚଳରେ କର୍ତ୍ତୃପକ୍ଷ ମୋବାଇଲ, ଇଣ୍ଟରନେଟ ଏବଂ ଏସ୍ଏମ୍ଏସ୍ ସେବା ବନ୍ଦ କରିଦେଇଛନ୍ତି। ଭୀମ ଆର୍ମୀ ପକ୍ଷରୁ ଉତ୍ତର ଦିଲ୍ଲୀର ଜାମା ମସ୍ଜିଦଠାରୁ ଯନ୍ତରମନ୍ତର ପର୍ଯ୍ୟନ୍ତ ରାଲି ବାହାରିଥିବାବେଳେ ପୋଲିସ ଏହାକୁ ଅନୁମତି ଦେଇ ନ ଥିଲା। ତେବେ ଭୀମ ଆର୍ମି ମୁଖ୍ୟ ଚନ୍ଦ୍ରଶେଖର ଗିରଫ ହେବା ପୂର୍ବରୁ ଖସିଯାଇଥିଲେ। ଆନ୍ଦୋଳନ ଯୋଗୁ ଦିଲ୍ଲୀର ୧୭ଟି ମେଟ୍ରୋ ଷ୍ଟେଶନକୁ ବନ୍ଦ କରିଦିଆଯାଇଛି। କେତେକ ସଂଗଠନ ଶାନ୍ତିପୂର୍ଣ୍ଣ ବିକ୍ଷୋଭ ପ୍ରଦର୍ଶନ କରିବା ସହ ପୋଲିସକୁ ଗୋଲାପ ଫୁଲ ଦେଇଥିଲେ।
ସିଏଏ ଏବଂ ଏନ୍ଆର୍ସି ବିରୋଧୀ ବିକ୍ଷୋଭ ବେଳେ ଉତ୍ତ୍ୟକ୍ତ ଲୋକେ ଏମ୍ଏସ୍ଆରଟିସିର ୧୨ଟି ବସ୍ ଏବଂ ଏକ ଦଳକଳ ଗାଡ଼ିକୁ ଭଙ୍ଗାରୁଜା କରିଛନ୍ତି। ବିଦ୍ ଅଞ୍ଚଳରେ ଉତ୍ତ୍ୟକ୍ତ ବିକ୍ଷୋଭକାରୀଙ୍କୁ ଘଉଡାଇବାକୁ ପୋଲିସ ଲାଠିଚାଳନା କରିଥିଲା। ବିଦ୍ ଓ ନାଣ୍ଡେଡ୍ରେ ବସ୍ ଡିପୋ ଉପରକୁ ବିକ୍ଷୋଭକାରୀମାନେ ଟେକାମାଡ଼ କରିଥିଲେ। ଉତ୍ତେଜନାପ୍ରବଣ ଅଞ୍ଚଳଗୁଡ଼ିକରେ ଅତିରିକ୍ତ ସୁରକ୍ଷା ବଳ ମୁତୟନ କରାଯାଇଛି। ଗୁରୁବାର ହିଂସାତ୍ମକ ବିକ୍ଷୋଭ ବେଳେ ପୋଲିସ ଗୁଳିରେ ମାଙ୍ଗାଲୋରରେ ୨ ଓ ଲକ୍ଷ୍ନୌରେ ଜଣକର ମୃତ୍ୟୁ ଘଟିଥିଲା।