ଜାମଟିକ୍ରା, ୬ା୧(ଡି.ଏନ୍.ଏ.)- ଉଭଏ କେନ୍ଦ୍ର ଆର ରାଏଜ୍ ସରକାର ଗରିବ୍ ଦୁଖିକୁ ମାହାଲିଆ ସୁଆସ୍ତିଅ ସେବା ଯୁଗେଇ ଦେବାର ଲାଗି ଅନେକ୍ ଯୋଜନା କାଯ୍କାରୀ କରୁଛନ୍। ସେନ୍ତା ଏଭେ ରାଏଜ୍ ସରକାର ସୁଆସ୍ତିଅ ସେବାକେ ଅଧ୍କା ଗୁରୁତ୍ ଦେଇ ସେଟାକେ ୫-ଟି, ମୋ ସରକାରରେ ସାମିଲି କରିଛନ୍। ହେଲେ ଇ ସବୁ ଯୋଜନାକେ କାଯ୍କାରୀ କରୁଥିବାର ଅଧ୍କାରୀ, କରମ୍ଚାରୀକଁର ଅଁାତରିକତା ଅଭାବୁ ଅନେକ୍ ଗରିବ୍ ଦୁଖି ସୁଆସ୍ତିଅ ସେବାରୁ ବଁଚିତ୍ ହେଉଥିବାର ଦେଖ୍ବାକେ ମିଲୁଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବରଗଡ଼ ଜିଲା ଅତାବିରା ବ୍ଲକ ବୁଗବୁଗା ପଁଚେତ୍ ଜାମଟିକ୍ରା ଗଁାରେ।
ସୂଚନା ଅନ୍ସାରେ ଜାମଟିକ୍ରା ପଧାନପଡ଼ାର ଧର୍ମରାଜ ପଧାନ(୪୬)। ପରିବାର କହେଲେ ମାଏକିନା ଭୂମିସୂତା, ଦୁଇ ଝି’ ଲୁସି ଆର ସେଲିକୁଁ ନେଇ ସଁସାର। ଧର୍ମରାଜ ଛତି ଚାଷ୍ କରି ଦୁଇ ପଏସା ରୁଜ୍ଗାର କରୁଥିଲେ। ସେଥ୍ରେ ତାକର ପରିବାର ହଁସ୍ଖୁସିରେ ଚଲିଯାଉଥିଲା। ହେଲେ ଆଏଜ୍କେ ୩ ମାସ୍ ତଲେ ସେ ହଠାତ୍ ଦିନେ ଆଏଁଖ୍ରେ ଦରଦ୍ ଅନୁଭବ କରିଥିଲେ। ଦରଦ୍ ନାଇଁ କମ୍ଲାରୁ ବୁର୍ଲା ବଡ଼ ଡାକ୍ତରଖାନା ଯାଇ ପରୀକ୍ଷା ନିରୀକ୍ଷା କରାଲେ। ସେଠାନେ ତାକର ଅଁାଖିରେ କ୍ୟାନସର ହେଇଥିବାର ଜନାପଡ଼ିଥିଲା। ବୁର୍ଲାରେ ଡାକ୍ତର ଧର୍ମରାଜକୁଁ ଉଚ ଚିକିଛା ଲାଗି କଟକ ବଡ଼ ଡାକ୍ତରଖାନା ଯିବାକେ ପରାମଶ ଦେଇଥିଲେ। ଏନ୍ତାଥି ଧର୍ମରାଜ ଜମିବାଡ଼ି ବିକି କଟକ ବଡ଼ ଡାକ୍ତରଖାନାରେ ଚିକିଛା କରାଲେ। ହେଲେ କିଛି ଲାଭ୍ ନାଇଁ ହେଲା। ଏହେଦେ ସେ ଟଁକା ପଏସା ଅଭାବୁ ଭଗବାନ ଭରସାରେ ଘରେ ପଡ଼ି ରହିଛନ୍। ଇଅଡ଼େ ମାଏକିନା ଭୂମିସୂତା ଝନେ ହୁରୁଦ୍ ରୁଗୀ। ପରିବାର ଚଲାବାକେ ଆର ଘରେ କେହି ନାଇଁ। ଦୁଇ ଝି’ ପାଠ୍ ପଢ଼ୁଛନ୍। ହେଲେ ଅଭାବ ଅନାଟନରୁ ତାକର ବି ପାଠ୍ପଢ଼ା କେତେବେଲେ ବଁଦ୍ ହେଇଯିବା। ଧର୍ମରାଜ ଝନେ ଗରିବ୍ ଲୋକ ହେଇଥିଲାବେଲେ ସରକାରୀ ଯୋଜନାରେ ୨୦ କେ.ଜି. ଚାଉଲ ପାଉଛନ୍। ହେଲେ ଆଏଜ୍ତକ ସେ ଆବାସ ଯୋଜନାରେ ଘରଖଁଡ଼େ ପାଏବାରୁ ବଁଚିତ୍ ହେଇ ରହିଛନ୍। ଏହେଦେ ପରିସ୍ଥିତି ଏନ୍ତା ଯେ, ପରିବାରଟା ଉନିଆ ଲୁକ୍କର ସହଯୋଗରେ ଚଲୁଛେ। ଏନ୍ତାଥି ସେ ମୁଖ୍ୟମନ୍ତ୍ରୀ ରିଲିଫ୍ ଫଣ୍ଡରୁ ଚିକିଛା ସାହାଯ୍ ଲାଗି ଗଣମାଧ୍ୟମ ଜରିଆରେ ଜିଲା ପରଶାସନକେ ଆକୁଲବିକୁଲ ହେଇ ନିବେଦନ କରିଛନ୍। ଜିଲା ପରଶାସନ ଇ ଦୁଖି ଅସାହା ପରିବାର ଉପରେ ଦୁରୁଷ୍ଟି ଦେଇ ସରକାରୀ ସୁବିଧା ସଂଗେ ଧର୍ମରାଜକୁଁ ଚିକିଛା ସାହାଯ୍ ଯୁଗେଇ ଦେବାକେ ଗଁାବାସୀ ଦାବି କରିଛନ୍।