ଭଞ୍ଜନଗର,୨୦।୬(ଡି.ଏନ.ଏ.)- ମାଓବାଦୀ ନେତା ସବ୍ୟସାଚ୍ଚୀ ପଣ୍ଡାଙ୍କୁ ଗୁରୁବାର ପୋଲିସ ବିଭିନ୍ନ ମାମଲାର ବିଚାରଣ ପାଇଁ ଭଞ୍ଜନଗର କୋର୍ଟରେ ହାଜର କରିଥିଲା। ଏଥିସହ ମାଓବାଦୀ ହିଂସା ମାମଲାରେ ଜଡିତ ଆଉ ୬ଜଣ କୋର୍ଟରେ ହାଜର ହୋଇଥିଲେ। ସେମାନଙ୍କ ମଧ୍ୟରୁ କେତେଜଣ ଜାମିନରେ ଥିବାବେଳେ ଆଉ କେତେଜଣ ଏବେବି ଜେଲରେ ବିଚାରାଧିନ ବନ୍ଦୀଭାବେ ଅଛନ୍ତି। ସୋରଡା ଓ ବଡଗଡ ଥାନା ଅଞ୍ଚଳର ୧୦ ମାଓବାଦୀ ହିଂସା ମାମଲାର ଗୁରୁବାର ବିଚାରଣ ହୋଇଥିଲା। ଏହା ସରିବା ପରେ ସବ୍ୟସାଚ୍ଚୀଙ୍କୁ କଡା ସୁରକ୍ଷା ମଧ୍ୟରେ ଅପରାହ୍ନରେ ବ୍ରହ୍ମପୁର ଜେଲକୁ ସ୍ଥାନାନ୍ତର କରାଯାଇଛି। ଶୁକ୍ରବାର ମଧ୍ୟ ମାଓବାଦୀ ହିଂସା ମାମଲାର ବିଚାରଣ ଥିବାରୁ ସବ୍ୟସାଚ୍ଚୀଙ୍କୁ ଭଞ୍ଜନଗର କୋର୍ଟରେ ହାଜର କରାଯିବାର କାର୍ଯ୍ୟକ୍ରମ ରହିଛି। ସରକାରଙ୍କ ପକ୍ଷରୁ ଏମ୍.ତାଜ୍ ଆଦେନୀ, ଡ. ସୁଶାନ୍ତ ତ୍ରିପାଠୀ, ବିମ୍ବାଧର ଷଢଙ୍ଗୀ, ମୁଦାଲାଙ୍କ ପକ୍ଷରୁ ଆଇନଜୀବୀ ଦଣ୍ଡପାଣି ସ୍ବାଇଁ ମୋକଦ୍ଧମା ପରିଚାଳନା କରୁଛନ୍ତି।