ନବରଙ୍ଗପୁର,୧।୬(ବି.ପ୍ର.)- ନବରଙ୍ଗପୁର ଜିଲା ଉପକଣ୍ଠ ଚାଉଁରିଆଗାଡା ନିକଟରୁ ଇନ୍ଦ୍ରାବତୀ ପୋଲ ପର୍ଯ୍ୟନ୍ତ ୨୬ ନମ୍ବର ଜାତୀୟ ରାଜପଥ କଡରେ ଲଗାଯାଇଥିବା ଷ୍ଟ୍ରିଟ ଲାଇଟ ଗୁଡିକ ଦିନରେ ଜଳୁଛି ରାତିରେ ଜଳୁ ନାହିଁ । ନବରରଙ୍ଗପୁର ପୌରାଞ୍ଚଳ ସୀମାବର୍ତ୍ତି ଅଧିନରେ ଥିିବା ଲାଇଟ ଗୁଡିକ ଜଳୁଛି । ତା’ପରଠାରୁ ଯାହାବି ଖୁଣ୍ଟରେ ଲାଇଟ ଗୁଡିକ ରହିଛି ତାହା ଦୀର୍ଘ ୬ ମାସ ହେବ ଜଳୁ ନାହିଁ । ଅନ୍ୟ ପକ୍ଷେ ଖୁଣ୍ଟ ଗୁଡିକ ଫାଟି ଭାଙ୍ଗିବାକୁ ବସିଲାଣି । ଏବେ କାଳବୈଶାଖୀ ସହ ଝଡ ପବନ ହେଉଛି । ରାସ୍ତା କଡରେ ଗଛ ଗୁଡିକ ରହିଛି । ପବନ ବର୍ଷା ସମୟରେ ଏହି ଖୁୂଣ୍ଟ ଗୁଡିକ ଉପୁଡି ପଡିବାର ଯଥେଷ୍ଟ ସମ୍ଭାବନା ରହିଛି । ଲକ୍ଷାଧିକ ଟଙ୍କା ବ୍ୟୟରେ ସୌନ୍ଦର୍ଯ୍ୟକରଣ ଓ ପଥିକକୁ ସୁବିଧା ଯୋଗାଇବା ଲାଗି ଲଗାଯାଇଥିବା ଲାଇଟ ଗୁଡିକ ସାଢେ ଦୁଇ ବର୍ଷ ମଧ୍ୟରେ ଏଭଳି ଅକାମି ହୋଇ ପଡିଛି । ସେହିଭଳି ଏହି ରାସ୍ତାରେ ପ୍ରାତଃ ଓ ସନ୍ଧ୍ୟା ଭ୍ରମଣରେ ମହିଳା, ପୁରୁଷ ଓ ଶିଶୁମାନେ ଯାଉଛନ୍ତିି । ଅନ୍ଧାର ଯୋଗୁ ବିଭିନ୍ନ ବନ୍ୟଜନ୍ତୁ ଆକ୍ରମଣ ଓ ଲୁଟର ଆଶଙ୍କା ରହୁଛି। ଦୁଇ ବର୍ଷ ତଳେ ପ୍ରାତଃ ଭ୍ରମଣରେ ଯିବା ସମୟରେ ଜଣେ ମହିଳାଙ୍କୁ ଏହି ରାସ୍ତାରେ ଭାଲୁ କାମୁଡିବାରୁ ଗୁରୁତର ହୋଇ ପଡିଥିଲେ । ନୂତନ ଖୁଣ୍ଟ ଓ ଲାଇଟ ଗୁଡିକ କିଭଳି ଜଳିବ ସେ ନେଇ ସହରବାସୀ ଦାବୀ କରି ଆସୁଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଟାନ ଗ୍ରହଣ କରାଯାଉ ନାହିଁ । ଏନେଇ ଜିଲାପାଳ ଡଃ. ଅଜିତ କୁମାର ମିଶ୍ରଙ୍କ ଦୃଷ୍ଟି ଆକର୍ଷଣ କରାଯିବାରୁ ଏଥିପ୍ରତି ପଦକ୍ଷେପ ନେବେ ବୋଲି କହିଛନ୍ତି।