ନୂଆଦିଲ୍ଲୀ, ୨।୧(ପି.ଟି.)- ବୟସ ଜାଲିଆତିରେ ଧରାପଡିଛନ୍ତି ୧୯ ବର୍ଷରୁ କମ୍ ବିଶ୍ୱକପ୍ ହିରୋ ମନଜୋତ କାଲରା। ଗତ ବିଶ୍ୱକପ୍ ଫାଇନାଲରେ ଶତକ ହାସଲ କରିଥିବା ଯୁବ ବାମହାତୀ ଓପନର କାଲରା ଦିଲ୍ଲୀ ଡିଷ୍ଟ୍ରିକ୍ଟ କ୍ରିକେଟ ଆସୋସିଏଶନ (ଡିଡିସିଏ) ଓମ୍ବୁଡ୍ସମ୍ୟାନଙ୍କ ଦ୍ୱାରା ବୟସ ଜାଲିଆତି ପାଇଁ ରଣଜୀ ଟ୍ରଫିରୁ ଗୋଟିଏ ବର୍ଷ ବାସନ୍ଦ ହୋଇଛନ୍ତି। ସେ ୧୬ ଓ ୧୯ ବର୍ଷରୁ କମ୍ କ୍ରିକେଟ ଖେଳୁଥିବା ବେଳେ ବୟସ ଜାଲିଆତି କରିଥିବା ଜଣାପଡିଥିଲା।
ତେବେ ସମାନ ପ୍ରକାର ଦୋଷ ପାଇଁ ଦିଲ୍ଲୀ ସିନିୟର ଦଳ ଉପ- ଅଧିନାୟକ ନୀତୀଶ ରାଣାଙ୍କୁ ବର୍ତ୍ତମାନ ପାଇଁ ଦଣ୍ଡିତ କରାଯାଇନାହିଁ। ଜୁନିୟର ସ୍ତରରେ ସେ ଏଭଳି ଜାଲିଆତି କରିଥିଲେ। ତେବେ ତାଙ୍କୁ ଆହୁରି କିଛି କାଗଜପତ୍ର ଦାଖଲ କରିବା ପାଇଁ କୁହାଯାଇଛି। ସେହିପରି ୧୯ ବର୍ଷରୁ କମ୍ ତାରକା ଶିବମ ମାଭିଙ୍କ ମାମଲା ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)କୁ ପ୍ରଦାନ କରାଯାଇଛି। ସେ ଏବେ ସିନିୟର କ୍ରିକେଟରେ ଉତ୍ତର ପ୍ରଦେଶ ତରଫରୁ ପ୍ରତିନିଧିତ୍ୱ କରୁଛନ୍ତି।
ଓମ୍ବୁଡ୍ସମ୍ୟାନ ବଦର ଦୁରେଜ ଅହମ୍ମଦ କାଲରାଙ୍କୁ ବୟସ- ବର୍ଗ କ୍ରିକେଟରୁ ୨ ବର୍ଷ ଓ ରଣଜୀ କ୍ରିକେଟରୁ ଗୋଟିଏ ବର୍ଷ ବାସନ୍ଦ ପାଇଁ ନିର୍ଦ୍ଦେଶ ଦେଇଛନ୍ତି। ଫଳରେ ସେ ଅତିକମ୍ରେ ଚଳିତ ସେସନରେ ରଣଜୀ ନ ଖେଳିବା ସ୍ପଷ୍ଟ ହୋଇଛି। ବିସିସିଆଇ ରେକର୍ଡ ଅନୁସାରେ କାଲରାଙ୍କ ବୟସ ଏବେ ୨୦ ବର୍ଷ ୩୫୧ ଦିନ ରହିଛି। ସେ ଗତ ସପ୍ତାହରେ ୨୩ ବର୍ଷରୁ କମ୍ ଦିଲ୍ଲୀ ଦଳ ପାଇଁ ବେଙ୍ଗଲ ବିପକ୍ଷରେ ଖେଳିଥିଲେ ଓ ୮୦ ରନ ସଂଗ୍ରହ କରିଥିଲେ। ସେ ସିନିୟର ଓପନର ଶିଖର ଧାଓ୍ବନଙ୍କ ବଦଳରେ ଖେଳିବାର କାର୍ଯ୍ୟକ୍ରମ ଥିଲା। ତେବେ ବର୍ତ୍ତମାନ ସେ ଖେଳିବାରୁ ବଞ୍ଚିତ ହେବେ। ଏହି ଘଟଣାରେ ଡିଡିସିଏ ସାଧାରଣ ସମ୍ପାଦକ ବିନୋଦ ତିହାରା ନୈରାଶ୍ୟ ଜାହିର କରିଛନ୍ତି।