ଲକ୍ଷ୍ନୌ: ଜ୍ଞାନକୌଶଳର ବିକାଶ ଏବେ ଡାକ ବିଭାଗର ଚିଠି ବୋଝ କମାଇ ଦେଇଛି, କିନ୍ତୁ ପ୍ରଭୁ ବିଘ୍ନନାଶକ ଶ୍ରୀଗଣେଶଙ୍କ ପାଖକୁ ଆସୁଛି ବସ୍ତା ବସ୍ତା ଚିଠି। ଏମିତିକା ଚିଠି ଦେଉଛନ୍ତି ଭକ୍ତମାନେ। ଲକ୍ଷ୍ନୌର ଅଧା ଡଜନ ପୂଜା ମଣ୍ଡପରେ ଏଭଳି ଚିଠି ମିଳିଛି ଶ୍ରୀଗଣେଶଙ୍କୁ। ମଣ୍ଡପରେ ଶ୍ରୀଗଣେଶଙ୍କୁ ‘ମନୌତିୟୋଁ କି ରାଜା’ (ଇଚ୍ଛା ବା କାମନାର ରାଜା) ବୋଲି କୁହାଯାଏ। ତାଙ୍କ ପାଖରେ ଯେକୌଣସି ସମସ୍ୟାର ସମାଧାନ ପାଇଁ ଚିଠି ଲେଖି ଜଣାଇଲେ ତାହା ପୂରଣ ହୋଇଯାଏ ବୋଲି ଲୋକମାନଙ୍କର ବିଶ୍ୱାସ ରହିଛି। ଏହି ଚିଠି ଲେଖି ସେଠାରେ ରଖାଯାଇଥିବା ବାକ୍ସ ମଧ୍ୟରେ ପକାଇବାକୁ ପଡେ। ଏ ବର୍ଷ ନୂଆ କରି ଆରମ୍ଭ କରାଯାଇଥିବା ଏକ ପୂଜା ମଣ୍ଡପର ସଦସ୍ୟ ଅରବିନ୍ଦ କୁଶଓ୍ବା କହନ୍ତି ଯେ. ତାଙ୍କ ପୂଜା ମଣ୍ଡପରେ ଦିନକୁ ୩ ବସ୍ତା ଚିଠି ମିଳୁଛି। ପୂଜା ମଣ୍ଡପରେ ଭକ୍ତମାନେ ଚିଠି ଲେଖିବା ପାଇଁ କାଗଜ ଓ କଲମ ବି ଯୋଗାଇ ଦିଆଯାଉଛି। ବାକ୍ସରୁ ଚିଠି ବାହାର କରାଯିବା ପରେ ତାହାକୁ ପୂଜକ ଶ୍ରୀଗଣେଶଙ୍କ ସମ୍ମୁଖରେ ପଢନ୍ତି ଓ ସେମାନଙ୍କ ଚିଠିର ଉତ୍ତର ଦେବାକୁ ପ୍ରର୍ଥନା କରନ୍ତି। ମନୌତିୟୋଁର ରାଜା ଶ୍ରୀଗଣେଶଙ୍କ ଉପରେ ଲୋକମାନଙ୍କର ଅଗାଧ ବିଶ୍ୱାସ ରହିଛି। ଚାକିରି ଓ ଭଲ ଜୀବନସୀଥୀ ପାଇବା, ବିବାଦର ସମାଧାନ କରିଦେବା ପାଇଁ ଗଣେଶଙ୍କ ପାଖକୁ ଭକ୍ତମାନେ ଚିଠି ଲେଖୁଛନ୍ତିି। କଶ୍ମୀରରେ ରହୁଥିବା ବନ୍ଧୁମାନଙ୍କ କୁଶଳ କାମନା କରି ଅନେକ ଚିଠି ଲେଖାଯାଇଥିବା ଦେଖାଯାଇଛି। ଚାକିରିରେ ପଦୋନ୍ନତି ଓ ଆୟକର ସମସ୍ୟାରୁ ମୁକ୍ତି ପାଇବା ଲାଗି ମଧ୍ୟ ଲୋକମାନେ ଚିଠି ଲେଖିଛନ୍ତି । ଯାହା କୋର୍ଟରେ ସମାଧାନ ହେବା କଥା ତାହା ଶ୍ରୀଗଣେଶ କରିଦେବେ ବୋଲି ଲୋକମାନଙ୍କର ବିଶ୍ୱାସ ରହିଛି।