ହାଟଡିହୀ,୨।୧୨(ଡି.ଏନ୍.ଏ.): କେନ୍ଦୁଝର ଜିଲା ହାଟଡିହୀ ବ୍ଲକ ଢେଙ୍କା ହାଇସ୍କୁଲ ଶିକ୍ଷକ ଅନିରୁଦ୍ଧ ସ୍ବାଇଁଙ୍କ ମୃତଦେହ ରକ୍ତ ଜୁଡୁବୁଡୁ ଅବସ୍ଥାରେ ମରୈଗାଁରେ ରହୁଥିବା ଏକ ଭଡ଼ା ଘରୁ ଶୁକ୍ରବାର ଉଦ୍ଧାର ହୋଇଛି l ମୃତ୍ୟୁର କାରଣ ସ୍ପଷ୍ଟ ହୋଇ ନ ଥିବା ବେଳେ ତାଙ୍କୁ କେହି ହତ୍ୟା କରିଥିବା ସନ୍ଦେହ କରାଯାଉଛି।
ସୂଚନାଯୋଗ୍ୟ, ନନ୍ଦିପଦା ଥାନାଠାରୁ ମାତ୍ର ୫୦ ମିଟର ଦୂରରେ ଏହି ଘଟଣା ଘଟିଛି l ସୋମବାର ତାଙ୍କର କୌଣସି ଖବର ନ ମିଳିବାରୁ ସମ୍ପର୍କୀୟ ତାଙ୍କୁ କଲ୍ କରିଥିଲେ l ହେଲେ ସେ ଫୋନ ଉଠାଇ ନ ଥିଲେ। ଏନେଇ ସମ୍ପର୍କୀୟ ସେ ରହୁଥିବା ଭଡ଼ା ଘରେ ପହଞ୍ଚି ଥିଲେ। ହେଲେ ଘର ବାହାର ପଟୁ ତାଲା ପଡିଥିଲା l ଘର ଝରକା ପଟେ ଦେଖିଲା ବେଳକୁ ଅନିରୁଦ୍ଧ ଖଟ ଉପରେ ଅର୍ଦ୍ଧଲଗ୍ନ ଅବସ୍ଥାରେ ପଡିଥିବାର ଦେଖିବାକୁ ମିଳିଥିଲା। ଏନେଇ ନନ୍ଦିପଦା ପୋଲିସକୁ ଖବର ଦିଆଯାଇଥିଲା l ହାଟଡିହୀ ତହସିଲଦାରଙ୍କ ଉପସ୍ଥିତରେ ପୋଲିସ ତାଲା ଭାଙ୍ଗି ମୃତଦେହ ଜବତ କରିଥିଲା। ପୋଲିସ ଘଟଣାର ତଦନ୍ତ ଆରମ୍ଭ କରିଥିବା ବେଳେ ଶିକ୍ଷକଙ୍କ ମୃତ୍ୟୁକୁ ନେଇ ନାନା କଳ୍ପନା ଜଳ୍ପନା ଲାଗି ରହିଛି। ମୃତଦେହ ଘର ଭିତରେ ପଡ଼ିଥିବା ବେଳେ ବାହାର ପଟୁ ତାଲା କିଏ ପକାଇଲା ତାକୁ ନେଇ ସନ୍ଦେହ ସୃଷ୍ଟି ହୋଇଛି। ମୃତକଙ୍କ ଭାଇ ରଞ୍ଜନ ସ୍ବାଇଁ ଶରୀରରେ କ୍ଷତାକ୍ତ ଚିହ୍ନ ଥିବା ଦେଖି ଏକ ଯୋଜନା ମୁତାବକ ହତ୍ୟାକାଣ୍ଡ ବୋଲି ସନ୍ଦେହ ପ୍ରକାଶ କରିଛନ୍ତି।