ଲୋଇସିଂହା,୨୪।୧୦ (ଡି.ଏନ୍.ଏ.)- ବଲାଙ୍ଗୀର ଜିଲା ଲୋଇସିଂହା ବ୍ଲକ କର୍ଲିପାଟ ଗାଁର ବିଧବା ତୁଳସୀ ନାଗ(୫୦)। ଆପନେ ଚାଲିଯିବାର ଆଏଜ୍କେ ବଛ୍ରେ ବିତିଯାଇଥିଲେ ବି ସେ ବିଧବା ଭତାରୁ ବଁଚିତ୍ ହେଇ ରହିଥିବାର ଅଭିଯୋଗ କରିଛନ୍।
ସୂଚନା ଅନ୍ସାରେ କର୍ଲିପାଟ ଗାଁର ବିଧବା ତୁଳସୀ ନାଗକଁର ପରିବାର କହେଲେ ଦୁଇ ପୁଓକୁ ନେଇ ସଁସାର। ଆପ୍ନେ ଗଜରାଜ ଲୋଇସିଂହା କଲେଜରେ ପିଅନ ହିସାବେ କାମ୍ କରୁଥିଲେ। ଗଲା ବଛର ସେ କିଡ଼୍ନୀ ରୋଗ୍ରେ ପଡ଼ି ଆରପାରକେ ଚାଲିଯାଇଛନ୍। ହେଲେ ପରିବାର ଲୋକ୍ ଯାହା ସଁଚିଥିଲେ ସବୁ ତାକର ଚିକିଛାରେ ସାରି ସରବ୍ସୁଆଁତ ହେଇଯାଇଛନ୍। ଇଆଡ଼େ ବିଧବା ତୁଳସୀ ବି କିଡ଼୍ନୀ ରୋଗ୍ରେ ଆକ୍ରଁାତ ହେଇ ମାସିକ୍ ହଜାରେ ଟଁକା ଉଷୋ ଖାଉଛନ୍। ସେନ୍ତା ତୁଳସୀ କଲେଜରୁ ଆପ୍ନେର ଇପିଏଫ୍ ଟଁକାରୁ ମାସିକ ୬ ଟଁକା ଭତା ଆର ପଁଚେତ୍ରୁ ୧୫ କେ.ଜି. ଚାଉଲ ପାଉଛନ୍। ହେଲେ ଇ ସବୁ ୩ ପରାନୀ କୁଟୁମ ଆର ତୁଳସୀକଁର ଉଷୋକଷାକେ ନିଅଁଟ ହେଉଛେ। ତୁଳସୀ ଭିଧବା ଭତା ଆଶ୍ରେ ଥାନୀଅ ସରପଁଚ୍ ଆର ବିଏସ୍ଏସ୍ଓକୁଁ କାଗଜପତର ଦେଇ ଗୁହାରି କରିଛନ୍। ହେଲେ ଆଏଜ୍ତକ ସେ ଭତା ନାଇଁ ପାଇଥିବାର କହିଛନ୍। ଇ ଦିଗେ ଜିଲାପାଳ ଦୁରୁଷ୍ଟି ଦେଇ ତୁଳସୀକୁଁ ଭତା, ୩୫ କେ.ଜି. ଚାଉଲ ଆର ସରକାରୀ ଯୋଜନାରେ ମାହାଲିଆ ଉଷୋକଷା ଯୁଗେଇ ଦେବାକେ ଗାଁବାସୀ ଦାବି କରିଛନ୍।