ଭଞ୍ଜନଗର,୨୨।୫(ଡି.ଏନ୍.ଏ.)- ଗଞ୍ଜାମ ଜିଲାର ବିଭିନ୍ନ କ୍ୱାରାଣ୍ଟାଇନ୍ ସେଣ୍ଟରରୁ ହିଁ ପୂର୍ବରୁ ପ୍ରାୟ କରୋନା ପଜିଟିଭ୍ ବାହାରୁଥିଲେ। ତେଣୁ ପ୍ରଶାସନ ପକ୍ଷରୁ ଭୟଭୀତ ନହେବାକୁ ଲୋକଙ୍କୁ ପରାମର୍ଶ ଦିଆଯାଉଥିଲା। କିନ୍ତୁ ଶୁକ୍ରବାର ଭଞ୍ଜନଗର ଉପଖଣ୍ଡରେ କ୍ୱାରାଣ୍ଟାଇନ୍ ସେଣ୍ଟର ବାହାରୁ ୨ଜଣ କରୋନା ପଜିଟିଭ୍ ବାହାରିଥିବା ଜଣାପଡ଼ିଛି। ସେଥିମଧ୍ୟରୁ ଭଞ୍ଜନଗର ବ୍ଲକର ଜଣେ ମହିଳା ଥିବାବେଳେ ବେଲଗୁଣ୍ଠା ବ୍ଲକର ଜଣେ ବ୍ୟକ୍ତି ରହିଛନ୍ତି। ଏହି ଖବର ପ୍ରଚାରିତ ପରେ ସାଧାରଣ ଲୋକେ ଆତଙ୍କିତ ହୋଇପଡ଼ିଛନ୍ତି। ଅପରପକ୍ଷେ ଭଞ୍ଜନଗର ଦମକଳ କେନ୍ଦ୍ର ପକ୍ଷରୁ ଆକ୍ରାନ୍ତଦ୍ୱୟଙ୍କ ଗ୍ରାମକୁ ଶୁକ୍ରବାର ସାନିଟାଇଜ୍ କରାଯାଇଛି। ଏଥିସହ ଆକ୍ରାନ୍ତଙ୍କ ସମ୍ପର୍କରେ ଆସିଥିବା କେତେକ ବ୍ୟକ୍ତିଙ୍କ ସ୍ବାବ ସଂଗ୍ରହ କରି ପରୀକ୍ଷା ପାଇଁ ପଠାଯାଇଛି। ସେମାନେ କେଉଁମାନଙ୍କୁ ଭେଟିଥିଲେ କେମିତି ଆକ୍ରାନ୍ତ ହେଲେ ସେନେଇ ପ୍ରଶାସନ ପକ୍ଷରୁ ଯାଞ୍ଚ ଚାଲିଛି। ଉକ୍ତ ଗ୍ରାମ ଉପରେ ପ୍ରଶାସନ ୨୪ ଘଣ୍ଟିଆ ନଜର ରଖିଛି। ଲୋକଙ୍କୁ ଅନାବଶ୍ୟକ ସ୍ଥଳେ ଘରୁ ନବାହାରିବା ପାଇଁ ପରାମର୍ଶ ଦିଆଯାଇଛି।