ବ୍ୟାୟାମ କରି ଆମେ ନିଜକୁ ଫିଟ୍ ରଖିଥାଉ। ଏଥିପାଇଁ ଓ୍ବାକିଂ, ଓ୍ବେଟ୍ ଟ୍ରେନିଂ, ଏରୋବିକ୍ସ, ଫୁଟ୍ବଲ, ରନିଂ ଆଦି ବିଭିନ୍ନ ପ୍ରକାରର ବ୍ୟାୟାମ କରିଥାଉ। ଏପରି କରିବା ଦ୍ୱାରା ଶରୀରରୁ ଶକ୍ତି ହ୍ରାସ ପାଇବା ସହ ପ୍ରୋଟିନ୍, ଭିଟାମିନ, କାର୍ବୋହାଇଡ୍ରେଟ୍ ପରି ପୋଷକତତ୍ତ୍ୱ ମଧ୍ୟ ହ୍ରାସ ପାଇଥାଏ। ଫଳରେ କ୍ଳାନ୍ତ ଅନୁଭବ ହୋଇଥାଏ। ତେଣୁ ଶରୀରକୁ ଶକ୍ତି ଆସିବା ପାଇଁ ବ୍ୟାୟାମ ପରେ କିଛି ନିର୍ଦ୍ଦିଷ୍ଟ ଖାଦ୍ୟ ଖାଇବା ଆବଶ୍ୟକ। ଜାଣନ୍ତୁ ସେ ସମ୍ପର୍କରେ…
ଅଣ୍ଡା: ଶରୀରକୁ ଶକ୍ତି ପ୍ରଦାନ କରିବାର ଏକ ଭଲ ସ୍ରୋତ ହେଉଛି ଅଣ୍ଡା। କାରଣ ଏଥିରେ ପ୍ରୋଟିନ୍, ଜିଙ୍କ୍ ଏବଂ କୋଲିନ ଭରପୂର ମାତ୍ରାରେ ରହିଛି। ମାଂସପେଶୀକୁ ଶକ୍ତ କରିବାରେ ଅଣ୍ଡା ସବୁଠାରୁ ଭଲ ଖାଦ୍ୟ। ଅନ୍ୟ ଖାଦ୍ୟ ତୁଳନାରେ କମ୍ ଅଣ୍ଡା ଖାଇ ମଧ୍ୟ ଆପଣ ଅଧିକ ପ୍ରୋଟିନ ହାସଲ କରିପାରିବେ।
କନ୍ଦମୂଳ: କନ୍ଦମୂଳ ଶକ୍ତିର ଆଉ ଏକ ଭଲ ଉପାଦାନ। ଏଥିରେ କାର୍ବୋହାଇଡ୍ରେଟ୍ ଏବଂ ଆଣ୍ଟିଅକ୍ସିଡାଣ୍ଟ ରହିଛି, ଯାହାକି ଶରୀରକୁ ଶକ୍ତି ପ୍ରଦାନ କରିଥାଏ। ତେଣୁ ବ୍ୟାୟାମ ପରେ କନ୍ଦମୂଳ ଖାଇବା ସବୁଠାରୁ ଭଲ।
ଓଟ୍ସ: ବ୍ୟାୟାମ ପରେ ଓଟ୍ସ ଖାଇବା ଦ୍ୱାରା ଶରୀରର କ୍ଷମତା ଏବଂ ଶକ୍ତି ବଢ଼ିଥାଏ। ଏହାକୁ କ୍ଷୀର ସହ ଖାଇପାରିବେ। ଓଟ୍ସ ବଦଳରେ ଦଲିଆ ମଧ୍ୟ ଖାଇପାରିବେ।
ଡ୍ରାଏ ଫ୍ରୁଟ୍ସ: ବ୍ୟାୟାମ ପରେ ଆପଣ ଡ୍ରାଏ ଫ୍ରୁଟ୍ସ ଖାଇପାରିବେ। ଡ୍ରାଏ ଫ୍ରୁଟ୍ସ ଯେପରି, ବାଦାମ, ଅଖରୋଟ, କାଜୁ, ପିସ୍ତା ଆଦି। ଏହା ଶରୀରକୁ ଶକ୍ତି ପ୍ରଦାନ କରିବା ସହ ବିଭିନ୍ନ ରୋଗରୁ ରକ୍ଷା କରିଥାଏ।
ଚିକେନ, ମଟନ: ଚିକେନରେ ଓମେଗା ୩ ଫ୍ୟାଟି ଏସିଡ୍, ପ୍ରୋଟିନ ଏବଂ ଏମିନୋ ଏସିଡ୍ ରହିଛି। ଯାହାକୁ ଖାଇବା ଦ୍ୱାରା ଶରୀରରେ ଶକ୍ତି ଆସିଥାଏ। ମଟନରେ ମଧ୍ୟ ପ୍ରୋଟିନ, ଆଇରନ, ଜିଙ୍କ୍ ଏବଂ ଭିଟାମିନ ମଧ୍ୟ ରହିଛି। ତେଣୁ ବ୍ୟାୟାମ ପରେ ଚିକେନ କିମ୍ବା ମଟନ ଖାଇଲେ ସ୍ବାସ୍ଥ୍ୟ ପକ୍ଷେ ଭଲ।
ଫଳ: ତାଜା ଫଳ ଖାଇଲେ ଶରୀରକୁ ତୁରନ୍ତ ଶକ୍ତି ମିଳିଥାଏ। ତାଜାଫଳରେ ଭିଟାମିନ ସି, ପ୍ରୋଟିନ, ଜଳ, ଫାଇବର ଏବଂ କାର୍ବୋହାଇଡ୍ରେଟ୍ ପରି ପୋଷକତତ୍ତ୍ୱ ରହିଛି। ଯାହା ଶରୀରକୁ ସୁସ୍ଥ ରଖିବା ସହ ଶକ୍ତି ପ୍ରଦାନ କରିଥାଏ। ତେଣୁ ବ୍ୟାୟାମ ପରେ ତାଜା ଫଳ କିମ୍ବା ଜୁସ୍ ପିଇ ପାରିବେ।